نۇر-سۇلتاندا «COVID-19 كەزەڭىندە مەملەكەتتىك قىزمەت سالاسىنداعى ادام رەسۋرستارىن باسقارۋ: ۇزدىك تاجىريبەلەر مەن شەشىمدەر» تاقىرىبىندا حالىقارالىق ونلاين كونفەرەنتسيا ءوتتى.

ونلاين كونفەرەنتسيا بارىسىندا پاندەميا كەزىندە تۋىنداعان مەملەكەتتىك قىزمەتتەگى ادام رەسۋرستارىن باسقارۋ سالاسىنداعى پروبلەمالار جانە ولاردى شەشۋ ءۇشىن قابىلدانعان شارالار تالقىلاندى.

ءىس-شارانى قر مەملەكەتتىك قىزمەت ىستەرى اگەنتتىگى، استانا مەملەكەتتىك قىزمەت حابى جانە كورەيا رەسپۋبليكاسىنىڭ پەرسونالدى باسقارۋ جونىندەگى مينيسترلىگى ۇيىمداستىردى.

ونلاين كونفەرەنتسياعا مەملەكەتتىك ورگانداردىڭ، حالىقارالىق ۇيىمداردىڭ، ءبىلىم بەرۋ سالاسىنىڭ، ۇەۇ وكىلدەرى جانە ت.ب قاتىستى.

قر مەملەكەتتىك قىزمەت ىستەرى اگەنتتىگىنىڭ باسشىسى انار جايلعانوۆا ءوزىنىڭ العى سوزىندە قاتىسۋشىلارعا كونفەرەنتسيانى بىرلەسىپ ۇيىمداستىرعانى ءۇشىن العىسىن ءبىلدىرىپ، پاندەميا كەزىندەگى مەملەكەتتىك اپپاراتتىڭ جۇمىسىنا توقتالىپ ءوتتى.

«COVID-19 پاندەمياسى بۇكىل الەم ۇكىمەتتەرىنىڭ الدىندا تۇرعان ەڭ ماڭىزدى ماسەلەلەردىڭ ءبىرى. بىراق ول باسقارۋ رەفورمالارىن جۇزەگە اسىرۋعا، مەملەكەتتىك اپپاراتتى كەڭ كولەمدە تسيفرلاندىرۋعا جانە مەملەكەتتىك قىزمەتتىڭ ادام رەسۋرستارىن باسقارۋ جۇيەسىن قايتا قاراۋعا ىقپال ەتەتىن مەملەكەتتىك اپپارات جۇمىسىنىڭ قايتىمسىز وزگەرۋىنىڭ كاتاليزاتورىنا اينالدى»، - دەدى انار جايلعانوۆا.

ا.جايلعانوۆانىڭ ايتۋىنشا، مەملەكەت باسشىسىنىڭ تاپسىرماسىن ورىنداۋ ماقساتىندا وسى قيىن كەزەڭدە مەملەكەتتىك اپپاراتتىڭ ۇزدىكسىز جۇمىسىن قامتاماسىز ەتۋ بويىنشا اۋقىمدى جۇمىس جۇرگىزىلدى.

«قازىرگى ۋاقىتتا تۇرعىنداردىڭ حقكو مەن مەملەكەتتىك قۇرىلىمدارعا بارماي-اق، قاجەتتى مەملەكەتتىك قىزمەت تۇرلەرىن الۋى ءۇشىن مەملەكەتتىك قىزمەتكەرلەر بارىنشا ۇيلەسىمدى جۇمىس ىستەۋلەرى كەرەك.

جالپى، مەملەكەتتىك اپپارات پاندەميادان تۋىنداعان داعدارىس كەزىندە قاتەرلەر مەن كەدەرگىلەردى جەدەل شەشۋ قابىلەتىن جانە تيىمدىلىگىن دالەلدەدى دەپ ەسەپتەيمىن», - دەدى  مقىا توراعاسى.

مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەتىنىڭ توراعاسى ءاليحان بايمەنوۆ پاندەميا كەزىندە ءتيىمدى باسقارۋدى جۇزەگە اسىرۋ ءۇشىن قوعامدىق سەنىمنىڭ ماڭىزى زور ەكەنىن اتاپ ءوتتى.

