سەنبى, 8 تامىز 2020
COVID-19 قازاقستاندا. جۇقتىرعاندار — 97829. جازىلعاندار — 71609. قايتىس بولعاندار — 1058
تالقى 1300 13 پىكىر 27 ماۋسىم, 2020 ساعات 14:55

ۇكىمەتتىڭ ۇسىنىسى: 10 تامىز - «اباي كۇنى»...

ۇكىمەت 10 تامىزدى «اباي كۇنى» دەپ بەلگىلەپ، رەسمي مەرەكەلەر قاتىرىنا ەنگىزبەك. بۇل تۋرالى رەسمي قۇجات «اشىق ۇكىمەت» پورتالىندا جاريالاندى.

پرەمەر-مينيستر اسقار ءماميننىڭ ارنايى قاۋلىسى قوعامدىق تالقىلاۋعا ۇسىنىلعان. قاۋلى ءماتىنى كەشە، 26 ماۋسىم كۇنى جاريالانعان. قوعامدىق تالقىلاۋ 13 شىلدەدە اياقتالادى دەپ كورسەتىلگەن.

«قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2017 جىلعى 31 قازانداعى № 689 قاۋلىسىنا تولىقتىرۋ ەنگىزۋ تۋرالى قۇجاتتا:

«قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى» قازاقستان رەسپۋبليكاسى ۇكىمەتىنىڭ 2017 جىلعى 31 قازانداعى  № 689 قاۋلىسىنا (قازاقستان رەسپۋبليكاسىنىڭ ءپۇاج-ى، 2017 ج.، № 53,  343-قۇجات) مىناداي تولىقتىرۋ ەنگىزىلسىن.

قازاقستان رەسپۋبليكاسىنداعى مەرەكەلىك كۇندەردىڭ تىزبەسى مىناداي مازمۇنداعى 22-1-تارماقپەن تولىقتىرىلسىن:

«22-1. اباي كۇنى – 10 تامىز»»، - دەپ جازىلعان.

ايتا كەتەيىك، بيىل اباي قۇنانبايۇلىنىڭ 175 جىلدىعى. ۇلى اقىننىڭ مەرەيتويىن ۇيىمداستىرۋ جونىندە ارنايى مەملەكەتتىك كوميسسيا قۇرىلعان. وعان مەملەكەتتىك حاتشى قىرىمبەك كوشەرباەۆ جەتەكشىلىك ەتەدى.

جوعارىداعى «اشىق ۇكىمەت» پورتالىندا «اباي كۇنىن» بەلگىلەۋ تۋرالى ۇكىمەت باسشىسىنىڭ قاۋلىسىمەن قاتار، قر مادەنيەت جانە سپورت ۆيتسە-ءمينيسترى نۇرعيسا داۋەشەۆتىڭ «سالىستىرمالى كەستەسى» دە جاريالانىپتى. وندا:

«جوبا «قازاقستان رەسپۋبليكاسىنداعى مەرەكەلەر تۋرالى» 2001 جىلعى 13 جەلتوقسانداعى قازاقستان رەسپۋبليكاسى زاڭىنىڭ 4-بابىنا جانە قازاقستان رەسپۋبليكاسىنىڭ مەملەكەتتىك حاتشىسى ق.ە. كوشەرباەۆتىڭ 2020 جىلعى  21 مامىرداعى № 20-1074-1 تاپسىرماسىن ورىنداۋ ءۇشىن ازىرلەندى»، - دەپ جازىلعان.

پرەزيدەنت پارمەن بەرىپ، بيىل اباي مەرەيتويى ەل اۋماعىندا اتالىپ وتىلەتىنىن جوعارىدا ايتتىق. قر مادەنيەت جانە سپورت مينيسترلىگى رەسپۋبليكا كولەمىندە ۇزىن-ىرعاسى 500-گە جۋىق ءىس-شارا ۇيىمداستىرىلاتىنىن ايتقان. ول ءۇشىن بيۋدجەتتەن قارجى قاراستىرىلىپ، قىرىمبەك كوشبەرباەۆ باسشىلىق ەتەتىن ارنايى كوميسسيا ءىس-شارالار جوسپارىن دا بەكىتكەن.

سودان كەيىن وڭىرلەردە ءبىرلى-جارىم مادەني ءىس-شارالار وتكىزىلە باستادى. ابايدىڭ ەسىمى كوشەلەر مەن مەكتەپتەرگە بەرىلدى. بۇل تۋرالى اقپاراتتاردى پورتالدا جاريالادىق. سولاردىڭ ىشىندە اۋىز تولتىرىپ ايتارى – سەمەي قالاسىنداعى اۋەجايعا اباي قۇنانبايۇلىنىڭ ەسىمى بەرىلدى. ودان بولەك، سەمەي وڭىرىنە وبلىس مارتەبەسىن قايتارۋ تۋرالى ۇسىنىستار دۇركىن-دۇركىن ايتىلىپ جاتتى. Abai.kz اقپاراتتىق پورتالىندا جاريالانعان سول ۇسىنىستاردىڭ ءبىرسىپىراسى مىنە:

1. تالعات تەمەنوۆ:

«سەمەي وبلىسىن قايتا اشسا نۇر ۇستىنە نۇر بولار ەدى»،

2. عابباس قابىشۇلى:

«ءيسى قازاقتىڭ رۋحاني بەسىگى – سەمەي وبلىسى قالپىنا كەلتىرىلسىن!»،

3. ورازالى سابدەن:

«اباي وبلىسىن قۇرۋ تۋرالى».

بۇل ۇسىنىستار قر پرەزيدەنتىنە، قر ۇكىمەتىنە قاتارا ايتىلعانىمەن، قازىرگە دەيىن اقوردا مەن استانا جاقتان رەسمي پىكىر ايتىلعان جوق. دەسە دە، كەشە ۇكىمەت باسشىسى قاۋلى شىعارىپ، «اباي كۇنىن» بەلگىلەۋدى ۇسىنىپتى. قوعامدىق تالقىعا سالىپتى. ەندەشە بىرگە تالقىلايىق...

Abai.kz

13 پىكىر