ايتتىڭ العاشقى كۇنى ءبىزدىڭ اۋلەت ءۇشىن سىناعىمەن كەلدى. اۋلەتىمىزدىڭ تىرەگى، اسقار تاۋىمىز اكەم قاتتى اۋىرىپ، ءبىر قورقىتىپ الدى.
⠀
رامازان ايى بىتە سالىسىمەن قان قىسىمى 200/150 بولىپ ۇشىپ ءتۇسىپتى. بىرنەشە رەت شاقىرىلعان جەدەل-جاردەممەن اۋرۋحاناعا جاتقىزا الماي (ول بولەك حيكايا), ءۇشىنشى كۇنى جاعدايى كۇرت ناشارلاعان سوڭ، ارەڭ دەگەندە اۋرۋحاناعا جاتقىزدىق.
⠀
"اۋرۋحاناعا جاتۋ جورىعىنىڭ" ۇزاققا سوزىلۋىنا - حالىق اراسىنداعى مەديتسينا سالاسىنا دەگەن سەنىمنىڭ قۇقىق قورعاۋ سالاسىنا سەكىلدى تۇگەسىلگەندىگى اسەر ەتكەندىگىن نەسىنە جاسىرايىن. ءتۇرلى مەسسەندجەرلەردەگى "كوروناۆيرۋستىڭ جوقتىعى" تۋرالى، نەمەسە باسقا اۋرۋمەن اۋىرىپ تۇسكەندەردىڭ "كوۆيد" بولىپ قايتىس بولىپ جاتقاندىعى تۋرالى اقپاراتتارعا "تويىپ العان" بۇقارا ءۇشىن (ىشىندە جاقىندارىم دا بار) - "اق حالاتتى ابزال جان" وبرازى رومانتيكالىق كەيىپكەرگە اينالىپ كەتىپتى.
⠀
بۇعان ءار ءتۇرلى فاكتورلار اسەر ەتسە كەرەك.
سولاردىڭ كەيبىرىن ساراپتاي وتىرىپ، مەديتسينا سالاسىنا ۇلكەن رەفورما كەرەك ەكەندىگىنە كەزەكتى رەت كوز جەتكىزىپ وتىرمىن.
⠀
1. ەلىمىزدە ءالى كۇنگە دەيىن اۋرۋحانا، ونداعى جاتىن ورىن سانى جەتىسپەيدى. سونىڭ ناتيجەسىندە دارىگەرلەر كوپتەگەن اۋرۋلاردى اۋرۋحاناعا جاتقىزۋدان باس تارتىپ، ءۇي جاعدايىندا ەمدەلۋگە جىبەرۋگە ءماجبۇر. ساۋدا ويىن-ساۋىق ورتالىقتارىن سالۋدى سۋبسيديالاۋدان الدىنا جان سالمايتىن ءبىزدىڭ ەل ءۇشىن پريوريتەتتى قايتا قاراستىرۋ قاجەت سەكىلدى.
2. دارىگەرلەردىڭ بىلىكتىلىگى ماسەلەسى. كوپتەگەن ماسەلەلەردە دارىگەرلەردىڭ بىلىكتىلىگى كۇمان تۋدىراتىن جايتتارعا كۋا بولىپ جاتىرمىز.
3. بىلىكتى دارىگەرلەردىڭ جالاقىسى ماسەلەسى. اقش، ەۋروپا ەلدەرىندە داۋلەتتى ءومىر سۇرەتىن ماماندىق يەلەرىنىڭ ءبىرى - دارىگەرلەر. بىزگە دە ويلانارلىق ماسەلە.
4. ءدارى-دارمەكتەردى مەملەكەتتىك ساتىپ الۋ ماسەلەسى. وسى سالاداعى مونوپوليانىڭ اسەرى ما ەكەن، ءدارىحانادا بار ءدارى-دارمەك ساپاسى اناۋ ايتقانداي ەمەس. ناتيجەسىندە، ناۋقاس پەن ونىڭ جاقىندارى ساپالى ءدارىنى قوسىمشا ساتىپ الۋعا ءماجبۇر.
⠀
ال، سىزدەر مەديتسينا سالاسىنا قانداي وزگەرىس كەرەك دەپ ويلايسىزدار؟ وي قوسا وتىرىڭىزدار!
⠀
P.S. ايتپاقشى، قۇدايعا شۇكىر، قازىر اكەمنىڭ جاعدايى جامان ەمەس. تەك كەمپىرىن ىزدەپ ەلەگزىگەنى بولماسا، بىرقالىپتى ەمىن الىپ جاتىر...

نۇراددين سادىقوۆتىڭ جەلىدەگى جازباسى

Abai.kz