"نۇر وتان" پارتياسى پرايمەريزىنىڭ ءبىر كەمشىلىگى بار. داۋىستى تەك پارتيا مۇشەلەرى بەرەدى. حالىق داۋىس بەرە المايدى. دەمەك وزگە پارتيالاردا بيلىك پارتياسىنان ءبىر قادام كەش قيمىلداي وتىرىپ "نۇر وتاننان" اسقان جاڭاشىلدىق ۇسىنۋى ءتيىس.

الداعى ۋاقىتتا باسقا پارتيالار دا پرايمەريزدى باستاۋى قاجەت. تەك ءبىر ەرەكشەلىكپەن. پرايمەريز ونلاين ءوتسىن ءارى داۋىستى تىكەلەي ەفيردە حالىق بەرسىن. بۇل قوعامدا ءبىراز بەلسەندىلىكتى وياتادى. ەل داۋىس بەرۋ تىكەلەي ەفيردە وتكەن، حالىقتىڭ ءوزى داۋسىن بەرگەن پرايمەريزدى كوپ جاقتايدى ما، الدە تەك پارتيا مۇشەلەرى داۋىس بەرەتىن پرايمەريزدى كوپ ايتادى ما؟ جاۋابى قازىردەن بەلگىلى دەپ ويلايمىن.

ەكىنشىدەن، ءاربىر پارتيا ءوز ستۋدياسىندا ونلاين اشىق پىكىرتالاس وتكىزىپ، وعان بيلىك پارتياسى وكىلدەرىن شاقىرۋى ءتيىس. تىكەلەي ەفيردە، قوعامنىڭ داۋىس بەرۋىمەن كىمنىڭ جەڭگەنى انىقتالۋى قاجەت. دۇرىس ۇيىمداستىرا السا بۇل دەبات وتە قىزىق فورماتتا وتەرى ءسوزسىز.

جالپى سايلاۋ قىزىقتى ءوتۋى ءۇشىن وزگە پارتيالار "نۇر وتاننىڭ" قادامىن كۇتىپ، ولار ءبىر قادام جاساعاندا، ارتىنشا ولاردان ەكى ەسە مىقتى ساياسي تەحنولوگيا ۇسىنۋى كەرەك.

ءدال قازىر "نۇر وتان" جيناقى ءارى ساۋاتتى قيمىلداۋدا. بۇلاي كەتە بەرسە سايلاۋ دا قىزىقسىز وتەدى. "اق جول" نەگە ءۇنسىز؟ "اۋىل" پارتياسى شە؟ ولاردان نەگە بيلىك پارتياسىنىڭ پرايمەريزىنە قارسى ساياسي تەحنولوگيا جوق؟ نەگە بيلىك پارتياسىنىڭ العاشقى جۇرىسىنە جاۋاپسىز جاتىر؟ حالىق مۇنى تالاپ ەتۋى قاجەت. بۇرىنعىداي 30 جىلعى سۇرلەۋمەن سايلاۋدى بىرسىدىرعى وتكىزۋگە بولمايدى. وركەنيەتتى ەلدەردە سايلاۋعا 2-3 جىل بۇرىن دايىندىقتى باستايدى. بىزدىكى ۇيات ءتىپتى. ەگەر وزگە پارتيالار الداعى ۋاقىتتا دا ءۇنسىز جاتا بەرسە قوعام جان-جاقتى قامشىنىڭ استىنا الۋى ءتيىس. باسقا تاڭداۋ جوق. قالاساڭ دا، قالاماساڭ دا قولداعى بار پارتيالار شىعادى سايلاۋعا. دەمەك، قولداعى بارمەن بۇل سايلاۋدىڭ بارىسىن، ويىن ەرەجەسىن ازاماتتىق قوعام ءوز ىڭعايىنا بۇرىپ، ماكسيمۋم حالىقتىڭ ساياسي مادەنيەتى كوتەرىلەتىن جولعا ءتۇسىرۋى قاجەت.

باۋىرجان سەرىكبايدىڭ الەۋمەتتىك جەلىدەگى جازباسى

Abai.kz