بەيسەنبى, 1 قازان 2020
COVID-19 قازاقستاندا. جۇقتىرعاندار — 107908. جازىلعاندار — 102874. قايتىس بولعاندار — 1725
انىق-قانىعى 934 2 پىكىر 14 تامىز, 2020 ساعات 14:45

مەشىتتەر اشىلا ما؟ قمدب مالىمدەمەسى

قازاقستان ۇكىمەتى كوروناۆيرۋستىڭ جاپپاي تارالۋىنا بايلانىستى شىلدەنىڭ باسىندا جاريالانعان كارانتين شارالارىن 17 تامىزدان باستاپ جەڭىلدەتەتىنىن مالىمدەگەن ەدى. 

الايدا، ۇكىمەت قۇرامى اقىلداسىپ بەكىتكەن كارانتين شارالارىن كەزەڭ-كەزەڭىمەن الىپ تاستاۋ جوسپارى بويىنشا ءدىني نىسانداردىڭ جۇمىسىنا قويىلعان شەكتەۋ ساقتالاتىنى ايتىلعان.

وسىعان بايلانىستى بۇگىن قازاقستان مۇسىلماندارى ءدىني باسقارماسى ارنايى مالىمدەمە جاساپ، مەشىت تولىمدىلىعىن 30 پايىزدان اسىرماۋ، كارانتيندىك تالاپتاردى ساقتاي وتىرىپ، مەشىتتەردى كەزەڭ-كەزەڭىمەن اشۋ جونىندە مالىمدەمە جاسادى.


قمدب مالىمدەمەسى:

قادىرلى جاماعات!

وزدەرىڭىزگە بەلگىلى، كەشە وتكەن مەملەكەتتىك كوميسسيا وتىرىسىندا كارانتين شارالارىن كەزەڭ-كەزەڭىمەن الىپ تاستاۋ جوسپارى قارالدى. ەلىمىزدەگى سانيتارلىق-ەپيدەميولوگيالىق جاعدايعا بايلانىستى شەكتەۋ شارالارىن جەڭىلدەتۋ جونىندە ۇسىنىستار ايتىلدى. الايدا ءالى دە تىيىم سالىنعان ورتالىقتاردىڭ قاتارىندا ءدىني نىسانداردىڭ بار ەكەندىگى ءمالىم بولدى.

قازاقستان مۇسىلماندارى ءدىني باسقارماسى وسى ماسەلەگە بايلانىستى قۇزىرەتتى مەكەمەلەرگە كارانتين تالاپتارىن ساقتاي وتىرىپ، مەشىتتەردى قايتا اشۋ تۋرالى ۇسىنىس بەرگەن بولاتىن. وتكىزىلگەن كەلىسسوزدەردە قمدب ۇسىنىسى قۇپتالۋدا. مەشىت تولىمدىلىعىن 30 پايىزدان اسىرماۋ، 1 كەلۋشىگە 4 شارشى مەتر تالابىن ساقتاي وتىرىپ، مەشىتتەردى كەزەڭ-كەزەڭىمەن اشۋ تالقىلانۋدا. اللا قالاسا، جۋىردا مەشىتتەرىمىز قايتا اشىلادى دەگەن ۇلكەن ءۇمىت بار.

قۇرمەتتى باۋىرلار!

ارينە، اللا ۇيلەرى بوس قالىپ، قۇلشىلىق جاساۋعا مۇمكىندىك بولماي جاتقانى بارىمىزگە اۋىر باتۋدا. مامىر ايىنىڭ باسىندا، ياعني ەلىمىزدە ەپيدەميولوگيالىق جاعداي جاقسارا باستاعان كەزدە قمدب مەشىتتەردى قايتا اشۋدى قولعا العان بولاتىن. الايدا ول ۇزاققا سوزىلمادى. ىندەتتىڭ تارالۋى كۇشەيىپ، مەشىت قىزمەتىنە قايتادان شەكتەۋ قويىلدى. ويتكەنى، اۋرۋ جۇقتىرعان جانداردىڭ سانى كۇرت ءوسىپ كەتتى. كوز جۇمعاندار سانى دا از بولمادى.

يسلام ءدىنى ادامنىڭ ءومىرى مەن دەنساۋلىعىن ارقاشان جوعارى قويادى. ال مەملەكەتىمىزدىڭ جۇقپالى دەرتكە قارسى قابىلداعان بارلىق شاراسى ادام بالاسىن امان ساقتاپ قالۋعا باعىتتالعان. بىز ونى دۇرىس ءتۇسىنۋىمىز قاجەت.

قۇلشىلىق ۇيلەرى كوپ ادام شوعىرلاناتىن ورىن بولعاندىقتان، قمدب مەشىت قىزمەتىنە ۋاقىتشا شەكتەۋ قويۋعا ءماجبۇر بولدى. بۇل ءبىزدىڭ ەلىمىزدە عانا ەمەس، باسقا مۇسىلمان مەملەكەتتەرىندە دە وسىنداي شەشىم قابىلداندى. اللا قالاسا، بۇل دا ۋاقىتشا شەكتەۋ. قازىر جاعداي تۇراقتالىپ كەلەدى. از عانا توزىمدىلىك تانىتساق، جاماعاتپەن ناماز وقيتىن كۇنگە دە جەتەمىز. بۇل سىناقتىڭ سوڭعى ناتيجەسى – اللانىڭ قۇزىرىندا. سوندىقتان بولاشاقتان كۇدەر ۇزبەي، سابىرلى قالپىمىزدان تانباي، دۇعا ەتەيىك.

راببىمىز قاسيەتتى قۇراندا: «ەگەر پەندەلەرىم سەنەن مەن تۋرالى سۇراسا (ولارعا ايتىپ قوي): مەن ولارعا وتە جاقىنمىن، تىلەك تىلەۋشىنىڭ دۇعاسىنا جاۋاپ بەرەمىن. ەندەشە، ولار دا ءامىرىمدى قابىل ەتسىن جانە ماعان سەنسىن. بالكىم تۋرا جول تابار» («باقارا» سۇرەسى، 186-ايات); «ماعان دۇعا ەتىڭدەر، سەندەرگە جاۋاپ بەرەمىن» («عافير» سۇرەسى، 60-ايات) دەپ ۋادە ەتكەن.

وسى رەتتە جاراتقاننىڭ امىرىنە بويسۇنىپ، ۇزدىكسىز دۇعا جاساپ، تالاپ پەن تارتىپكە باعىنىپ، مۇسىلماندىق مىندەتىمىزدى ورىندايىق. اللا قالاسا، كوپ ۇزاماي بۇل كۇندەر دە ارتتا قالادى.

حاق تاعالا مەشىتتەرىمىز اشىلىپ، كوپشىلىكپەن قۇلشىلىق جاسايتىن كۇندى جاقىن ەتكەي. ءامين!

قازاقستان مۇسىلماندارى ءدىني باسقارماسى

Abai.kz

2 پىكىر