تىركەلمەگەن «حالىق رۋحى» پارتياسىنىڭ توراعاسى مۇحتار شاحانوۆتىڭ مالىمدەمەسى

تىركەلمەگەن «حالىق رۋحى» پارتياسىنىڭ توراعاسى مۇحتار شاحانوۆتىڭ مالىمدەمەسى

ءبىز 2007 جىلى قازاقستان رەسپۋبليكاسىنىڭ اتا زاڭىنا سايكەس، «ساياسي پارتيالار تۋرالى» زاڭعا وراي رەسپۋبليكامىزداعى 14 وبلىس پەن الماتى جانە استانا قالالارىنان 2 مىڭعا جۋىق دەلەگات قاتىسقان قۇرىلتاي وتكىزىپ، «حالىق رۋحى» اتتى پارتيا قۇردىق. ءبىز قۇرىلتاي وتكەننەن كەيىن زاڭ بويىنشا بەلگىلەنگەن 2 اي مەرزىم ارالىعىندا پارتيا قاتارىنا 23 ۇلت وكىلدەرىنەن تۇراتىن 60 مىڭنان اسا مۇشە تارتا الدىق. سوعان قاراماستان ءبىزدى كەزىندە «ۇلتشىل پارتيا» دەپ تە كىنالاۋشىلار بولدى. ءبىز پارتيا باعدارلاماسىندا دا اتاپ وتكەنىمىزدەي، رەسپۋبليكامىزدا تۇراتىن بارلىق ۇلت وكىلدەرىنىڭ تىلىنە، ۇلتتىق قۇندىلىقتارىنا قۇرمەتپەن قاراپ، ولاردىڭ ءوسىپ-وركەندەۋىنە ۇدايى تىلەكتەستىك بىلدىرۋمەن كەلەمىز. ءبىز سوندىقتان دا رەسپۋبليكامىزداعى ۇلتتاردى تىكەلەي جويۋعا الىپ باراتىن، بارلىق ۇلتتان ءبىر عانا ۇلت جاساۋعا نەگىزدەلگەن، ءوزىنىڭ باستاۋىن امەريكاندىق ۇلتتان الاتىن «قازاقستاندىق ۇلت» يدەياسىنىڭ سالتانات قۇرۋىنا قارسى تۇردىق. ەگەر «قازاقستاندىق ۇلتقا» ەنسەك، بۇكىل ۇلتتىق مۇددەدەن ماقۇرىم قالار ەدىك. ول كەزدە «مەن قازاقپىن»، «مەن ۇيعىرمىن»، «مەن ورىسپىن» دەپ ايتساڭىز، جاۋاپقا تارتىلاسىز. ءبىز، زيالى قاۋىم وكىلدەرى، بۇل ۇلتسىزداندىرۋ شاراسىنا تۇبەگەيلى قارسى تۇردىق. اشتىق جاريالاماقشى بولدىق. رەسپۋبليكا بويىنشا 4 مىڭنان استام ادام بىزبەن بىرگە اشتىق جاريالاۋعا نيەت ءبىلدىردى. بيلىك امالسىزدان ءبىزدىڭ تالاپ-تىلەگىمىزگە قۇلاق استى. قازاقستان حالقى اسسامبلەياسى ۇسىنعان «ەل بىرلىگى» دوكتريناسىنان «قازاقستاندىق ۇلت» تۇبەگەيلى الىنىپ تاستالىندى جانە وعان «قازاقستاننىڭ ءاربىر ازاماتى مەملەكەتتىك ءتىلدى بىلۋگە مىندەتتى» دەگەن سويلەم ەندىرىلدى. بۇل زيالى قاۋىم وكىلدەرىنىڭ دەموكراتيا سالاسىنداعى ەلەۋلى جەڭىسى ەدى.

ءبىر سوزبەن ايتقاندا، ءبىز «حالىق رۋحى» پارتياسى ارقىلى قوعامىمىزدا قوردالانىپ قالعان بارلىق نەگىزگى ماسەلەلەردى حالىق قالاۋى بويىنشا شەشۋدى قولعا الۋعا نيەت بىلدىرگەن ەدىك. سوعان وراي بيلىك بارىنشا شەكتەۋ قويعان زاڭ تالاپتارىنا كولدەنەڭ كەلىپ قالماۋ جاعىن دا ويلاستىردىق. قاتارىمىزعا بەلگىلى زاڭگەرلەردى تارتىپ، بىرلەسىپ جۇمىس جاسادىق. بيلىك قانشا جەردەن مۇقيات تەكسەرگەنىمەن، ءبىز وتكىزگەن پارتيا قۇرىلتايىنان دا، وزگە قۇجاتتاردان دا ەش كىنارات تابا المادى. بىراق، ءالى كۇنگە دەيىن تەكسەرۋمەن كەلەدى. ارادا ءتورت جارىم جىلداي ۋاقىت وتسە دە تەكسەرۋ بىتەر ەمەس. ءبىز ادىلەت مينيسترلىگىنە، وزگە دە قۇزىرلى ورگاندار الدىنا  28 رەت بارىپ تابالدىرىعىن توزدىردىق. بىراق، «باياعى جارتاس، سول جارتاس» كۇيىندە قالىپ كەلەدى.

