ۇلەسكەرلەردىڭ سوزىنە قاراعاندا 2010 جىلى كەشەنگە ميلليونداپ اقشا قۇيعان كەزدە قۇرىلىس كومپانياسى كەشەندى ءبىر جىلدان كەيىن بىتىرەتىنىن ايتىپ، ۋادە بەرگەن. بىراق ۋادەلەرىن ءالى كۇنگە دەيىن ورىنداماي وتىر دەيدى. قازىر عيمارات قۇرىلىسىنىڭ 90 پايىزى اياقتالعان، گاز، سۋ تارتىلعانمەن جارىق ءالى قوسىلماعان.

- ەلۋ پايىزىن قۇيىپ قويىپ، قالعانىن كىلت العان كۇنى قۇيامىز دەپ وتىرعاندار بار، تولىق قۇيىپ قويعاندار دا بار. بۇل ءۇيدىڭ ءبىتۋىن كورە الماي، ءولىپ كەتكەندەر قانشاما. ءوزىمىز پاتەر جالداپ تۇرىپ جاتىرمىز. ءتورت بالام بار. كوكتەمدە اكىم كولگىنوۆ كەلىپ، ماسەلەلەرىمىزدى شەشىپ بەرۋگە ۋادە بەرگەن. بىراق بۇگىن كەلگەن جوق. قولاستىنداعى قىزمەتكەرلەردى جىبەرگەن ەكەن. ولار ماسەلەدەن مۇلدە بەيحابار. بۇگىن جولدى بەكىتەمىز دەپ ويلاعانبىز. بىراق ميليتسيالار ءبىزدى جىبەرگەن جوق. ەگەر جولدى جاپساڭدار، سوتتايمىز دەپ قورقىتتى، - دەيدى اقبانتيك قويشىبايقىزى ازاتتىق تىلشىسىنە.

نارازىلىق شاراسى كەزىندە كەيبىر تۇرعىندار "باسپانامىزدى كۇتىپ جۇرگەنىمىزگە ون جىل بولدى" دەگەن جازۋى بار ۇلكەن پلاكات ۇستاپ تۇردى. بىتپەگەن عيماراتتىڭ سىرتىندا "بيلىكتىڭ ارەكەتسىزدىگى حالىقتىڭ سەنىمىن جويادى", "اكىمدىك، 30-بلوكتى پايدالانۋعا بەرىڭىزدەر، ءبىزدىڭ باراتىن جەرىمىز جوق" دەپ جازىلعان باننەرلەر ءىلىنىپ تۇردى.

ۇلەسكەرلەردىڭ ايتۋىنشا، استانا ورتالىعىنداعى كوزگە تۇسەتىن عيماراتتاردىڭ ءبىرى 12 قاباتتى كەشەندەگى پاتەرلەرىنە امالسىز قالتاسىنان قارجى شىعارىپ، ءوز بەتىنشە جوندەپ العان تۇرعىندار دا بار. ولاي ىستەۋگە قارجىلاي مۇمكىندىگىمىز جوق دەيدى نارازى ۇلەسكەرلەر.

نارازى تۇرعىنداردىڭ شاعىمىن تىڭداعان نۇر-سۇلتان قالاسىنىڭ قۇرىلىس باسقارماسىنىڭ وكىلدەرى "ماسەلەگە قۇرىلىس كومپانياسى جاۋاپتى ەكەنىن" ايتىپ، تەك كۇزدە "جابدىقتاۋ ماسەلەسى بويىنشا كومەكتەسەتىنىن" جەتكىزدى. ازاتتىق ءتىلشىسى ASI قۇرىلىس كومپانياسىنىڭ باسشىلىعىنا حابارلاسقانمەن ازىرگە جاۋاپ الا المادى.

Abai.kz