الگىندە الەۋمەتتىك جەلىدە قر پرەمەر-ءمينيسترى اسقار ءماميننىڭ كوروناۆيرۋس جۇقتىرعانى تۋرالى اقپارات تاراعان ەدى. بۇگىن ۇكىمەت باسشىسىنىڭ ءباسپاسوز قىزمەتى وسى اقپاراتقا قاتىستى رەسمي مالىمەت تاراتتى. 

«تەلەگرام ارنالاردا تاراعان پرەمەر-مينيستر اسقار ماميننىڭ كوروناۆيرۋس جۇقتىرعانۋ تۋرالى اقپارات جالعان، شىندىققا سايكەس كەلمەيدى. قازىرگى تاڭدا ۇكىمەت باسشىسى ءوزىنىڭ جۇمىس كەستەسىنە ساي جۇمىس ىستەپ جاتىر. 10 شىلدەدە مەملەكەت باسشىسىنىڭ قاتىسۋىمەن وتەتىن ۇكىمەتتىڭ كەڭەيتىلگەن وتىرىسىنا دايىندىق ۇستىندە»، - دەيدى رەسمي اقپارات.

ۇكىمەتتىڭ ءباسپاسوز قىزمەتىندەگىلەر سونداي-اق، حالىقتان جالعان اقپاراتقا ەرمەي، رەسمي دەرەككوزدەرگە جۇگىنۋدى سۇراپتى.

ەستەرىڭىزگە سالا كەتەيىك، وتكەن تاۋلىكتە ەلىمىزدە 1109 ادام كوروناۆيرۋس جۇقتىرعان. ونىڭ 649-ى سيمپتومسىز ءتۇرىن جۇقتىرعاندار. ال ءبىر اپتادا (30 ماۋسىم مەن 6 شىلدە ارالىعىندا) 76 ادام كوروناۆيرۋستان كوز جۇمعان.

Abai.kz