"جۇمىستان قىسقارتىلايىن" دەپ وتىرعان نارازىلار قىسقارتۋعا قارسى شىعىپ، سونىمەن بىرگە ەڭبەك جاعدايىن جاقسارتۋدى، كومپانيا باسشىسىن قىزمەتتەن كەتىرۋدى تالاپ ەتتى.

ولار اقپارات قۇرالدارىنا "كاسىبي بىلىكتىلىگى جوعىنا بايلانىستى 40 جۇمىسشىنى قىسقارتۋ قاجەتتىگى" تۋرالى قۇجاتتى كورسەتتى. وعان كومپانيانىڭ ديرەكتورى مىندەتىن ۋاقىتشا اتقارۋشى جانە جاڭاوزەن اكىمىنىڭ ورىنباسارى قول قويعان.

جۇمىسشىلار جىبەرگەن ۆيدەودا ونداعان جۇمىسشىنىڭ كومپانيا وكىلدەرىنە شاعىمدارىن اشىنىپ ايتىپ تۇرعانى كورىنەدى. "مىناداي توتەنشە جاعدايدا باسشىلىق نەگە حالىقتىڭ تىلەگىن ەسكەرمەيدى؟ حالىقتىڭ جاعدايى ونسىز دا مۇشكىل كەزدە نەگە ءبىز جۇمىسسىز قالۋعا ءتيىسپىز؟" دەدى نارازىلار.

- ەڭبەك جاعدايى جوق. ءبىر جىلدا ەكى بالا توققا ءتۇستى. پرەميا دەگەن بولعان ەمەس. زەينەتاقى جارناسى جۇرمەيدى. نەسيە الا المايمىز. كاسىپوداق جوق. الاتىنىمىز 60 مىڭ تەڭگە. ول ەشتەڭەگە جەتپەيدى. ءبىز ناعىز جالشىلار سياقتى جۇمىس ىستەپ جاتىرمىز، - دەدى ازاتتىققا ينسپەكتور بولىپ جۇمىس ىستەيتىن گۇلميرا ساحاريەۆا.

جۇمىسشىلار ەرەۋىل كەزىندە سونىمەن بىرگە كولىككە جانار-جاعار ماي، تەحنيكالىق قۇجات بەرىلمەيتىنى، جۇمىسشىلاردىڭ ءومىرى ساقتاندىرىلمايتىنى تۋرالى ايتتى. "ايلىقتى ءجۇز پايىزعا كوتەرسىن!" دەپ ايقايلادى.

"كومپانيادا تامىر-تانىستىق جايلاعان. بىزدە 19-20 جىل جۇمىس ىستەگەن تاجىريبەلى ديپلومى بار بىلىكتى جۇمىسشىلار جەتەدى. نەگە ولار باسشى بولمايدى؟ باسشىلىق وزىنە ۇناماعانداردى قىسقارتادى، قورقىتادى. بۇعان قوسا، تۇتىنۋشىلار وزدەرى تۇتىنعان ەنەرگيادان ارتىق اقشا تولەيدى. سەبەبى كومپانيا شىعىنىن سولاي وتەگىسى كەلەدى. زاڭ قايدا؟ بىزگە ادىلدىك كەرەك" دەدى نارازىلاردىڭ ءبىرى.

جاڭاوزەن قالاسى اكىمىنىڭ ورىنباسارى بەرىك قابىلۇلى نارازىلارعا بارىپ، سويلەسپەك بولىپ ەدى، جينالعاندار قالا اكىمىنىڭ كەلۋىن تالاپ ەتتى.

ال كومپانيانىڭ ديرەكتورى مىندەتىن ۋاقىتشا اتقارۋشى قانات قونىسباەۆ ءمان-جايدى ازاتتىققا تەلەفون ارقىلى بىلاي ءتۇسىندىردى:

- كاسىپورىن جوسپارى بار. بىراق ول بەكىتىلمەگەن. ولاردىڭ ءبارى (قىسقارتۋ ماسەلەسى - رەد.) ءالى ماسەلە رەتىندە قارالىپ وتىر. ەشقانداي قىسقارتۋ بولىپ جاتقان جوق. ءبىز باسقا جولدارىن دا قاراستىرىپ جاتىرمىز. قۇجاتتىڭ ەلەكتروندى نۇسقاسى تاراپ كەتكەن. جۇمىسشىلار سونى كورىپ بايبالام جاساپ وتىر، - دەدى ول.

ونىڭ ايتۋىنشا، جاڭاوزەن قالاسىنا ەلەكتر ەنەرگياسىن تاسىمالداۋمەن اينالىساتىن كومپانيادا 185 ادام جۇمىس ىستەيدى. مەكەمەگە تاريفتەن باسقا تابىس تۇسپەگەندىكتەن مەكەمەنىڭ قارجىلاي احۋالى كۇردەلى. "تۇتىنۋشىلاردىڭ ەلەكتر ەنەرگياسىنا ارتىق اقشا تولەيتىنى" تۋرالى سۇراققا ول:

- تۇتىنۋشىلاردىڭ تاپسىرعان كورسەتكىشتەرى ارقىلى ءبىر تاۋلىكتىك شىعىنى انىقتالىپ، سونداي تاسىلمەن 30-31 كۇندىك كورسەتكىشى ەسەپتەلىپ جاتىر. بۇرىن-سوڭدى ونداي ءادىس-ءتاسىل جاسالماعان. تۇتىنۋشىلار ايدىڭ كەز كەلگەن كۇنىندە كورسەتكىشتەرىن تاپسىرا بەرەدى. سونىڭ شىعىنىن تولىق ەسەپتەپ بەرىپ جاتقان جاعداي، - دەپ جاۋاپ بەردى.

شامامەن 100 مىڭنان استام ادام تۇراتىن جاڭاوزەن قالاسىندا جۇمىسسىزدىققا بايلانىستى نارازىلىق اكتسيالارى ءجيى وتەدى. ماۋسىم ايىنىڭ سوڭىندا بىرنەشە تۇرعىن نۇر-سۇلتانعا بارىپ، اقوردا الدىندا اكتسيا وتكىزدى. كەيىننەن پوليتسيا ولاردى ۇستاپ، ايىپپۇل سالدى.

2019 جىلى قالا جاستارى بيلىكتەن جالاقىسى جاقسى جۇمىس تالاپ ەتىپ، نارازىلىق بىلدىرگەن ەدى. ولاردىڭ جەتەكشىسى ەرجان ەلشىباەۆ بىلتىر قازان ايىندا بەس جىلعا سوتتالدى. ونىڭ ۇستىنەن «بۇزاقىلىق» بابى بويىنشا قىلمىستىق ءىس قوزعالعان.

Abai.kz