ەسىم-سويى ەلگە تانىمال ايتىسكەر اقىن اينۇر تۇرسىنباەۆا باستاما كوتەرىپ، قولعا الىنعان قايىرىمدىلىق اكتسياسى بۇگىندە حالىقتىق سيپات الىپ، اشىق كوڭىل، كەڭقولتىق قايىرىمدى ازاماتتاردىڭ قولدانۋىنا يە بولعانى بەلگىلى.

بۇگىن تۇندە تۇركيادان 125 وتتەگى اپپارى تيەلگەن ارنايى ۇشاق ەلوردا اۋەجايىنا كەپ قوندى.

شارانى ۇيىمداستىرۋشى اينۇر تۇرسىنباەۆانىڭ ايتۋىنشا، العاشقىدا مەديتسينالىق قۇرالداردى جەتكىزۋدە ءبىرلى-جارىم قيىندىقتان تۋىنداعان. ەرىكتىلەر توبى قارجى جيناۋ جۇمىستارىن ۇيىمداستىرعان. ال ساتىپ الىنعان اپپاراتتاردى شەكارا ارقىلى راسىمدەۋدە كەدەرگىلەرگە تاپ بولعان. كەيىن بۇل ىسكە قر سىرتقى ىستەر مينيسترلىگى مەن قر دەنساۋلىق ساقتاۋ مينيسترلىگى قىزمەتكەرلەرى ارالاسىپ، قۇجاتتارعا قاتىستى بارلىق ماسەلەلەردى جەدەل ارادا شەشكەن.

«راس، ساپاسىز اپپاراتتاردى نەمەسە ءدارى-دارمەكتەردى پايدالانۋدا ونداي تاۋەكەلگە بارۋعا بولمايدى. جاۋاپكەرشىلىك بار. سوندىقتان قازاقستانعا شەتەلدەن اكەلىنەتىن بارلىق ءدارى-دارمەكتەر مەن مەديتسينالىق قۇرال-جابدىقتارعا باقىلاۋ بولۋى، ولاردىڭ ارقايسىسىنىڭ قۇجاتتارى بولۋى ءتيىس. ءبىز مۇنى جاقسى تۇسىنەمىز. ويتكەنى، ادامداردىڭ ءومىرى وسى اپپاراتتارعا بايلانىستى بولىپ وتىر.

شىندىعىندا، بىزدە بۇعان دەيىن تاجىربيە بولعان جوق. سوندىقتان، ءبىز ول مەدجابدىقتاردى جەتكىزۋدە كەيبىر ماسەلەلەردى ەسكەرمەدىك. بىراق، قازىر قۇۇزىرلى مينيسترلىكتەردىڭ ارالاسۋىمەن، بۇل ماسەلەلەر ءساتتى شەشىلدى. ساتىپ العان مەديتسينالىق جابدىقتاردىڭ العاشقى بولىگى ەلورداعا جەتتى.

ايتا كەتۋ كەرەك، بۇل ەل بولىپ، بىرلەسە اتقارعان اۋقىمدى ءىس. ەندى ەلدەگى ەرىكتىلەر بۇل اپپاراتتاردى مۇقتاج مەكەمەلەرگە جەتكىزۋمەن اينالىساتىن بولادى. بۇل اسار ارقىلى جيىلعان اقشاعا ساتىپ الىنعان اپپاراتتار. ءبىز وسىنداي قيىن كەزدە ءبىر-ءبىرىمىزدى قولداۋىمىز كەرەك»، - دەيدى اينۇر تۇرسىنباەۆا.

ايتا كەتەيىك، اتالعان وتتەگى كونسەنتراتتارىنىڭ ەلگە جەتكىزىلۋىنە جانە قۇجاتتىق راسىمدەۋىنە قول ۇشىن بەرگەن ازاماتتاردىڭ ءبىرى -  سەنات دەپۋتاتى دانا نۇرجىگىت حانىم. ول مەديتسينالىق اپپاراتتاردى ەرىكتىلەر توبىمەن بىرگە ەلوردا اۋەجايىنان كۇتىپ العان.

