قازاقستاندا كارانتين مەرزىمى ۇزارتىلۋىنا بايلانىستى، شىلدە ايىندا مۇقتاج جاندارعا 42 500 تەڭگە تولەنەتىنى بۇعان دەيىن ايتىلدى. وسىعان وراي، قر ۇكىمەتى مەن ەڭبەك جانە حالىقتى الەۋمەتتىك قورعاۋ مينيسترلىگى اتالعان تولەمنىڭ قالاي جۇزەگە اسىرىلاتىنىن ءتۇسىندىرىپتى. 

سونىمەن، بۇل جولى جاردەمپۇلدى كىمدەر الادى، كىمدەر المايدى؟ وعان قالاي جانە قاي جەردە ءوتىنىش بەرۋگە بولادى؟ مىنە قاراڭىز:

اسقار ءماميننىڭ ءسوزى

«مەملەكەت باسشىسىنىڭ تاپسىرماسى بويىنشا شەكتەۋ شارالى كەزىندە تابىسىنان ايىرىلعاندارعا الەۋمەتتىك جاردەماقى ەڭ تومەنگى جالاقى مولشەرىندەگى 42 500 تەڭگەنى ءبىر ايعا تولەۋ جونىندە شەشىم قابىلداپ وتىرمىز.

تولەم كارانتين شارالارىنىڭ كۇشەيتىلۋىنە بايلانىستى جۇمىسى شەكتەلگەن جۇمىس بەرۋشىلەردىڭ، جەكە كاسىپكەرلەردىڭ جانە ءوزىن-ءوزى جۇمىسپەن قامتىعاندار ءوتىنىمى نەگىزىندە جۇرگىزىلەدى», - دەدى پرەمەر-مينيستر.

ءوتىنىش قابىلداۋ 17 شىلدەدەن باستالادى

قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ ايتۋىنشا، 42 500 تەڭگە ءدال ناۋرىزداعى توتەنشە جاعداي كەزىندەگى تارتىپپەن تولەنەدى.

«كوپشىلىكتى سوڭعى ماسەلە قىزىقتىرادى. بۇل جولى 42 500 وتكەندەگى توتەنشە جاعدايداعىداي قاعيداتتارمەن تولەنەدى. ياعني، جۇمىس ىستەپ ءجۇرىپ، تابىسىنان ايىرىلعان ازاماتتارعا. ول - جالدامالى قىزمەتكەرلەر، جەكە كاسىپكەرلەر، ءوزىن-ءوزى جۇمىسپەن قامتىپ جۇرگەن ازاماتتار...» - دەدى مينيستر.

ءمينيستردىڭ ايتۋىنشا، ءوتىنىش 17 شىلدەدەن باستاپ قابىلدانادى. سول كۇنى ءوتىنىش قابىلدايتىن ارنايى پورتالدار دايىن بولادى. 20 شىلدەدەن باستاپ ازاماتتارعا تولەم جۇرگىزىلەدى. جۇماعا دەيىن ەشقايدا ءوتىنىش بەرۋدىڭ كەرەگى جوق. ال، تولەم وپەراتورى رەتىندە «مەملەكەتتىك الەۋمەتتىك ساقتاندىرۋ قورى» بەلگىلەنگەن.

جەكە تۇلعالار ءوتىنىشتى قالاي تاپسىرادى؟ 

مينيستر نۇرىمبەتوۆ تولەمگە ءوتىنىشتى ارنايى پورتالدار مەن Telegram-بوت ارقىلى بەرۋ كەرەكتىگىن ايتتى.

«جەكە تۇلعالاردىڭ بارلىعى وسى پورتالدار جانە Telegram-بوت ارقىلى ءوتىنىش بەرە الادى. ول شتاب ارقىلى وتپەيدى، تىكەلەي كەتەدى...

بارشاڭىزعا ايتارىم، جۇمىستارىڭىز توقتاپ قالعان بولسا عانا ءوتىنىش بەرۋ كەرەك. وتكەندەگىدەي، Telegram-بوتتا جازبا بولادى. وندا وسى كارانتينعا قاتىستى كۇشەيتىلگەن شەكتەۋلەردىڭ سالدارىنان تابىسىمنان ايىرىلدىم دەپ راستايسىز جانە وسى مالىمەتتىڭ جالعان ەمەس ەكەنى تۋرالى جاۋاپكەرشىلىكتى مويىنداپ، بەلگى قوياسىز» ، - دەدى مينيستر.

42 500-ءدى كىمدەر الا المايدى؟ 

رەسمي جۇمىس ىستەيتىن ازاماتتار! مينيستر سولاي دەدى.

