پاۆلودار وبلىسىنىڭ اكىمى

ابىلقايىر ىسقاقوۆتىڭ نازارىنا!

ابىلقايىر ىسقاقوۆ باسشىلىق ەتەتىن پاۆلودار وبلىسىندا، پاۆلودار وبلىسىنداعى ەكىباستۇز قالاسىندا قازاق مەكتەبىنىڭ اتى بار دا، زاتى جوق!

ناقتىراق ايتساق، ەكىباستۇز قالاسىنداعى №25 قازاق قىزدار گيمنازياسى  27 جىل بويى (1993 جىلدان بەرى قاراي) وقۋشىلاردى «قاڭعىرىپ» ءجۇرىپ وقىتىپ كەلەدى. ويتكەنى، جەكە ءبىلىم ورداسىنىڭ رەسمي اتى بار بولعانىمەن، جەكە وقۋ عيماراتى جوق ەكەن. بۇل تۋرالى ساياساتكەر، ۇلتتىق قوعامدىق سەنىم كەڭەسىنىڭ مۇشەسى ەرلان سايروۆ الەۋمەتتىك جەلىدەگى پاراقشاسىندا جازدى.

ۇقسك مۇشەسى ەرلان سايروۆتىڭ اتىنا ەكىباستۇزداعى قازاق قىزدار گيمنازياسى اتا-انالارى مەن قالا تۇرعىندارىنان ءوتىنىش تۇسكەن.

وندا №25 قازاق قىزدار گيمنازياسى وسى ۋاقىت ىشىندە (27 جىلدا) 4 رەت ورىن اۋىستىرعانى، ال 2008 جىلدان بەرى №24 ءورىستىلدى مەكتەپ عيماراتىنىڭ ءبىر قاناتىندا «سىعىلىسىپ» وقىپ جاتقانى باياندالعان. جاڭاعى ءورىستىلدى مەكتەپتىڭ ءوزى 1200 ورىنعا ەسەپتەلگەن. سول 1200 ورىننان قازاق قىزدار گيمنازياسىنا دەپ 200 ورىن بولىنگەن. №25 قازاق گيمنازياسىنىڭ 422 وقۋشىسى سول 200 ورىندا 2 اۋىسىمدا وقۋعا ءماجبۇر كورىنەدى.

وسى ماسەلەنى كوتەرگەن ەرلان سايروۆ پاۆلودار وبلىسىنىڭ اكىمى ابىلقايىر ىسقاقوۆتىڭ اتىنا رەسمي حات جولداپتى. حاتتىڭ ءبىر داناسى قر ءبىلىم جانە عىلىم مينيسترلىگىنە دە جولدانعان.

وبلىس اكىمدىگى وسى ماسەلەنى شەشىپ بەرۋى كەرەك!

ەرلان سايروۆ:

- قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى رەتىندە، مەنىڭ اتىما پاۆلودار وبلىسى، ەكىباستۇز قالاسىنداعى №25 قازاق قىزدار گيمنازياسى اتا-انالارىنىڭ جانە ەكىباستۇز قالاسى تۇرعىندارىنان ءوتىنىش ءتۇستى.

وندا №25 قازاق قىزدار گيمنازياسى 1993 جىلدان كۇنى بۇگىنگە دەيىن، ياعني 27 جىل بويى جەكە عيماراتسىز ءبىلىم بەرىپ كەلەدى دەپ جازىلعان. وسى جىلدار ىشىندە 4 رەت ورىن اۋىستىرعان. ال 2008 جىلدان بەرى 1200 ورىنعا ارنالعان №24 ءورىستىلدى مەكتەپ عيماراتىنىڭ 200 ورىندىق ءبىر قاناتىندا 422 وقۋشى قىز ءبىلىم الىپ ءجۇر ەكەن.

مەكتەپ ولارعا 13 قانا سىنىپ ءبولىپ بەرگەن. وقۋشىلار II اۋىسىمدا وقيدى. ەكى اۋىسىم بولعاندىقتان جانە سىنىپ بولمەلەرىنىڭ جەتىسپەۋشىلىگىنەن بالالاردىڭ قوسىمشا ءبىلىم الۋىنا، ۇيىرمەلەر مەن سەكتسيالارعا بارۋىنا مۇمكىندىك جوق دەسە دە بولادى.

گيمنازيانىڭ جەتىستىكتەرى دە از ەمەس! ساپالى ءبىلىم، سانالى تاربيە بەرىپ كەلە جاتقان مۇعالىمدەردىڭ دە دەڭگەيلەرى جوعارى.

جەرگىلىكتى اكىمدىك 2017-2018 جىلدارى جاڭا عيمارات سالىپ بەرەمىز دەپ، جازباشا تۇردە جاۋاپ بەرگەن ەكەن. 2018 جىلدىڭ 11 ماۋسىمىندا قالا اكىمى قايرات نۇكەنوۆ: «21-شاعىن اۋداندا قازاق قىزدار گيمنازياسىنا ارنالعان 900 ورىنعا ارنالعان مەكتەپ قۇرىلىسىن سالۋعا جوبالىق سمەتالىق قۇجاتتاما ازىرلەندى»، - دەگەن جاۋاپ حات جىبەرگەن.

