مەملەكەتتىك ءا.قاستەەۆ اتىنداعى ونەر مۇراجايىنىڭ ماڭىنا ۇلى ابايدىڭ ەسكەرتكىشى قويىلىپتى. وكىنىشتىسى، قيسىق تۇعىردان باسى عانا قىلتيعان ءمۇسىن كوپ كوڭىلىنەن شىقپاعان سەكىلدى. اسىرەسە الەۋمەتتىك جەلىدەگى جۇرتشىلىق ۇلى اقىننىڭ قوراش بەينەسىنە قارسىلىق تانىتىپ جاتىر.

بىزگە جەتكەن اقپارات بويىنشا، بۇل «جاڭاشا ۇلگىدەگى» ەسكەرتكىشتىڭ اۆتورى ش. تولەش دەگەن شەبەر ەكەن. ەلگە بەلگىلى ءمۇسىنشى ابايدى مىناداي بەينەدە مۇسىندەۋ ويىنا قالاي كەلگەنىنە تاڭدانباسقا امال جوق. ۇلى اقىندى سايقىمازاق بەينەدە كورسەتۋ قالاي ايتساڭىز دا اقىلعا قونبايتىنى ءسوزسىز.

مەملەكەتتىك ونەر مۇراجايىنىڭ ديرەكتورى گۇلميرا كەنجەبولاتقىزى شالاباەۆا حانىم ەكەن. اكەسى سوعىس ارداگەرى، قوعام قايراتكەرى، قازاقستان كپ وك-ندە تەلەديدار جانە راديو حابارلارىن تاراتۋ مەملەكەتتىك كوميتەتىنىڭ توراعاسى بولعان كەنجەبولات نۇرتازاۇلى شالاباەۆ ەكەن.

ءبىز جاڭاعى مۇراجاي ديرەكتورىنىڭ ورىنباسارى كوبجانوۆا سۆەتلانا جۇماسۇلتانقىزىنا حابارلاسىپ، ءمان-جايدى بىلۋگە تىرىسقان ەدىك. ءبىرىنشى حابارلاسقانىمىزدا قولى بوس ەمەس ەكەنىن ايتىپ، كەيىن سويلەسسەك دەدى. بىراق ەكىنشى قايتارا حابارلاسىپ، تەلەفونىن الا المادىق.

بيىل ابايدىڭ 175 جىلدىق مەرەيتويىن تويلاپ جاتىرمىز. ابايدى ۇلىقتاۋدىڭ جالعىز جولى جينالىس وتكىزىپ، ەسكەرتكىش ءمۇسىن ورناتۋ دەپ تۇسىنەتىن كەي شەندى جىل باسىنان بەرى تويعا بولىنگەن قارجىنى يگەرۋدىڭ قامىندا ءجۇر...

ابايدىڭ ۇسقىنسىز ەسكەركىشى الماتىدا عانا ەمەس، جەزقازعاندا دا بوي كوتەرىپتى. جەزقازعان قالاسىنداعى اباي مەن سارىارقا كوشەسىنىڭ قيىلىسىنا قويىلعان اباي ءمۇسىنى دە الەۋمەتتىك جەلىدە كوپشىلىكتىڭ نارازىلىعىن تۋدىردى. قالا اكىمدىگىنىڭ حابارلاۋىنشا, بۇل ءمۇسىندى الىپ تاستاۋ تۋرالى شەشىم قابىلدانىپتى. ەندى ۇلى اقىننىڭ ەڭسەلى ەسكەرتكىشى بيىل جىل سوڭىندا قايتادان بوي كوتەرەدى ەكەن.

دەمەك، ءبىر رەتتە ورىندالۋى ءتيىس جۇمىستى ەكى رەت ىستەدى دەگەن ءسوز. ءبىزدىڭ شەندىلەر كەز-كەلگەن جۇمىستى قولعا الاردا جەتى رەت ولشەپ، ءبىر رەت كەسۋ كەرەكتىگىن قاشان تۇسىنەر ەكەن. جۇمىستى ساۋساقتىڭ ۇشىمەن ىستەيدى، داۋ تۋدىرىپ، قوعامنىڭ تالقىسىنا قالعان سوڭ، تىراشتانىپ قايتا دۇرىستاعان بولادى.