«مەملەكەتتىك بيۋدجەتتەن زەينەتاقى، جاردەماقى، اتاۋلى الەۋمەتتىك كومەك نەمەسە ساقتاندىرۋ قورىنان ءتيىستى تولەم الاتىن ازاماتتار 42 500 تەڭگەنى المايدى. ونى دۇرىس تۇسىنىڭىزدەر. ولار بەيرەسمي جۇمىس ىستەگەندەردىڭ قاتارىنا جاتپايدى», - دەدى نۇرىمبەتوۆ.

ءمينيستردىڭ ءوتىنىشى

ەڭبەك ءمينيسترى ەل تۇرعىندارىنا قايرىلا سويلەپ، جاردەمپۇلعا ءبىر-اق رەت  ءوتىنىش بەرۋگە كەڭەس بەردى.

«سىزدەردان ۇلكەن ءوتىنىش! قۇرمەتتى قازاقستاندىقتار! ءبىر-اق رەت ءوتىنىش بەرىڭىزدەر. سىزدەرگە - «ءسىزدىڭ ءوتىنىشىڭىز قابىلداندى» دەگەن حابارلاما كەلەدى. سودان كەيىن، ەرتەسى كۇننەن باستاپ «enbek.kz» پورتالىنان ءوزىڭىزدىڭ ستاتۋسىڭىزدى كورىپ وتىراسىز. ەكى-ءۇش رەتتەن ءوتىنىش بەرمەۋدى جانە ءار پورتالعا قايتا-قايتا ءوتىنىش قالدىرماۋدى سۇرايمىز! ونىڭ قاجەتى جوق. ءبارىبىر ەكىنشى ءوتىنىشىڭىز وتپەيدى.  ول  تەك پورتالدارعا سالماق سالۋى جانە باسقا ازاماتتاردىڭ ءوتىنىش بەرۋىنە كەدەرگى كەلتىرۋى مۇمكىن»، - دەدى مينيستر نۇرىمبەتوۆ

مەكەمەدە ىستەيتىندەرگە جۇمىس ورنى ءوتىنىش بەرەدى

سونىمەن قاتار، مينيستر مەكەمەدە جۇمىس ىستەيتىن ازاماتتاردىڭ ءوتىنىشىن جۇمىس بەرۋشى بەرەتىنىن ايتتى.

«جۇمىسشىلاردىڭ وزدەرى تاپسىرىس بەرۋىنىڭ قاجەتى جوق. ول ءبارىبىر پورتالدان وتپەيدى. سىزدەر جۇمىس بەرۋشىڭىز ءوتىنىش بەرگەن سوڭ، «enbek.kz» پورتالىنان سىزگە ءوتىنىش بەرىلگەن-بەرىلمەگەنى جانە ول قاي ساتىدا قارالىپ جاتقانى جونىندە كورىپ وتىرا الاسىز»، - دەدى ول.

ال كارانتين كەزىندە جۇمىسى توقتاپ قالعان جەكە كاسىپكەرلەر ءوتىنىشتى وزدەرى ءۇشىن وزدەرى تولتىرادى.

«جەكە كاسىپكەرلەر جانە جەكە پراكتيكامەن اينالىسىپ جۇرگەن ازاماتتار وزدەرىڭىز ءۇشىن وزدەرىڭىز تولتىراسىزدار. قوسىمشا وزدەرىڭىز تۋرالى مالىمەتتەر بەلگىلەيسىزدەر. سىزدەرگە ءبىر عانا شارت: كارانتينگە بايلانىستى جۇمىستارىڭىز توقتاپ تۇرعانى راس بولۋى كەرەك.

جۇمىسىڭىزدىڭ توقتاعان نەمەسە توقتاماعانىن اۋداندىق شتابتار جانە سالىق كوميتەتى تەكسەرىپ الادى»، - دەدى مينيستر.

وتىنىشتەر قىركۇيەك ايىنا دەيىن قابىلدانادى

سونىمەن قاتار، مينيستر 42 500 تەڭگە الۋعا وتىنىشتەر قىركۇيەك ايىنا دەيىن قابىلداناتىنىن ايتتى.

«بۇل تولەم شىلدە ايىنا ەسەپتەلگەن. بارلىق بايلانىس ارنالارى، پورتالدار 1 قىركۇيەككە دەيىن جۇمىس ىستەيدى. سىزدە ءوتىنىش بەرۋگە ءالى ءبىر اي بار»، - دەدى نۇرىمبەتوۆ.

Abai.kz