قىتايدىڭ سىرتقى ىستەر ءمينيسترى 24 شىلدەدە اقش-تىڭ كونسۋلدىقتى باسقارۋ قۇقىعى جويىلعانىن حابارلادى. مينيسترلىك بۇل ارەكەتتى "اقش تارابىنىڭ نەگىزسىز ارەكەتىنە زاڭدى ءارى قاجەتتى جاۋاپ" دەپ اتادى.
21 شىلدەدە اقش ۇكىمەتى 72 ساعات ىشىندە قىتايدىڭ حيۋستونداعى كونسۋلدىعىن جابۋ تۋرالى شەشىم شىعارعاننان كەيىن ۆاشينگتون مەن پەكين اراسىنداعى قاتىناس ۋشىعا تۇسكەن. 23 شىلدەدە اقش مەملەكەتتىك حاتشىسى مايك پومپەو امەريكانىڭ ارىپتەستەرىن قىتاي كوممۋنيستىك پارتياسىنىڭ عالامدىق "گەگەمونيالىق" ەكپىنىنە بىرىگىپ قارسى تۇرۋعا شاقىردى. پومپەو ونداعان جىلدار بويعى پەكينمەن ىنتىماقتاستىقتان ويداعىداي ناتيجە شىقپاعانىن، قىتايدىڭ دەموكراتياعا قاراي بەت بۇرماعانىن ايتتى.
بۇعان دەيىن تەحاس شتاتىنداعى قىتاي كونسۋلدىعىن جابۋعا بايلانىستى تۇسىنىكتەمە بەرگەن اقش مەملەكەتتىك دەپارتامەنتىنىڭ وكىلى مورگان ورتاگۋس "امەريكالىق زياتكەرلىك مەنشىك پەن جەكە اقپاراتتى قورعاۋ" ماقساتىندا سونداي قادام جاسالىپ وتىرعانىن ايتقان.
Abai.kz
