الماتى قالاسىنىڭ باس سانيتار دارىگەرى جانداربەك بەكشين دە ۆيرۋس جۇقتىردى. بۇل تۋرالى بەكشيننىڭ ءوزى حابارلاپ ايتتى.

«مەن ناۋقاستانىپ قالدىم. بىراق ءوزىمدى جاقسى سەزىنەمىن. مەندە سيمپتومدارى جوق. بۇل – كوۆيد، بىراق، سيمپتومسىز ءتۇرى. مەن ءوز جۇمىسىمدى جالعاستىرا بەرەمىن، قاشىقتان ىستەيمىن. ويتكەنى، قازىر اۋىرىپ جاتاتىن ۋاقىت جوق»، - دەپتى.

جانداربەك بەكشين 20 ناۋرىزعا دەيىن قازاقستاننىڭ باس سانيتار دارىگەرى بولعان. كەيىن قىزمەتىنەن بوساتىلدى. ال ساۋىردە الماتى قالاسىنىڭ باس سانيتار دارىگەرى بولىپ تاعايىندالعان.

ەستەرىڭىزگە سالا كەتەيىك، بۇعان دەيىن الماتى قالاسىنىڭ دەنساۋلىق ساقتاۋ باسقارماسىنىڭ باسشىسى كامالجان نادىروۆ تا كوۆيد جۇقتىرىپ، جازىلىپ شىققان ەدى.

دەنساۋلىق ساقتاۋ مينيسترلىگىندە ۇزاق جىل جۇمىس ىستەگەن جانداربەك بەكشيننىڭ ەسىم-سويى ناۋرىزداعى «ناكونەتس-تو» دەگەن بولجامىنان كەيىن بەلگىلى بولا باستاعان. ول قازاقستاندا كوروناۆيرۋس 11-16 ناۋرىز ارالىعىندا تابىلۋى مۇمكىن دەپ بولجام ايتقان. بەكشيننىڭ بۇل ايتقاندارى الەۋمەتتىك جەلىدە قىزۋ تالقىلانىپ، ءتۇرلى كەكەسىن، كەلەمەجدەر پايدا بولعان.

الايدا بەكشيننىڭ بولجامى راس بولىپ شىقتى. قازاقستاندا العاشقى ۆيرۋس جۇقتىرۋ دەرەگى 13 ناۋرىزدا تىركەلدى. قازىر ەلىمىزدە ۆيرۋس جۇقتىرعاندار سانى 41 مىڭنان استى. 13 558 ادام جازىلىپ شىعىپ، 188 ادام قايتىس بولعان.

الگىندە عانا پرەزيدەنت توقاەۆ ىندەتتىڭ بەتىن قايتارۋ جۇمىستارىن پىسىقتاپ، كەڭەس وتكىزگەن. ەلدەگى ەپيدەميولوگيالىق احۋالدى ەسكەرە وتىرىپ، دەنساۋلىق ساقتاۋ ءمينيسترى الەكسەي تسويعا 2 كۇننىڭ ىشىندە قاتاڭ كارانتين رەجيمىن ەنگىزۋ تۋرالى جوسپار، ۇسىنىس دايىنداۋدى تاپسىرعان. كەشە مينيستر تسوي ىندەتتىڭ تەز تارالۋىن تەجەۋ ءۇشىن 3 ءتۇرلى ستسەناري مەن 10 ءتۇرلى شارا جوسپارىن ۇسىندى.

Abai.kz