قاۋىپتى ۆيرۋس قاھارىنا ءمىنىپ، ىندەت جۇقتىرعاندار سانى كۇن سايىن، ءتىپتى ساعات سايىن كوبەيگەن ءدال قازىرگىدەي قيىن كەزەڭدە قازاقستان مەديتسيناسى مينيستر اۋىستىردى، وتكەندە. بۇرىنعى مينيستر ۆيرۋس جۇقتىرىپ، جۇمىسقا جاراماي قالعاندىقتان، ونىڭ ورنىنا الەكسەي تسوي دەيتىن ادام كەلدى، بىلەسىزدەر.

ءسويتىپ، كوروناۆيرۋستان اۋىر «نوكداۋن» العان دسم ەندى 4 اپتالىق «لوكداۋنعا» كوشەتىنىن ايتىپ جاتىر ەكەن. كەشە اقوردادا وتكەن جيىندا جاڭا مينيستر الەكسەي تسوي ەلدەگى كوروناۆيرۋستىق جاعدايعا قاتىستى 3 ءتۇرلى بولجام، 10 ءتۇرلى شارا جوسپارىن ۇسىنىپتى.  

تسويدىڭ ءۇش ستسەناري

ءبىرىنشى ستسەناري: كارانتين ەنگىزىلمەيدى. ەسەسىنە تامىز ايىنىڭ سوڭىنا قاراي كۇنىنە COVID-19 جۇقتىرعان 27 مىڭ ناۋقاس تىركەلەدى. ينفەكتسيالىق جانە پروۆيزورلىق ستاتسيونارلاردا 300 مىڭ ورىن قاجەت بولادى.

ەكىنشى ستسەناري: ەكى اپتالىق لوكداۋن ەنگىزۋ. بۇل جاعدايدا اۋرۋ جۇقتىرىپ، اۋرۋحانالارعا جاتقىزىلۋى ءتيىس ناۋقاستارى سانى كۇن سايىن 7 مىڭ ادامدى قۇرايتىن بولادى. ول ءۇشىن 80 مىڭ ورىن قاجەت.

ءۇشىنشى ستسەناري: 4 اپتالىق لوكداۋن. بۇل جاعدايدا تامىز ايىنىڭ سوڭىنا قاراي، 2500 ادام اۋرۋحاناعا جاتادى جانە قوسىمشا 30 مىڭ ادامعا ورىن قاجەت بولادى.

 «وسى ءۇشىنشى بولجامدى ەڭ ءتيىمدى دەپ ەسەپتەيمىن. ءبىز حالىق اراسىندا ۆيرۋستىڭ تارالۋىنا شەكتەۋ قويىپ، ينفراقۇرىلىمدى دايىنداپ ۇلگەرەمىز»، - دەدى مينيستر.

سونىمەن قاتار، دەنساۋلىق ساقتاۋ ءمينيسترى قر ۇكىمەتى قابىلداعان وسى شارالار كوروناۆيرۋستىڭ جاپپاي تارالۋىنىڭ الدىن الدى دەپ ەسەپتەيدى ەكەن. سونداي-اق، ول ءوزى دە ۆيرۋسپەن كۇرەسۋدىڭ حالىققا قاجەتتى 10 نەگىزگى شاراسىن اتاپتى.

تسوي ۇسىنعان 10 شارا

1. امبۋلاتورلىق دەڭگەيدە ينفەكتسيانى ەمدەۋدىڭ قاراپايىم جانە تۇسىنىكتى نۇسقاۋلىقتارىن ازىرلەۋ;

2. ءدارى-دارمەكتەردى جەتكىزۋ جانە ساتىپ الۋ پروتسەدۋرالارىن جەدەلدەتۋ، وتاندىق وندىرۋشىلەردى قولداۋ;

3. COVID-19 دياگنوستيكاسىندا تسيفرلىق رەنتگەن اپپاراتتارىن كومپيۋتەرلىك توموگرافيامەن بىرگە قولدانۋ ارقىلى دياگنوستيكانىڭ قول جەتىمدىلىگىن ارتتىرۋ;

4. سىناق زەرتحانالارىنىڭ مۇمكىندىكتەرىن كەڭەيتۋ، تەستتەردى ۋاقىتىندا جەتكىزۋ;

5. شاقىرتۋ كەزىندە ءموبيلدى توپتاردىڭ سىناق قورشاۋلارىن ۇيىمداستىرۋى;

6. ۇيدەگى ناۋقاستارعا ەڭ قاۋىپسىز مەديتسينالىق كومەك كورسەتۋ;

7. امبۋلاتورلىق دەڭگەيدە قاشىقتان كەڭەس بەرۋ;

8. اۋرۋحانالاردى جاساندى تىنىس بەرۋ اپپاراتىمەن جابدىقتاۋ;

9. جەرلەۋ ءتارتىبىن وزگەرتۋ;

10. ازاماتتارعا ەپيدەميولوگيالىق ەسكەرتۋدى ارتتىرۋ.

ال، اتالعان جيىندا پرەزيدەنت توقاەۆ بيىلعى ناۋرىز-مامىر ايلارىنداعىداي قاتاڭ كارانتين رەجيمىن قايتا ەنگىزۋگە تاپسىرما بەرگەن.

- قازىرگى ەپيدەميولوگيالىق احۋالدى تۇراقتاندىرۋ ءۇشىن شۇعىل شارالار قابىلداۋ ماقساتىندا مەملەكەتتىك كوميسسياعا ەكى كۇننىڭ ىشىندە بيىلعى ناۋرىز-مامىر ايلارىنداعىداي قاتاڭ كارانتين رەجيمىن ەنگىزۋ ماسەلەسى بويىنشا ماعان ۇسىنىس ازىرلەپ، ەنگىزۋدى تاپسىرامىن، – دەدى توقاەۆ.

ايتا كەتەيىك، بۇگىندە قازاقستاندا كوروناۆيرۋس جۇقتىرعاندار سانى 21 819-عا جەتتى. ال، قر باس مەملەكەتتىك سانيتارلىق دارىگەرى ايجان ەسماعامبەتوۆا 3 ماۋسىمنان باستاپ ناۋقاستاردى سيمپتومدى جانە سيمپتومسىز دەپ ەكىگە بولگەنىن ايتقان. ءبىر ايتا كەتەرلىگى ۆيرۋستىڭ سيمپتومسىز تۇرىمەن اۋىراتىندار رەسمي ستاتيستيكاعا كىرمەيدى. بۇگىندە سيمپتومسىز ناۋقاستاردىڭ سانى 17 642 ادام بولعان.

باس مەملەكەتتىك سانيتارلىق دارىگەر «ءۇش سيمپتومسىز ناۋقاستان تەك ءبىر ادامعا عانا ىندەت جۇعۋى مۇمكىن» ەكەنىن ايتادى.

نۇربيكە بەكسۇلتانقىزى

Abai.kz