تۇركىستان وبلىسىندا ورنالاسقان بايىرعى كونە قالالاردىڭ ءبىرى كەنتاۋ قالاسىندا قازاقتىڭ باس اقىنى اباي قۇنانبايۇلىنا ارنالعان ەسكەرتكىش ورناتىلدى. اتالعان ەسكەرتكىش ۇلى اقىننىڭ 175 جىلدىق مەرەيتويىنا ارنالىپ اشىلىپ وتىر. 

ابيدىڭ 175 جىلدىق مەرەيتويىنا ارنالعان ەسكەرتكىشتىڭ اشىلۋ سالتاناتىنا تۇركىستان وبلىسى اكىمىنىڭ ورىنباسارى ساكەن قالقامانوۆ قاتىستى. وبلىس اكىمىنىڭ ورىنباسارى كەنتاۋ قالاسىنىڭ تۇرعىندارىن ەلوردا كۇنىمەن جانە ۇلى اقىنعا ارنالعان ەسكەرتكىشتىڭ اشىلۋىمەن قۇتتىقتادى.

ونىڭ ايتۋىنشا، كەنتاۋ قالاسىندا اتاۋلى كۇنگە وراي بىرنەشە ەسكەرتكىش بوي كوتەرگەن. سولاردىڭ قاتارىندا اباي ەسكەرتكىشى دە اشىلىپ وتىر. بۇل ەسكەرتكىشتىڭ جاستارعا بەرەتىن تاربيەلىك ءمانى زور. جاستار ۇلى اقىننىڭ ولەڭدەرىن وقىپ، دانالىق تاعىلىمدارىن جاتتاپ وسەتىن بولادى.

«كەنتاۋ قالاسىندا ەلوردا كۇنىنە بايلانىستى بىرقاتار نىسان اشىلدى. سولاردىڭ ىشىندە ەرەكشە اتاپ وتەتىنى بيىل مەملەكەتتىك دەڭگەيدە مەرەيتويى اتالىپ جاتقان قازاقتىڭ ۇلى اقىنى، دانىشپانى ابايعا ارنالعان ەسكەرتىكش بولىپ وتىر. 

اباي ەسكەرتكىشىنىڭ كەنتاۋ تۇرىندارىنا، جاستارعا بەرەتىن تاربيەلىك ءمانى زور. مۇندا قازىر قالا جاستارى ابايدىڭ قارا سوزدەرى مەن ولەڭدەرىن وقيتىن بولادى. 

قالامىزدا اشىلعان بۇل جاڭا نىسان ەل يگىلىگىنە اينالسىن! بارلىقتارىڭىزدى ەلوردامىز نۇر-سۇلتان قالاسى كۇنىمەن قۇتتىقتايمىن!»، - دەدى وبلىس اكىمىنىڭ ورىنباسارى.

سونىمەن قاتار اتالعان ەسكەرتكىشتىڭ اشىلۋ سالتاناتىنا وزگە دە بىرقاتار اتقامىنەرلەر ارنايى كەلىپ قاتىستى. ولاردىڭ اراسىندا كەنتاۋ قالاسىنىڭ اكىمى داۋرەن ماقاجانوۆ دا بار. ودان بولەك كەنتاۋ قالالىق اقساقالدار مەن زيالى قاۋىم وكىلدەرى دە سالتاناتتى شارعا كەلىپ قاتىسىپ، اشىلىپ جاتقان ەسكەرتكىشتىڭ ماڭىزى مەن قاجەتىلىن ءتۇسىندىرىپ بەردى. ەل اعالارىنىڭ كەلەلى كەڭەسىنەن كەيىن ورتاعا جاس اقىندار شىقتى. ولار حالىقتىڭ باس اقىنى ابايدىڭ ولەڭدەرىن جاتقا وقىدى. سونداي-اق وزدەرىنىڭ ۇلى اقىنعا ارناعان جالىندى جىرلارىن جۇرت نازارىنا ۇسىندى.

ايتا كەتەيىك، ۇلى اقىنعا ارنالعان ەڭسەلى ەسكەرتكىش ءۇش مەترلىك بيىك تۇعىرعا ورناتىلعان. ەسكەرتكىشتىڭ ءوزىنىڭ بيىكتىگى ءتورت جارىم مەتر. ەسكەرىتكىش پەن تۇعىردى قوسا ەسەپتەگەندە جالپى بيىكتىگى جەتى جارىم مەتردى قۇرايدى. ال جالپى سالماعى ءۇ توننا. اتالعان ەسكەرتكىشتىڭ اۆتورى - باۋىرجان جالىن. تاس تۇعىر كەنتاۋ قالاسىنىڭ ورتالىعىنداعى اباي داڭعىلىنىڭ بويىنا ورناتىلعان.

سونىمەن قاتار، كەنتاۋ قالاسىندا ەلوردا كۇنىنە بايلانىستى «ۇستازدار اللەياسى» دا اشىلدى. اتالعان جاڭا نىسان ءبىلىم سالاسىنىڭ بىلىكتى ماماندارىنا ارنالىپ وتىر. وتكەن جىلى ەلىمىزدە «مۇعالىم مارتەبەسى» تۋرىلى زاڭ قابىلدانىپ، بۇكىل ەلدە ۇستازدارعا دەگەن قۇرمەت ەسەلەپ ارتىپ كەلەدى. وسىنداي كەزەڭدە اشىلىپ وتىرعان «ۇستازدار اللەياسى» وڭتۇستىك ءوڭىردىڭ ۇستازدار قاۋىمىنا دەگەن شەكىسىز قۇرمەتىن كورسەتىپ تۇر.

ودان بولەك، كەنتاۋ قالاسىندا ەرىكتىلەر جىلىنا بايلانىستى «جاستار ساياباعىنا» كۇردەلى جوندەۋ جاسالىپ، قايتادان پايدالانۋعا بەرىلگەن. اتالعان ساياباقتا فۋتبول، باسكەتبول، ۆەلوترەك، تەننيس كورتى الاڭدارى سالىنعان. بۇل اسياباق كەلەشەكتە كەنتاۋ جاستارىنىڭ باس قوساتىن مەكەنىنە اينالادى دەپ جوسپارلانىپ وتىر. قازاقستاندا سالاۋاتتى ءومىر سالتىن ۇستانىپ، سپورپەن شۇعىلداناتىن ازاماتتاردىڭ سانى جىل سايىن ارتىپ كەلەدى. وسىنداي كەزەڭدە جاستار الاڭىنىڭ اشىلىپ، سپورتتىق نىسانداردىڭ كوپتەپ سالىنۋى قولداۋعا تۇرالىق اسا يگى باستاما دەپ ەسەپتەيمىز.

Abai.kz