11 تامىزدا مينسكىدە ميليتسيا BBC جۋرناليستەرىنە شابۋىل جاسادى. ۇستالعانداردىڭ بارىنە ەلدىڭ سىرتقى ىستەر مينيسترلىگى تاراپىنان بەرىلگەن اككرەديتاتسيا بولعان.

قارا كيىمدەگى ەر ادامار جۋرناليستەردەن اككرەديتاتسيانى تالاپ ەتكەن. ولاردىڭ ءبىرى ءتىلشىنىڭ موينىنداعى جۋرناليست ەكەنىن كۋالاندىراتىن كۋالىگىن ءۇزىپ، قولىنداعى كامەرانى جۇلىپ العان. جۋرناليستەر كامەرانى قايتارۋدى تالاپ ەتكەندە، ميليتسيا قىزمەتكەرلەرى ولاردى ۇرا باستاعان. بىراق جۋرناليستەردى ۇستاماعان.

11 تامىزدا نارازىلىق بىلدىرۋشىلەر سانى 10 تامىزعا قاراعاندا از بولدى. قارسىلىق بىلدىرگەن جاستار توپ-توپپەن ءبولىنىپ، ميليتسيا قۋدالاۋىنان قاشىپ ءجۇردى. تۇنگە قاراي قارسىلىق شاراسى ۋرۋچە مەن ستۋدەنتتىك قالاشىق اۋداندارىندا جالعاستى.

مينسكىدە "ناستوياششەە ۆرەميا" حابارىنىڭ ەفيرىندە اكتسياعا قاتىسۋشىلاردىڭ ءبىرى قالادا ينتەرنەت جوق ەكەنىن، باسقا ايماقتا نە بولىپ جاتقانىنان حابارسىز ەكەنىن جەتكىزدى.

ماسكەۋدە تۇراتىن بەلارۋس ازاماتتارى ەلشىلىك الدىندا "وزبىرلىق كورسەتۋشىلەر سوتتا جاۋاپ بەرۋى ءتيىس!" دەگەن ۇرانمەن اكتسيا وتكىزدى.