ەكىپارتيالىق زاڭ جوباسى قىتايدا ۇيعىر، قازاق جانە وزگە دە مۇسىلمانداردىڭ قۋدالانۋىنا جاۋاپتى شەنەۋنىكتەرگە سانكتسيا سالۋدى قاراستىرادى. بۇعان قوسا، ادام قۇقىعىنىڭ بۇزىلۋىنا سەپتەسەتىن تاۋارلاردىڭ ەكسپورتتالۋىنا بىرقاتار شەكتەۋ قويادى.
"پەكيننىڭ ۇيعىر حالقىنا جاساپ وتىرعان ۆارۆارلىق ارەكەتىن الەم حالقىنىڭ ۇجىمدىق ار-نامىسىن قورلاۋ دەپ باعالاۋعا بولادى" دەدى وكىلدەر پالاتاسىنىڭ سپيكەرى نەنسي پەلوسي.
رەسپۋبليكاشىل-كونگرەسسمەن، قىتاي بويىنشا جۇمىس توبىنىڭ توراعاسى مايكل ماككول شىڭجاڭداعى جاعدايدى "مادەني گەنوتسيد" دەپ اتادى.
زاڭ جوباسىن زاڭ شىعارۋ ورگانىنىڭ 413 مۇشەسى قولداپ داۋىس بەرگەن، 1 ادام قارسى بولعان. ەندى قۇجات ترامپقا قول قويۋعا جىبەرىلەدى.
وسى اپتا باسىندا اقش پرەزيدەنتى دونالد ترامپ قۇجاتتى "وتە مۇقيات قارايتىنىن" مالىمدەگەن. ۆاشينگتون پەكيننىڭ گونكونگ ەركىندىگىن شەكتەۋ جوسپارىنا بايلانىستى شارا قولدانۋدى دا قاراستىرىپ وتىر.
قىتاي شىڭجاڭدا لاگەرلەر اشىپ، وعان ۇيعىرلار، قازاقتار جانە باسقا دا مۇسىلمانداردى قاماپ جاتقانى جايلى اقپارات 2017 جىلى تاراي باستاعان. پەكين باسىندا لاگەرلەردىڭ بارىن جوققا شىعارىپ، كەيىن بۇل جەرلەردى "تەرروريزم مەن ەكسترەميزممەن كۇرەسەتىن جانە كاسىپ ۇيرەتەتىن ورتالىق" دەپ سيپاتتاعان. 2018 جىلى بۇۇ "شىڭجاڭداعى لاگەرلەردە ءبىر ميلليونعا جۋىق ۇيعىر، قازاق جانە باسقا دا مۇسىلمان وتىر" دەپ مالىمدەگەن. قىتاي "ىشكى ىسىنە ارالاسقان" اقش-تىڭ كەز كەلگەن ارەكەتىنە جاۋاپ بەرەتىنىن ايتقان.
Abai.kz
