بۇگىن ۇكىمەتتە وتكەن وتىرىستا قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ جاڭا وقۋ جىلىنداعى وزگەرىستەر تۋرالى باياندادى.

«مينيسترلىك اكىمدىكتەرمەن بىرلەسىپ، ءبىلىم بەرۋ ۇيىمدارىن جاڭا وقۋ جىلىنا دايىنداۋ جۇمىستارىن بەلسەندى تۇردە جۇرگىزىپ جاتىر. دەنساۋلىق ساقتاۋ مينيسترلىگىنىڭ مالىمەتى بويىنشا، جىل سايىن جرۆي كەزەڭىندە ءبىلىم الۋشىلاردىڭ 70 پايىزعا جۋىعى اۋىرادى.

سونداي-اق قازىرگى ۋاقىتتا ءبىلىم سالاسى قىزمەتكەرلەرىنىڭ كوروناۆيرۋس ينفەكتسياسىن جانە باسقا دا ۆيرۋستاردى جۇقتىرۋ قاۋپى جوعارى بولىپ تۇر. بۇل جاعدايدا ءبىز ءۇشىن باستى باسىمدىق - بالالار مەن پەداگوگتەردىڭ ءومىرى مەن دەنساۋلىعى»، - دەدى ايماعامبەتوۆ.

سونىمەن، مينيستر قانداي شەشىم ۇسىندى؟ جاڭا وقۋ جىلىنا قانداي وزگەرىستەر ەنگىزىلمەك؟ مىنە قاراڭىز:

ءبىرىنشى، شالعايدا ورنالاسقان شاعىن اۋىلدىق مەكتەپتەردى قوسپاعاندا، 1 قىركۇيەكتەن باستاپ ەلىمىزدىڭ بارلىق مەكتەبىندە 1-11 سىنىپ وقۋشىلارى وقۋ جىلىنىڭ العاشقى توقسانىن قاشىقتان وقيدى.

ەكىنشى، اتا-انالارىنىڭ ءوتىنىشى بويىنشا، ءتيىستى مۇمكىنشىلىككە قاراي، قاتاڭ سانيتارلىق شارالاردى ساقتاي وتىرىپ، باستاۋىش سىنىپ وقۋشىلارى ءۇشىن كەزەكشى سىنىپتاردىڭ جۇمىس ىستەۋىنە مۇمكىندىك بەرىلەدى.

بۇل جاعدايدا سانيتارلىق قاۋىپسىزدىك شارالارى قامتاماسىز ەتىلەدى. ياعني بالالار تەك قانا ءبىر كابينەتتە وقيدى. ۇزىلىستەر ءارتۇرلى ۋاقىتتا بولادى. كىرەبەرىستە دەنە قىزۋى ولشەنەدى. اۋانى تازارتۋ، كۆارتستاۋ جانە ىلعالداۋ، ىلعالدى تازالاۋ رەجيمى كۇشەيتىلەدى.

الەۋمەتتىك قاشىقتى ۇيىمداستىرۋ ءۇشىن وقۋ  10-15 بالادان اسپايتىن توپتارعا بولىنەدى. مەكتەپتە وقۋ كۇندەرىن الماستىرا وقىتۋ قاراستىرىلىپ جاتىر. سونداي-اق، بۇل بالالار ءۇشىن پاندەردىڭ ءبىر بولىگى قاشىقتان وقىتىلاتىن بولادى.

ءۇشىنشى، شالعايدا ورنالاسقان شاعىن اۋىلدىق مەكتەپتەردە شتاتتىق فورماتتا وقىتۋ ۇسىنىلدى. بۇل جالپى وقۋشىلاردىڭ 4 پايىزىن قۇرايدى. وسى كريتەريلەرگە سايكەس كەلەتىن 1 934 مەكتەپ بار ەكەن.

