بۇل تۋرالى 23 شىلدە كۇنى ازاتتىققا وبلىستىق دەنساۋلىق ساقتاۋ باسقارماسى حابارلادى. پوليتسيا "بۇزاقىلىققا قاتىسى بار" دەگەن كۇدىكپەن ءتورت ادامنىڭ ۇستالىپ، تەرگەۋ باستالعانىن حابارلادى. 23 شىلدەدە تۇستەن كەيىن سوتتىڭ ەكى كۇدىكتىنى قاماۋعا سانكتسيا بەرگەنى انىقتالدى.
تۇركىستان وبلىستىق پوليتسيا دەپارتامەنتىنىڭ حابارلاۋىنشا، شورناق اۋىلىندا "ەر ادام مەن اۋىلداستارىنىڭ اراسىندا تۇسىنبەۋشىلىك بولىپ، سوڭى بۇزاقىلىققا ۇلاسقان". پوليتسيانىڭ ايتۋىنشا، "جابىرلەنۋشىنىڭ ۇيىنە كولىكپەن كەلگەن بىرنەشە ادام ونىڭ جانە كورشىلەرىنىڭ ۇيىنە تاس لاقتىرعان". ءۇش ادام جاراقاتتانعان. وقيعا ورنىنا بارعان ۋچاسكەلىك پوليتسەي دە لاقتىرىلعان تاستان جاراقاتتانعان.
الەۋمەتتىك جەلىدە تاراعان ۆيدەولاردىڭ بىرىندە پوليتسيا فورماسىن كيگەن ەر ادامنىڭ يەگى مەن كەۋدەسىندە قان بارى كورىنەدى. ونىڭ جانىندا تۇرعان تۇرعىندار "تاس لاقتىرعانداردىڭ ارەكەتىن" ايىپتايدى. دەپارتامەنت مالىمدەمەسىندە پوليتسەيدىڭ "تۇرعىنداردىڭ قارۋ قولدانۋىنا جول بەرمەگەنى" دە جازىلعان.
ازاتتىق ءتىلشىسى ءمان-جايدى انىقتاۋ ءۇشىن شورناق اۋىلدىق وكرۋگىنىڭ اكىمدىگىنە حابارلاستى. تەلەفون تۇتقاسىن كوتەرگەن اكىمدىك قىزمەتكەرى وقيعاعا بايلانىستى تەك پوليتسيا دەپارتامەنتى اقپارات بەرەتىنىن، اۋىلدىق وكرۋگتىڭ اكىمى اۋىل اقساقالدارىمەن شىعىپ كەتكەنىن جەتكىزدى.
23 شىلدەدە الەۋمەتتىك جەلىدە تاراعان ۆيدەولاردىڭ بىرىندە اۋىلدا اسكەريلەر جۇرگەنى، اۋىل تۇرعىندارىنىڭ مەكتەپكە ۇقساس عيمارات ماڭىندا جينالىپ تۇرعانى كورىنەدى.
تۇركىستان وبلىستىق دەنساۋلىق ساقتاۋ باسقارماسىنىڭ ايتۋىنشا، شورناق اۋىلىنىڭ ءۇش تۇرعىنى تۇركىستان قالالىق ورتالىق اۋرۋحاناسىنىڭ جاراقات بولىمىنە 21 شىلدەدە جەتكىزىلگەن. باسقارما 1998 جانە 1997 جىلى تۋعان ەكى تۇرعىن ورتاشا دارەجەدە جاراقات العانىن، ومىرىنە قاۋىپ جوق ەكەنىن ايتادى. ال 1998 جىلى تۋعان تاعى ءبىر تۇرعىن اۋىر كوز جاراقاتىمەن اۋرۋحاناعا جاتقىزىلعان.
شامامەن 11 مىڭنان استام تۇرعىنى بار شورناق اۋىلىندا قازاقتار مەن ەتنيكالىق وزبەكتەر تۇرادى.
Abai.kz
