فەيسبۋكتە “پرايمەريز –– دەموكراتيانىڭ نىشانى، ەلدى وزگەرتۋدىڭ مۇمكىندىگى” دەگەن سارىنداعى “باقىتقا ۇمتىلۋشى ادامداردىڭ” پوستتارى كۇن ساناپ كوبەيىپ بارادى. ول پروپاگاندا كەيبىر كىسىلەرگە ءوتىپ كەتىپ، ولار ەرنار ايدار ستيلىندە ء”مان بەرمەي” كەيىن سانىن سوعىپ، “الدانىپ” قالماس ءۇشىن مىنا 5 سۇراقتى ءوز-وزىنە قويۋى كەرەك دەي ويلايمىن.

1. قر كونستيتۋتسياسى بويىنشا ءاربىر ازاماتتىڭ سايلاۋ جانە سايلانۋ قۇقىعى بار. سايلاۋ جانە ساياسي پارتيالار تۋرالى زاڭدار بويىنشا، ءماسليحاتتان باستاپ قر پرەزيدەنتى سايلاۋىنا دەيىن تەك رەجيمنىڭ “باتاسىن” العان پارتيانىڭ/قوعامدىق ۇيىمنىڭ مۇشەسى عانا قاتىسا الادى. بۇل –– cاياسي قۇلدىق. ساياسي قۇلدىقتى زاڭداستىرعاندار — پارلامەنتتى باقىلاۋدا ۇستاپ وتىرعان نۇر وتاننىڭ جانە ءوزىن “پارلامەنتتىك وپپيك” سانايتىن اق جول مەن كنپك دەپۋتاتتارى، ول زاڭدارعا قول قويعان ن.نازارباەۆ پەن ق.توقاەۆ سەكىلدى نۇروتاندىق پرەزيدەنتتەر. ولاي بولسا، نەگە ءوز قۇقىعىمدى شەكتەۋگە سانالى تۇردە كەلىسىپ، كونستيتۋتسياعا پىسقىرمايتىن، قازاقستاندىقتاردىڭ ساياسي قۇقىقتارىن سىيلامايتىن نۇر وتاننىڭ پرايمەريزىنە قاتىسۋىم كەرەك؟

2. نۇر وتان ەلدەگى بيلىكتىڭ ءۇش تارماعىن دا تولىق باقىلاپ وتىر. مەملەكەتتىك جانە جەرگىلىكتى ورگانداردىڭ ءبارىن ەشقانداي ساياسي باسەكەسىز 100% باسقارىپ وتىر. سونىڭ وزىندە قازاقستاننىڭ دامىپ كەتكەنى شامالى. “وپپوزيتسيا ساياسات ويناپ، جۇمىس ىستەۋگە كەدەرگى كەلتىرىپ وتىر” نەمەسە “بەيبىت ميتينگىشىلەر كۇنىگە كابينەتىمىزدىڭ الدىندا شۋلاپ جۇمىس جاساتپايدى” دەپ ەش ايتا المايدى. ولاي بولسا، نەگە مەن بيلىگى ءتيىمسىز باسقارۋ مەن رەگرەسستىڭ سينونيمىنە اينالعان پارتيانىڭ اتىنان “سايلاۋعا” ءتۇسۋىم كەرەك؟

3. باعلان مايلىباەۆ سەكىلدى مۇشەسى مەملەكەتتىك قۇپيانى شەت ەلگە ساتىپ سوتتالعان، كەيىن كوپ ۇزاماي بوساپ شىققان، ياعني مۇشەلەرى “مەملەكەتشىل” بولايىق دەپ اۋزى كوپىرەتىن، بىراق زاڭ ۇستەمدىگىن ورناتۋدى كوزدەمەيتىن پارتيانىڭ پرايمەريزىنە نەگە قاتىسۋىم كەرەك؟

4. ارىستاعى جارىلىستان جاپا شەككەندەرگە كومەك بەرۋگە ارنالعان فوندتان 80 ملن تەڭگە جىمقىرعانى ءۇشىن ۇستالعان قىزىلوردا وبلىسىنىڭ ەكس-اكىمى ق.ىسقاقوۆ سەكىلدى مۇشەسى بار پارتيانىڭ پرايمەريزىنە قاتىسۋ ارقىلى نە ءۇشىن ءوزىمنىڭ رەپۋتاتسيامدى بىلعاۋىم كەرەك؟

5. قر ازاماتى النۋر يلياشەۆ نۇر وتاندى فەيسبۋكتە سىناعانى ءۇشىن تۇرمەگە قامالۋى مۇمكىن. ءسوز بوستاندىعىن مۇلدەم قۇرمەتتەمەيتىن، سىن كوتەرە المايتىن پارتيانىڭ پرايمەريزىنە مەن نە ءۇشىن قاتىسۋىم كەرەك؟

P.S. وسى كۇنگە دەيىن ماعان ەكى كىسى حابارلاسىپ، نۇروتاندىق شەندىلەردەن پرايمەريزگە شاقىرۋ العانىن ايتىپ، ويىمدى سۇرادى. ەكەۋىنە دە “پرايمەريزگە قاتىسۋعا كەتەتىن ۋاقىتتى وزگە پايدالى دۇنيەگە جۇمساعان دۇرىس بولار” دەپ وزىمشە كەڭەسىمدى بەردىم. ەكەۋىنىڭ قانداي شەشىم قابىلداعانىن ۋاقىت كورسەتەدى. ءالى شەشىم قابىلداي قويماسا، جوعارىداعى بەس سۇراقتىڭ ول ەكى كىسىگە دە پايداسى ءتيىپ قالار دەپ ۇمىتتەنەمىن.

شالقار نۇرسەيىتوۆتىڭ الەۋمەتتىك جەلىدەگى جازباسى

Abai.kz