سەنبى, 8 مامىر 2021
سايلاۋ 5424 22 پىكىر 8 شىلدە, 2020 ساعات 15:15

شىعىستان دەپۋتات بولاتىن ءبىر قازاق تابىلمادى ما؟

2020 جىلى 12 تامىزدا قازاقستان رەسپۋبليكاسى پارلامەنتى سەناتى دەپۋتاتتارىنىڭ سايلاۋى وتەدى

بيىل 2014 جىلى سايلانعان دەپۋتاتتاردىڭ وكىلەتتىلىك مەرزىمى تولادى. ورتالىق سايلاۋ كوميسسياسىنىڭ مالىمەتىنشە، وڭىرلەردەن سايلانعان 17 دەپۋتات ورنىن بوساتقالى وتىر.

مەملەكەت باسشىسى قاسىم-جومارت توقاەۆ قول قويعان سەنات سايلاۋىن وتكىزۋ تۋرالى قاۋلى جاريالانعاننان بەرى وڭىرلەر كەزەكتى سايلاۋعا دايىندالىپ جاتىر. ءار وبلىس سايلاۋعا تۇسەتىن كانديداتتاردى انىقتايدى. سول قاتاردا شىعىس قازاقستان ءوڭىرى بويىنشا ءۇش كانديدات تىركەلگەنى حابارلاندى.

بۇل تۋرالى شقو ايماقتىق كوممۋنيكاتسيالار قىزمەتىندە وتكەن ءباسپاسوز ءماسليحاتى بارىسىندا ايتىلدى.

وبلىستىق سايلاۋ كوميسسياسىنىڭ حاتشىسى گالينا رومانوۆسكايانىڭ ايتۋىنشا، پارلامەنت سەناتى دەپۋتاتتىعىنا كانديداتتاردىڭ دەرەكتەرىنىڭ زاڭعا سايكەستىگى انىقتالعان سوڭ، وبلىستىق سايلاۋ كوميسسياسى وتىرىس وتكىزىپ، دەپۋتاتتاردىڭ سەنىمدى وكىلدەرىنەن وتىنىشتەر قابىلداعان.

- سايلاۋ تۋرالى ەلىمىزدىڭ كونستيتۋتسيالىق زاڭى مەن قازاقستان رەسپۋبليكاسى پارلامەنتىنىڭ سەناتىنا دەپۋتاتتاردى سايلاۋعا دايىندىق پەن ونى وتكىزۋدىڭ كۇنتىزبەلىك جوسپارىنا سايكەس، وبلىستىق سايلاۋ كوميسسياسى پارلامەنت سەناتى دەپۋتاتتىعىنا ۇمىتكەرلەردىڭ سايكەستىگىن انىقتادى. سايلاۋ تۋرالى زاڭعا سايكەس، ءار ۇمىتكەر قازاقستان اۋماعىندا 10 جىلدان، ال شىعىس قازاقستان وبلىسى اۋماعىندا 3 جىلدان كەم ەمەس ۋاقىت تۇرعىلىقتى تۇرۋى قاجەت. وبلىستىق پوليتسيا دەپارتامەنتىنىڭ بەرگەن مالىمەتتەرىنە سۇيەنسەك، بارلىق كانديداتتىڭ بۇل نورماعا ساي ەكەندىگى انىقتالدى. بارلىق كانديداتتىڭ سوتتىلىعى، سىبايلاس جەمقورلىق فاكتىلەرىنە قاتىسى بولعان جوق. جوعارى ءبىلىمدى، ەڭبەك جولدارى بەس جىلدان جوعارى. سونداي-اق، ولاردىڭ جاستارى 30-دان جوعارى، - رومانوۆسكايا.

سەنات دەپۋتاتتىعىنا شقو-دان ءۇش ادام ءوز كانديداتۋراسىن ۇسىنعان. ولار: بورودۋليحا اۋدانىنىڭ اكىمى – ولگا بۋلاۆكينا، ريددەر قالالىق ءماسليحاتىنىڭ حاتشىسى – يگور پانچەنكو مەن وبلىستىق مامانداندىرىلعان مەديتسينالىق ورتالىقتىڭ باس دارىگەرى – يۋري ستاروكوجەۆ.

- بۇل ازاماتتاردىڭ بارلىق دەرەكتەرى زاڭعا سايكەس جانە ولار قازاقستان رەسپۋبليكاسىنىڭ ازاماتتارى، – دەيدى وبلىستىق سايلاۋ كوميسسياسى توراعاسىنىڭ ورىنباسارى جانار الكانوۆا.

ءبىزدى تاڭقالدىرعانى بىلدەي ءبىر وبلىستان سەنات سايلاۋىنا تۇسكەلى وتىرعان ءۇش كانديداتتىڭ بىردە-بەرۋى قازاق ۇلتىنان ەمەس. بيىل ەل بولىپ 175 جىلدىعىن اتاپ ءوتىپ جاتقان ۇلى اباي تۋىپ-وسكەن وڭىردەن سەنات دەپۋتاتى بولاتىن ءبىر قازاق تابىلماعانى ما؟!

مۇنى از دەسەڭىز، بيىل وكىلەتتىلىك مەرزىمى تولىپ، ورنىن بوساتقالى وتىرعان شقو-دان سايلانعان دەپۋتاتتىڭ دا ۇلتى قازاق ەمەس. سوندا بۇل وڭىردەن سەناتقا تەك قازاقتان وزگە ۇلت وكىلدەرى بارۋ كەرەك پە؟

سەرگەي پلوتنيكوۆ

60 جاستا. شىعىس قازاقستان وبلىسى اكىمىنىڭ بۇرىنعى ورىنباسارى. 2014 جىلى شقو-دان سايلانعان.

Abai.kz

22 پىكىر