تاريحشى مارك ءسولونيننىڭ رەسەي بيلىگىنە قاتىستى «سەنبە، قورىقپا، جالىنبا» (نە ۆەر، نە بويسيا، نە پروسي!) دەگەن قاعيداسى بار. ياعني «بيلىك نە ايتسا دا اشىقتان اشىق مۇلدەم سەنۋشى بولماڭدار!» دەگەنى. كوروناۆيرۋسقا بايلانىستى قازاقستانداعى اقپاراتتىق جاعداي دا تاپ وسىعان ۇقساس كۇدىگىمىزدى ۇلعايتىپ بارادى.

پاندەميا ءبىزدىڭ ەلىمىزدە تەك ىندەت قانا ەمەس، ول ساياسي ويىن قۇرالىنا اينالعان ۇقسايدى. ويتكەنى تۇسىنىكسىز جايتتار كوبەيدى. بيلىك ۇستىمىزدەگى جىلعى 12-16 ناۋرىزدا «ناكونەتس تو» كورونوۆيرۋس بىزگە جەتەدى دەپ ساۋەگەيلىك ءبىلدىرىپ ەدى، ءۇش ايدان بەرى ۆيرۋس جۇقتىرعاندار سانى اسپانداپ كەتە باردى.

19 ماۋسىم كۇنگى كەشكى 21.00-دە قازاقستاندا كوروناۆيرۋس جۇقتىرعاندار سانى 16351 بولىپتى. جازىلىپ شىققانى 10195 دەيدى. 105 ادام قايتىس بولعان. ەل اراسىندا «ءۇش ءجۇز مىڭ تەڭگەگە كورونۆيرۋس دياگنوزىمەن اۋرۋحاناعا جاتىپ شىعۋعا ۇسىنىس جاسالىپتى-مىس»، «ءوز اۋرۋىمەن قايتىس بولعان ادامدى تۋىستارىنان كورونۆيرۋستان قايتىس بولدى دەپ جازۋعا رۇقسات سۇراپتى-مىس» دەگەن وسەك جەلدەي ەسىپ تۇر. تەستىلەۋگە قاتىستى ماسەلە دە كوپ سۇراقتى وربىتەدى. وسىنداي تۇسىنىكسىز جايتتارعا تۇبەگەيلى جاۋاپ بەرىپ جاتقان ەشكىم جوق. سودان سەنىم جەل سوققان بۇلتتاي جۇلمالانىپ بارادى.

كەيىنگى كەزدە كوپ ادامدار پاندەميانى جوققا شىعارىپ سەنبەيتىندىگىن ايتا باستاپ ەدى، ۆيرۋس جۇقتىرعان رەسمي شەنەۋنىكتەر اتى-ءجونى قارشا بورادى. بۇرىن ەشكىمنىڭ اتىن اتاۋعا رۇقسات ەتىلمەيتىن. ەندى قاراڭىز، بەرىك ءۋالي، بەكبولات تىلەۋحان، ەلجان ءبىرتانوۆ، ەرالى توعجانوۆ، ول از بولعانداي مىنە، نۇرسۇلتان نازارباەۆ، ت.ب.

ۇستىنەن شىبىن ۇشىرىلمايتىن ادامدارعا ۆيرۋس قالاي جۇققان؟ كىمنەن جۇقتىرىلعان؟ كونتاكتىنىڭ ءبارى كونترولدا ەمەس پە؟ بۇعان كىمدەر جاۋاپتى؟ اينالاسىنداعىلار دا وقشاۋلاندى ما؟ ءبارى قۇپيا! تۇسىنىكسىز ءبىر ويىن ءجۇرىپ جاتقان سياقتى. ەندى، مىنە، پرەمەر-مينيستر اسقار ءماميننىڭ توراعالىعىمەن وتكەن ەل اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسىندا استانا، الماتى، قاراعاندى، شىمكەنت، پاۆلودار جانە ەكىباستۇز سياقتى 6 قالادا الداعى دەمالىس كۇندەرى شەكتەۋ شارالارى كۇشەيتىلەتىنى حابارلاندى. سوندا بۇل تەك سەنبى، جەكسەنبىگە قاراپ قالعان نە دەگەن «اقىلدى ۆيرۋس»؟ جەل مە، بوران با؟

دۇيسەنبىدەن باستاپ كوپ شارۋا قايتا قالپىنا تۇسەدى دەيدى. بالانىڭ ويىنى ما دەرسىڭ. ونسىز دا حالىقتىڭ بيلىككە سەنىمىنە سەلكەۋ تۇسكەلى قاشان؟ سەنىمدى ۇيالاتاتىن تەك اقيقات قانا. سوندىقتان بيلىك ءوز بەدەلىن ءوزى ءوستىپ ويىنشىققا اينالدىرماي اقىلعا قونىمدى ارەكەتتەر جاساعانى ءجون ەمەس پە؟

مارات ءبايدىلداۇلىنىڭ الەۋمەتتىك جەلىدەگى جازباسى

Abai.kz