ءتورتىنشى، ءبىرىنشى توقسان اياقتالعاننان كەيىن، ەپيدەميولوگيالىق جاعداي تۇراقتالۋىنا بايلانىستى مەكتەپتەردىڭ كەزەڭ-كەزەڭىمەن ارالاس وقىتۋ جانە شتاتتىق فورماتتا وقىتۋ جۇرگىزىلەتىن بولادى. بۇل ماسەلەنى دە قاراستىرامىز. ءتيىستى ستراتەگيا دايىن.

بەسىنشى، ۇيدە وقىتۋدىڭ ەڭ وسال توپتارى - ەرەكشە ءبىلىمدى قاجەت ەتەتىن بالالار, كىرىسى تومەن وتباسىلاردىڭ بالالارى جانە باستاۋىش سىنىپتىڭ وقۋشىلارى بولعاندىقتان، ءبىز ناقتى وسى وسال ساناتتاعى بالالارعا ينكليۋزيۆتى جانە قولجەتىمدى ءبىلىم بەرۋدى قامتاماسىز ەتۋدى ارنايى قولعا الاتىن بولامىز.

اسحات ايماعامبەتوۆ، مينيستر.

قوسىمشا:

مەكتەپ فورماسى مىندەتتى ەمەس

«ءبىز قازىر مەكتەپ فورماسىنا قاتىستى ءبىلىم ءمينيسترىنىڭ بۇيرىعىنا وزگەرىستەر ەنگىزدىك.  ەكى نارسە اتالدى: ءبىرىنشى، مەكتەپ فورماسى سولاي قالادى. ونى الىپ تاستامادىق. بىراق وعان قوسىمشا تارماق قوستىق. وندا بىلاي جازىلعان: توتەنشە جاعداي كەزىندە، فورس-ماجور نەمەسە باسقا دا شەكتەۋ شارالارى بولعان كەزدە، ءبىلىم بەرۋ مەكەمەلەرىنە بەكىتىلگەن مەكتەپ فورماسىن كيمەي، تازا، كلاسسيكالىق كيىممەن كەلۋگە بولادى.

ءتىپتى ءبىرىنشى توقساننان كەيىن ءداستۇرلى وقۋ فورماسىنا اۋىسساق تا، مەكتەپتە ەشكىم اتا-انالاردان مەكتەپ فورماسىن ساتىپ الۋى كەرەك دەپ تالاپ ەتپەيدى»، - دەدى مينيستر.

جوو ستۋدەنەتتەرى قاشىقتان وقيدى

«كوللەدجدەر وقۋ جىلىن قاشىقتان وقۋ فورماتىندا باستايدى. ەگەر ەپيدەميولوگيالىق جاعداي قولايلى بولسا، وندا ءداستۇرلى فورماتتا وقىتۋدى ۇيىمداستىرۋعا مۇمكىندىك بەرەمىز.

جوعارى ءبىلىم بويىنشا وقىتۋ قاشىقتان وقىتۋ فورماتىندا ۇيىمداستىرىلادى.

ءداستۇرلى فورمات ارنايى جەكە كەستە بويىنشا، زەرتحانالىق جۇمىستار، دوكتورانتۋرا، وندىرىستىك وقىتۋ، كاسىبي تاجىريبە ءۇشىن ۇيىمداستىرىلادى»، - دەدى ايماعامبەتوۆ.

بالاباقشالار جۇمىس ىستەمەيدى

«قازىرگى تاڭداي، كارانتين مەرزىمى ۇزارتىلدى. سوعان سايكەس، مەكتەپكە دەيىنگى مەكەمەلەر جۇمىسى توقتاتىلدى. ەپيدەميولوگيالىق جاعدايعا بايلانىستى كەزەكشى توپتاردىڭ جۇمىسىنا قاتىستى شەشىم قابىلدانادى. ءبىز بۇل ماسەلەگە مۇقيات اتسالىسامىز. اۋەلى بالالاردىڭ قاۋىپسىزدىگىن قامتاماسىز ەتۋ ماڭىزدى»، - دەدى مينيستر.

Abai.kz