باستاماشىل توپ، قۇجاتتىق قيىندىقتارعا تاپ بولعان كەزدە ەلگە جەتكىزىلگەن اپپاراتتاردى «سق-فارماتسيا» كومپانياسىنا وتكىزبەستەن، ەرىكتىلەر ارقىلى تاراتۋعا رۇقسا سۇراپ، سەناتورعا حابارلاسقان.

سەناتور ءوز كەزەگىندە، ءدال وسىنداي وتىنىشپەن قر دەنساۋلىق ساقتاۋ مينيسترلىگىنە، پرەزيدەنت اكىمشىلىگىنە جۇگىنگەن. ناتيجەسىندە، ەل پرەزيدەنتى قاسىم-جومارت توقاەۆتىڭ ارالاسۋىمەن، بارلىق ماسەلەلەر وڭ شەشىلگەن.

اتالعان شاراعا پرەزيدەنتتىڭ ءباسپاسوز حاتشىسى بەرىك ءۋالي، ءپا-ءنىڭ وتىنىشتەردى قابىلداۋ ءبولىمىنىڭ باسشىسى تامارا دۇيسەنوۆا، قازاقستاننىڭ تۇركياداعى ەلشىلىگى ت.ب. مەملەكەتتىك مەكەمەلەر ارالاسىپ، قول ۇشىن بەرگەن.

«بۇل كۇردەلى جاعداي. سوندىقتان ەرەشك شەشىمدەردى قاجەت ەتەدى. ەرىكتىلەر توبىنىڭ بۇل ءىسى – وزگە دە مەملەكەتتىك اپپاراتتار ءۇشىن ۇلگى بولارلىق.

ادامدار – وسىنداي قيىن كەزدە ىندەتپەن بەتپە-بەت، جەكە قالمايتىنىن، ولاعا ەل ازاماتتارى، مەملەكەت كومەكتەسىتىنىن سەزىنۋى كەرەك.

ارينە، زاڭ اركەز ۇستەم بولۋى ءتيىس. ءدال وسى «ەكىنشى تىنىس» شاراسى – سوىنداي پاندەميا كەزىندە جەدەل ءىس-شارالار ءۇشىن قۇقىقتىق كەڭىستىك ازىرلەۋ كەرەكتىگىن كورسەتىپ وتىر.

بۇل كوروناۆيرۋس ەشكىمدى الەۋمەتتىك ستاتۋسىنا ءبولىپ قارامايدى. ەڭ الدىمەن ءبىز ادامبىز. سوندىقتان، پاندەميا كەزىندە وسىنداي شارالارعا تۇسىنىستىكپەن ءارى جاناشىرلىقپەن قولداۋ كورسەتۋ كەرەك!»، - دەيدى دانا نۇرجىگىت.

ايتا كەتەيىك، ەرىكتىلەردىڭ باستاماسىمەن ەلگە جەتكىزىلگەن وتتەگى كونسەنتراتتارىن ەلوردا اۋەجايىنان سەناتور دانا نۇرجىگىت كۇتىپ الدى. بۇل اپپاراتتار «سق-فارماتسيا» كومپانياسىنا بەرىلمەيدى. ولاردى تاراتۋمەن ەرىكتىلەر توبى اينالىساتىن بولادى.

اينۇر تۇرسىنباەۆا باستاما كوتەرىپ، قولعا الىنعان شارا الداعى ۋاقتا دا ءوز جالعاسىن تاپپاق. ەرىكتىلەر توبىنىڭ ايتۋىنشا، قايىرىمدىلىق اكتسياسىنا جينالعان اقشاعا تاعى 850 وتتەگى اپپاراتتارى الىنباق. ولار قىتايدان 2 اپتانىڭ ىشىندە جەتكىزىلەدى. ەرىكتىلەر وسىنداي اپپاراتتاردىڭ جالپى سانىن 1000 داناعا جەتكىزۋدى جوسپارلاپ وتىر ەكەن.

Abai.kz