قازاقستان رەسپۋبليكاسىنىڭ «ساياسي پارتيالار تۋرالى» زاڭىنا 2009 جىلى ەنگىزىلگەن وزگەرىستەر مەن تولىقتىرۋعا وراي ادىلەت مينيسترلىگى پارتيا قۇرىلعاننان كەيىن 6 ايدىڭ ىشىندە پارتيانى تىركەۋ، نەمەسە تىركەمەۋ تۋرالى جازباشا تۇردە جاۋاپ بەرۋگە ءتيىستى. بىراق زاڭنىڭ بۇل تالاپتارىنىڭ ءبىزدىڭ پارتياعا قاتىسى بار ما، جوق پا بۇل جونىندە ادىلەت مينيسترلىگى ناقتى جاۋاپ بەرمەي وتىر.

سوندىقتان ءبىز قوعامىمىزدىڭ بۇگىنگى جاي-كۇيىن سارالاي كەلە، ءارى بىزگە سەنىم بىلدىرگەن، بۇگىنگى كۇنى 100 مىڭعا جۋىقتاعان «حالىق رۋحى»  پارتياسى مۇشەلەرىنىڭ ءبىزدى ساياسي كۇرەس ناۋقانىنا شاقىرعان تالاپ-تىلەكتەرىنە وراي جانە پارتيانىڭ ورتالىق كەڭەسى تورالقاسىنىڭ شەشىمىمەن «رۋحانيات» پارتياسىنا قوسىلعاندى ءجون كوردىك. راس، بىزگە رەسپۋبليكامىزداعى وزگە دە ساياسي پارتيالاردان پارلامەنت سايلاۋى ناۋقانىنا بايلانىستى بىرلەسە كۇرەسۋ تۋرالى ۇسىنىستار ءتۇستى. الايدا، ءبىز اقىلداسا كەلە «رۋحانيات» پارتياسىنا توقتالدىق. سەبەبى، «رۋحانيات» پارتياسىنىڭ تىزگىنى سەرىكجان مامبەتالين مىرزانىڭ قولىنا وتكەلى بەرى بۇل پارتيا جاڭا باعىت ۇستانا باستادى. «رۋحانيات» پارتياسىمەن مەملەكەتتىك ءتىل، ۇلتتىق قۇندىلىقتار، ۇلتتىق مەنشىك، ورالماندار ماسەلەسى، كەدەن وداعى جانە قازاق اۋىلدارىنىڭ تىنىس-تىرشىلىگىنە بايلانىستى ماسەلەلەردە ءبىزدىڭ ماقسات-مۇددەلەرىمىز ءبىر ارناعا توعىستى. ءبىز وسىعان دەيىن دە بىرنەشە رەت بىرلەسىپ ءىس-قيمىل جاساپ، ۇلتتىق مۇددە تۇرعىسىندا سەنىمدى سەرىكتەس ەكەندىگىمىزدى دالەلدەگەن بولاتىنبىز. ءبىزدىڭ ماقسات-مۇددەمىز دە ءبىر ارناعا توعىستى. سوندىقتان بۇل بىرلەسۋدى تابيعي زاڭدىلىق دەپ قابىلداعان ءجون.

ال، بىرلەسكەن پارتيانىڭ ىشكى قۇرىلىمىن الدا وتەتىن قۇرىلتاي شەشەدى. قالاي بولعاندا دا، ءبىز پارلامەنت سايلاۋىنا «رۋحانيات» پارتياسى ارقىلى تۇسەتىندىگىمىز انىق. بۇل - ەلدىك، ۇلتتىق مۇددە تۇرعىسىندا بىرىگۋ. ءبىز وسىعان دەيىن شەشىمىن تاپپاعان ۇلتتىق ماسەلەلەردى، ياعني ونىڭ ءتىلىن، ءدىلىن، ءدىنىن، الەۋمەتتىك جاعدايىن، ورالماندار باسىنداعى كۇردەلى احۋالدى كوتەرەتىن بولامىز.  بىزگە بارشا رەسپۋبليكا حالقى تۇسىنىسۋشىلىكپەن قاراپ، قوعامىمىزداعى ادىلەتسىزدىك پەن كەلەڭسىزدىكتەرگە توزبەيتىن، قۇلدىق سانادان بيىك تۇرعان جاننىڭ ءبارى بىزبەن بىرگە بولادى دەپ سەنەمىن.