بۇگىن قاسىم-جومارت كەمەلۇلى توقاەۆتىڭ پرەزيدەنت بولىپ سايلانعانىنا تولىق ءبىر جىل تولدى. شيرەك عاسىردان استام ۋاقىت ەلىمىزدەگى ءنومىرى ءبىرىنشى بيلىكتى ەگەلەنگەن نۇرسۇلتان ءابىشۇلى ءوز ەركىمەن مەملەكەت باسشىسى قىزمەتىنەن بوساپ، ورىنىن توقاەۆقا ۇسىنعاندا سكەپتيكتەر بۇل اۋىس-تۇيىسكە ادەتتەگىدەي سەنبەدى. ولار: "توقاەۆ - بيلىككە ۋاقىتشا كەلگەن ادام. بۇل ادام - ترانزيتتىك تۇلعا، از ۋاقىتتان سوڭ ورىنتاعىن اۋلەت مۇشەلەرىنىڭ بىرىنە تاستاپ كەتەدى", - دەستى. ءتىپتى توقاەۆتىڭ پرەزيدەنتتىك قىزمەتتى دۇرىس اتقارا الاتىندىعىنا كۇماندانعاندار دا تابىلدى.

الايدا، قاسكەڭ ءوزىنىڭ مەملەكەتشىل تۇلعا ەكەندىگىن، ەلىنە جان-تانىمەن قىزمەت ەتۋگە تاۋەكەلى جەتەتىن ادام ەكەندىگىن ءار ىسىمەن كۇندەلىكتى دالەلدەۋگە كىرىسىپ كەتتى. ارينە، ءبىز الەۋمەتتىك احۋالىمىز كەنەتتەن جاقسارىپ، ەلىمىزدە ەشقانداي پروبلەما قالعان جوق دەپ ايتۋدان اۋلاقپىز، الايدا، كۇننەن كۇنگە توقاەۆقا دەگەن سەنىمىمىزدىڭ ارتىپ كەلە جاتقانى شىندىق. ول قاي-قاشاندا حالىق جاعىنان تابىلاتىنىن تانىتا تۇسۋدە. ارىس وقيعاسى كەزىندە دە، قوردايداعى كەلەڭسىز جاعدايدا دا، مىنا بۇگىنگى پاندەميا دۇربەلەڭىندە دە توقاەۆ حالىق تاعدىرىنا قاتتى كوڭىل ءبولدى. ءسويتىپ ءوزىنىڭ سابىرلى، سالماقتى قالپىنان اۋماي قيىندىقتاردى جەڭىپ كەلەدى.

قاسىم-جومارت كەمەلۇلى - كاسىبي ساياساتكەر. ونىڭ اۋزىنان شىققان سوزدە ۇلكەن ءمان بولادى. ماسەلەن ول وتكەندە رەسەيدەن شىعاتىن "كومسومولسكايا پراۆدا" گازەتىنە سۇحبات بەرىپ وتىرىپ، بىزدە ورىستاردىڭ 3 ميلليونعا جەتەر جەتپەس بوپ قالعانىن ايتىپ قالدى. بۇل دەگەنىڭىز - ورىس بىزدە از ساندى دياسپوراعا اينالدى دەگەن ءسوز. بۇل جانە ەلىمىزدە ەندى باتىل تۇردە ۇلتتىق ساياسات جۇرگىزىلەدى دەگەن ءسوز.

توقاەۆ - ساياساتتا نازارباەۆتىڭ مۇراگەرى، شىن مۇراگەرى. ونىڭ ساياسات پەن ەكونوميكاداعى شەشىمدەرىنەن نازارباەۆ ءىسىن جالعاستىرا وتىرىپ، ىلگەرلەتۋ بار ەكەنىن بايقايمىز.

پرەزيدەنتتى دە، ۇكىمەتتەگى كەز كەلگەن شەنەۋنىكتى تە سىنعا الىپ وتىراتىن بىزدە سەرگەك ورتا، وتانشىل ازاماتتار بار. بىراق بۇگىن بيلىك باسىنا كەلگەنىنە جىل تولىپ جاتقاندىقتان قاسىم-جومارت كەمەلۇلىنىڭ ەسىمىنە جىلى ءسوزىمىزدى اياپ قالماي، جىلى لەبىز بىلدىرسەك ارتىق بولمايتىن شىعار. سولاي ەمەس پە، اعايىن؟

داۋرەن قۋات

Abai.kz