سارسەنبى, 8 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
46 - ءسوز 1400 4 پىكىر 1 ماۋسىم, 2020 ساعات 16:50

بالىق جادى قوعامبىز با؟

ءسىز بالىق جايلى ويلانىپ كوردىڭىز بە؟ جالپى بالىقتى جەگەننەن باسقا، ول جايلى نە اقپارات بىلەمىز؟ بالىقتىڭ ميعا پايداسى بارىن جاقسى بىلەمىز، بىراق بالىقتىڭ ميى جايلى شە؟ قىزىقتىڭ كوكەسى سوندا. بالىقتىڭ ەستە ساقتاۋ قابىلەتى بار بولعانى 8 سەكۋند. 8 سەكۋند جارق ەتكەننەن كەيىن، ول ءۇشىن اقپارات جويىلىپ، ءومىر قايتا باستالادى. سوندىقتان دا ول ءبىر تۇسكەن قارماعىنا قايتا اينالىپ ءتۇسىپ قالۋى مۇمكىن.

ەە، ءبىز شە؟ ءبىزدىڭ جادىمىز قانداي؟ ەستە ساقتاۋىمىزدى ايتامىن؟ سايتتار سۇمدىق گەنوتسيد جايلى جازىپ جاتىر، الەۋمەتتىك جەلى اقپاراتتارعا تولىپ كەتتى. بىراق ەرتەڭ جاڭا كۇن تۋادى. ءسويتىپ ءبىز 364 كۇنگە بۇل گەنوتسيد جايلى جىلى جاۋىپ قويا تۇرامىز. جىلداعى ستسەناري.

كۇن سايىن قايعىعا بات دەمەيمىن. كۇن سايىن ازا تۇتۋ دا اقىماقتىق. بىراق بۇل زۇلمات تەك مامىردا ايتىلىپ، 11 اي بويى جابۋلى قازاننىڭ كەيپىندە جاتپاۋى كەرەك قوي. قوعامعا ايتىلىپ، ەسىنە سالىپ تۇرۋ ابزال. يدەولوگيا دەگەن سودان باستالادى. ادامنىڭ جادىنا اقپاراتتى ءسىڭىرىپ تاستاۋدىڭ باستى جولى، ونى قايتالاي بەرۋ. كۇنى-ءتۇنى.

ارنايى يدەولوگيالىق باعدارلامالار مەن ورتالىقتار بار. ىشكى ساياسات بولىمدەرى دەگەندەي. سولار تەك ارناۋلى داتالاردا قولعا گۇل، جۇرەك تۇسىنا لەنتا جابىستىرىپ، قاباقتان قار جاۋىپ، ەسكەرتكىشكە بارۋمەن شەكتەلمەي، اي سايىن ارنايى روليكتەر جاساپ، ماقالالار بەرىپ تۇرسا، قوعام ساناسى اقپاراتتى قابىلداي بەرەدى. بىرتىندەپ سىڭەدى. مي ءوزى سونداي دۇنيە. كوزدەن كەتسە، كوڭىلدەن كەتەدى. بۇل ءسوز تەك ادامعا قاتىستى ەمەس، اقپاراتقا دا قاتىسى بار. ەگەر ءبىز راسىمەن دەكوممۋنيزاتسيانى باستان وتكىزگىمىز كەلسە، وندا جۇيەلى جۇمىس بولۋ كەرەك.

ءتۇسىنىڭىز. لەنين مەن ءستاليننىڭ ەسكەرتكىشىن قۇلاتىپ تاستاۋ وڭاي، بىراق ولاردى كەي كەڭەستىك ادامنىڭ ميىنان شىعارىپ تاستاۋ قيىن. اشارشىلىق پەن ساياسي قۋدالاۋ جايلى ايتۋ وڭاي، بىراق ونى كەي كەڭەستىك ادامعا "گەنوتسيد" ەكەنىن ءتۇسىندىرۋ قيىن. ول ءۇشىن جۇيەلى جۇمىس، ۇزدىكسىز اقپارات كەرەك. ولاي بولماسا، ءبىز بالىق جادى كۇيىمىزدە جۇرە بەرەمىز. قازىر ەستە بار، ال ەرتەڭ جوق.

اسحات قاسەنعاليدىڭ الەۋمەتتىك جەلىدەگى جازباسىنان

Abai.kz

4 پىكىر