بىراق، ودان بەرى قوزعالىس بايقالمايدى. «باياعى جارتاس، سول جارتاس...» بۇل ادىلەتسىزدىكتىڭ تامىرىنا بالتا شاباتىن ۋاقىت جەتتى. وبلىس اكىمدىگى وسى ماسەلەنى ادىلەتتى شەشىپ بەرۋى كەرەك!  ال وعان وبلىس اكىمىنىڭ قاۋقارى، نيەت-جىگەرى جەتە مە؟ بۇل سۇراق تا وتە وزەكتى!

№25 قازاق قىزدار گيمنازياسى قازىرگى زامان تالابىنا ساي ساپالى ءبىلىم بەرىپ قويماي، قازاق قىزدارىنا ءتالىم-تاربيە، ادەت-عۇرىپتى، سالت-ءداستۇردى ساقتاۋعا ۇيرەتىپ، وتباسىلىق قۇندىلىقتاردى جانە مورالدىك-پسيحولوگيالىق ۇستانىمداردى سىڭىرۋدە. گيمنازيانىڭ ماقساتى، تاربيە جۇمىسى ۇلتتىق قۇندىلىقتارعا نەگىزدەلگەن. بۇل ۇلتتىق تاربيە جۇيەسىنىڭ مودەلى دەپ تە ايتۋعا بولادى.

وسىنداي قازاق مەكتەپتەرىن كوبەيتۋ – ءبىرىنشى كەزەكتە مەملەكەتتىڭ مىندەتى. ال ءبىز وسىنداي مەۋكتەپتەردىڭ قاجەتتەرىن، سۇرانىستارىن قولداي الماي وتىرمىز. نەگە وسى ماسەلە بۇگىنگى كۇنگە دەيىن شەشىلمەي كەلدى؟

مەن ۇلتتىق كەڭەستىڭ مۇشەسى رەتىندە، وبلىس اكىمىنىڭ اتىنا رەسمي حات جولدادىم. تۇشىمدى ءارى ناقتى جاۋابىن كۇتەمىن!

ءتۇيىن. ابىلقايىر ىسقاقوۆ پاۆلودار وبلىسىنىڭ اكىمى قىزمەتىنە بيىل قاڭتار ايىندا تاعايىندالعان. ەكونوميكا، قارجى سالاسىندا ءبىلىم العان اكىم مىرزا قارجى مينيسترلىگىندە ءبىرشاما لاۋازىمدى قىزمەتتەر اتقارعان.

قازىرگى ۋاقىتتا پاۆلودار وبلىسىندا ۇزىن-ىرعاسى 416 مەكتەپ جانە مەكتەپ-ينتەرناتى، دارىندى بالالارعا ارنالعان مامانداندىرىلعان 14 مەكتەپ، 2 گيمنازيا مەن 2 ليتسەي، 12 مامانداندىرىلعان مەكتەپ، 25 كاسىپتىك مەكتەپ پەن ليتسەي، 29 كوللەدج، 2 ۋنيۆەرسيتەت پەن 2 ينستيتۋت بار كورىنەدى. بۇل وبلىستاعى ءبىلىم وشاقتارىنىڭ ناقتى سانى دەي المايمىز. الەمتورداعى اشىق دەرەككوزدەرىنىن (Wikipedia) الىنعان مالىمەتتەر. ناقتىسىن وبلىستىق اكىمدىك، وبلىستىق ءبىلىم باسقارماسى ايتا جاتار... ءبىزدىڭ ايتپاعىمىز مىناۋ:

راس، ابىلقايىر باقتىبايۇلىنىڭ ءوڭىر باسشىلىعىنا بارعانىنا جىل تولعان جوق. دەسە دە، ءوزى باسشىلىق ەتەتىن وڭىردەگى ءبىلىم وشاقتارىنىڭ احۋالىمەن تانىسىپ شىعۋ ءۇشىن وسى 6-7 اي ۋاقىت جەتكىلىكتى ەمەس پە؟.. ءوزى دە سول پاۆلودار وبلىسىنىڭ تۋماسى ەكەن. ەندەشە، ءوڭىر باسشىلىعىنا بيىل كەلسە دە، بوتەن ادام ەمەس.

انە، ەكىباستۇزداعى №25 قازاق قىزدار گيمنازياسىنىڭ وقۋشىلارى 27 جىل بويى «قاڭعىرىپ» ءجۇرىپ ءبىلىم الىپ كەلىپتى. بۇل ەندى قاشانعا دەيىن جالعاسپاق؟ پاۆلودار وبلىسى باسشىلارى 27 جىلدا ءبىر مەكتەپ سالا الماعان با؟ (بۇل جەردە ناقتى №25 گيمنازيانىڭ عيماراتىن ايتىپ تۇرمىز). بۇل ماسقارا جايتقا كىم، قاي اكىم، نە دەيدى؟

ساياساتكەر ە.سايروۆتىڭ پاۆلودار وبلىسى اكىمى ءا.ىسقاقوۆقا جازعان حاتى:

Abai.kz