سەيسەنبى, 4 تامىز 2020
COVID-19 قازاقستاندا. جۇقتىرعاندار — 93820. جازىلعاندار — 65132. قايتىس بولعاندار — 1058
انە، كوردىڭ بە؟ 4173 9 پىكىر 14 شىلدە, 2020 ساعات 12:11

ادام قۇقىعىن بۇزعان شەنەۋنىكتەردىڭ «قارا ءتىزىمى» جاسالادى

قازاقستاندا ازاماتتىق قۇقىقتى ورەسكەل بۇزاتىن شەنەۋنىكتەردىڭ قارا ءتىزىمى جاسالادى. بۇل تۋرالى تانىمال كاسىپكەر جانە قۇقىق قورعاۋشى بارلىق مەڭدىعازيەۆ مالىمدەدى.

ونىڭ ايتۋىنشا، «Freedom Kazakhstan» قورى قازاقستاننىڭ بەلسەندى ازاماتتارىنا قارجىلىق جانە قۇقىقتىق كومەك كورسەتەدى. اتالعان قوردىڭ قازاقستانداعى نەگىزگى ميسسياسى ەكەۋ ەكەن:

ءبىرىنشىسى، ءار ءتۇرلى دەموكراتيالىق پارتيالار مەن قوزعالىستارعا مۇشە بولعانىنا قاراماستان، قازاقستاننىڭ بارلىق ساياسي تۇتقىندارى مەن ساياسي قۋعىنعا ۇشىراعان ازاماتتارىنا ماقساتتى قارجىلىق جانە قۇقىقتىق كومەك كورسەتۋ;

ەكىنشىسى، ازاماتتىق قۇقىقتاردى ورەسكەل بۇزاتىن بارلىق مەملەكەتتىك قىزمەتكەرلەر مەن شەنەۋنىكتەردىڭ قارا ءتىزىمىن جاساۋ.

(سۋرەتتە بارلىق مەڭدىعازيەۆ)

مەڭدىعازيەۆ بۇل قوردىڭ كوممەرتسيالىق ەمەس جانە مەملەكەتكە تاۋەلدى بولمايتىنىن ايتادى.

«ماعان مۇنداي ازاماتتىق ارەكەتكە بارۋعا نە تۇرتكى بولدى؟ مەنىڭشە، قازاقستان حالقى بەلگىلى ءبىر دارەجەدە ەلىمىزدە بولىپ جاتقان ەكونوميكالىق، الەۋمەتتىك جانە ساياسي بەيبەرەكەتسىزدىكتەرگە جاۋاپتى.

سەبەبى، حالىق نازارباەۆ پرەزيدەنت بولعان 30 جىلدا ەنجار بولدى. ەگەر بۇل ەنجارلىق ءارى قاراي دا جالعاسا بەرسە، ءبىز تەك ەكونوميكالىق قانا ەمەس، سونىمەن بىرگە مادەني توقىراۋعا ۇشىرايمىز»، - دەيدى قۇقىق قورعاۋشى.

مەڭدىعازيەۆ مىرزا «Freedom Kazakhstan» قورى جەكە كاسىپكەرلەر جانە ەرىكتى ازاماتتاردىڭ كومەگىمەن جۇمىس ىستەيتىنىن ايتىپتى.

«Freedom Kazakhstan» - قازاقستاندا ەركىن ازاماتتىق جانە دەموكراتيالىق قوعام قۇرىلعانشا جۇمىس ىستەيتىن ۋاقىتشا ۇيىم. قور تۋرالى بارلىق اقپارات اشىق بولادى. جانە ونداعى شەشىمدەر قور كەڭەسىنىڭ اقىلداسۋىمەن قابىلدانادى»، - دەيدى ول.

مەڭدىعازيەۆ مىرزانىڭ ايتۋىنشا، قازىردىڭ وزىندە ساياسي قۋعىنعا ۇشىراعان ازاماتتارعا كومەكتەسۋ ءۇشىن، اتالعان قورعا 50 مىڭ دوللار قارجى اۋدارىلعان ەكەن.

Abai.kz

9 پىكىر