«الەمنىڭ بارلىق ۇيىمدارىندا ادام رەسۋرستارىن باسقارۋعا كوپ كوڭىل بولىنۋدە. بىراق ۇيىمدارعا دەگەن سەنىمدى نىعايتۋ ماڭىزدى اسپەكت بولىپ تابىلادى. پاندەميا كەزىندە جاسالعان جۇمىستى تالداۋ ناتيجەسىندە بيلىك تارماقتارى مەن قۇرىلىمدارى اراسىندا رەسۋرستاردى، مىندەتتەر مەن وكىلەتتىكتەردى قايتا ءبولۋ جۇزەگە اسىرىلاتىنى انىق. بۇل ۇدەرىستە كادر قىزمەتتەرىنە  باسىمدىق  بەرىلەتىنى ءسوزسىز»، – دەدى ءاليحان بايمەنوۆ.

كورەيا رەسپۋبليكاسىنىڭ پەرسونالدى باسقارۋ جونىندەگى ءمينيسترى سو چونگ حۆان مەملەكەتتىك قىزمەتتە ادام رەسۋرستارىن باسقارۋ سالاسىندا وسى ەلدە قابىلدانعان شارالار جايلى باياندادى. ونىڭ ايتۋىنشا، كورەيا رەسپۋبليكاسىندا COVID-19 جاعدايىندا شۇعىل ارەكەت ەتۋ بيۋروسى قۇرىلعان. اتالعان بيۋرو: جالپى باسقارۋ، قىزمەتكەرلەردى جالداۋ، قىزمەت كورسەتۋ، كادرلاردى دامىتۋ، شۇعىل جاعدايلاردا سىياقى بەرۋ سياقتى بەس باعىت بويىنشا جۇمىس ىستەيدى. كورەيادا مەملەكەتتىك قىزمەتكەرلەردىڭ دەنساۋلىعىنا ەرەكشە كوڭىل بولىنۋدە. وسى باعىتتا كونسۋلتاتسيالار بەرۋ ورتالىقتارى جۇمىس ىستەيدى،  ونلاين وقىتۋ، جەكە ساباقتار ۇيىمداستىرىلۋدا. سونداي-اق، ەپيدەميولوگتار مەن مەديتسينا قىزمەتكەرلەرىن  جۇمىسقا قابىلداۋ راسىمدەرى جەڭىلدەتىلگەن. بارلىق سالا وكىلدەرى يكەمدى جۇمىس كەستەسىنە كوشكەن.

كونفەرەنتسيا بارىسىندا قازاقستان رەسپۋبليكاسى مەملەكەتتىك قىزمەت ىستەرى اگەنتتىگى تاراپىنان قاشىقتىقتان جۇمىس جۇرگىزۋدىڭ ەگجەي-تەگجەيلى رەگلامەنتىن پىسىقتاۋ قاجەتتىلىگى اتاپ ءوتىلدى. اتاپ ايتقاندا جۇمىس ۋاقىتىن ەسەپكە الۋ تەتىكتەرىن جانە جۇمىستى ۇيىمداستىرۋ تاسىلدەرىن قايتا قاراۋ: كەڭەستەر، كەلىسسوزدەر، مەملەكەتتىك قىزمەتشىلەردى وقىتۋ، مەملەكەتتىك قىزمەتكە ىرىكتەۋ جۇرگىزۋ، ءىس قاعازدارىن جۇرگىزۋ جانە ت.ب ماسەلەلەرى قامتىلدى. اتالعان شارالار قابىلدانعان جاعدايدا عيماراتتاردى قامتاماسىز ەتۋ، جيھاز جانە كەڭسە تاۋارلارىن ساتىپ الۋ، كوممۋنالدىق شىعىنداردى تولەۋ، تەلەفون بايلانىسى سياقتى شىعىنداردى وڭتايلاندىرۋدان بولەك، جۇمىس ۋاقىتىن ايتارلىقتاي ۇنەمدەۋ مۇمكىن بولادى. 

سونداي-اق، ونلاين كونفەرەنتسيا بارىسىندا ۋكراينا، وزبەكستان، ەىدۇ ۇيىمدارىنىڭ ساراپشىلارى ءسوز سويلەدى. ونلاين كونفەرەنتسياعا قاتىسۋشىلار مەملەكەتتىك قىزمەتتەگى ادام رەسۋرستارىن باسقارۋ سالاسىنداعى وزەكتى ماسەلەلەردى تالقىلاپ، تاجىريبەلەرىمەن الماستى.

Abai.kz