ايتا بەرسەك، مۇنداي شالاعاي شارۋالار ءبىزدىڭ شەنەۋنىكتەردە شاش-ەتەكتەن. ساۋاتسىز جۇمىس ىستەيدى، سىن ەستىگەن سوڭ تۇزەگەن بولادى. ەكى جۇمىس، ەكى شىعىن! مۇمكىن ولارعا وسى دا ءتيىمدى شىعار. قايتا-قايتا بولىنگەن قارجى قالتاعا جاقسى...

اباي تويىن تويلاۋدىڭ ءمانى - ەسەپتىك ءىس-شارا وتكىزىپ، قيسىق-قىڭىر ەسكەرتكىش ورناتۋ ەمەس. قايتا ەلگە پايداسى تيەتىن، ءبىر كۇندىك ەمەس، مىڭ جىلدىق شارالار وتكىزىلۋى كەرەك.

ونىڭ ۇستىنە ەسكەرتكىش قويعاننىڭ ءجونى وسى دەپ، سايقىمازاق-سۇرىقسىز دۇنيەلەردى قاپتاتا بەرۋدىڭ دە ءجونى جوق. حالىقتىڭ قارجىسىمەن جاسالعان جۇمىس، حالىقتىڭ كوڭىلىنەن شىققانى كەرەك. ايتپەسە، ءار اكىم، ءار ديرەكتور ءوز بىلگەنىنشە ابايدىڭ ءمۇسىنىن سالعىزا بەرسە، ۇلى اقىننىڭ نە قادىرى قالادى؟! ءسوز سوڭىندا ايتارىمىز، جەزقازعانداعى داۋ تۋدىرعان ءمۇسىن اقىرى الىنىپتى. ال شالاباەۆانىڭ «شالا» ابايىنىڭ تاعدىرى نە بولماق؟

قوسىمشا. ءبىزدىڭ ماتەريال جاريالانعاننان كەيىن الەۋمەتتىك جەلىدەگى داۋعا قاتىستى مۇراجايدىڭ رەسمي جاۋابى arasha.kz سايتىندا جارىق كوردى. وندا مۇراجاي اكىمشىلىگى مۇسىندە اباي قۇنانبايۇلى بەينەلەنبەگەنىن ايىپتى.

- شوقان تولەشتىڭ «ابىز اتا (مۋدرەتس)» ءمۇسىنى 2019 جىلى جاسالعان، گرانيت، بيىكتىگى 3,5 مەتر. ول 2019 جىلدىڭ 26 قاراشاسىندا اۆتوردىڭ جەكە كورمەسىنىڭ اياسىندا ءا. قاستەەۆ اتىنداعى قر مەملەكەتتىك ونەر مۋزەيىنىڭ ءمۇسىن ساياباعىنىڭ اۋماعىنا ورناتىلعان, - دەيدى مۇراجاي اكىمشىلىگى.

بىراق بۇل ءمۇسىننىڭ ۇلى ابايدىڭ بەينەسىنە قاتتى ۇقسايتىنى شىندىق. ونىڭ ۇستىنە ءدال اقىننىڭ 175 جىلدىق مەرەيتويى تۇسىندا جۇرت نازارىنا ءىلىنىپ وتىر. مۇراجاي اكىمشىلىگى مۇنىڭ ونەر تۋىندىسى ەكەنىن ايتىپ، وزىندىك «وقىلۋدى» تالاپ ەتەتىنىن العا تارتادى. بىراق ابايدىڭ ءمۇسىن بولسىن، «ابىز اتانىڭ» ءمۇسىنى بولسىن كوپشىلىك اراسىندا داۋ تۋدىرعانى راس.

قۋانىش قاپپاس

Abai.kz