بەيسەنبى, 28 ناۋرىز 2024
ساڭلاق 4252 0 پىكىر 24 تامىز, 2020 ساعات 12:02

قوڭقاباەۆ پەن قۇلاحمەت كاسىپقوي بوكستا جەڭىسكە جەتتى

قوڭقاباەۆ (سول جاقتا) پەن قۇلاحمەت (وڭ جاڭقتا)

الماتى قالاسىندا MTK Kazakhstan پروموۋتەرلىك كومپانياسىنىڭ ۇيىمداستىرۋىمەن كارانتيننەن كەيىنگى العاشقى بوكس كەشى ءوتتى.

كەشتىڭ باستى جەكپە-جەگىندە اۋەسقوي بوكستان ۇلتتىق قۇراما كاپيتانى، الەم چەمپيوناتى مەن ازيا چەمپيوناتىنىڭ ەكى دۇركىن كۇمىس جۇلدەگەرى قامشىبەك قوڭقاباەۆ يسا اقبەرباەۆپەن (20-1, 15 كو)* جۇدىرىقتاستى.

قوڭقاباەۆ كاسىپقوي رينگتەگى العاشقى جەكپە-جەگىن وتكىزىپ وتىرعانىنا قاراماستان، اسا تاجىريبەلى اقبەرباەۆتى نوكاۋتپەن جەڭدى. العاشقى اۋىر سالماق دارەجەسىندە (90,1 كەلى) وتكەن جەكپە-جەك 8 راۋندقا ەسەپتەلگەن، بىراق ەكىنشى رانۋدتا اياقتالدى. بۇيىردەن جاسالعان اۋىر سوققىدان كەيىن يسا جەكپە-جەكتى جالعاستىرا المادى.

ايتا كەتەيىك، اقبەرباەۆ رينگكە وتكەن جىلدىڭ 2 قاراشاسىندا شىققان بولاتىن. جەرلەسىمىز ەكاتەرينبۋرگتە وتكەن بوكس كەشىندە رەسەيلىك ەۆگەني تيششەنكودان (7-0, 5 كو) جەڭىلىپ قالعان بولاتىن. ەۆگەني تيششەنكو دا قازاقستاندىق جانكۇيەرلەرگە جاقسى تانىس. ول 2016 جىلى وليمپيادا ويىندارىنىڭ فينالىندا ۆاسيلي لەۆيتتى داۋلى جاعدايدا جەڭگەن ەدى.

ال قامشىبەك قوڭقاباەۆ تامىز ايىنىڭ باسىندا عانا كاسىپقوي بوكسقا اۋىسقان بولاتىن. بىراق ول كاسىپقويعا ءبىرجولا بەت بۇرعان جوق. ءوزىنىڭ ايتۋىنشا، باستى ماقسات -  كاسىپقوي رينگتە بىرنەشە جەكپە-جەك وتكىزىپ، وليمپيادا ويىندارىنىڭ الدىندا تاجىريبە جيناقتاۋ.

قامشىبەكتىڭ اۋەسقوي بوكستا جەتكەن جەتكەن جەتىستىگى از ەمەس. +91 كەلىدە الەم چەمپيوناتى مەن ازيا چەمپيوناتىندا ەكى مارتە كۇمىس مەدال العان. بىراق ەسكى قارسىلاسى وزبەكستاندىق باحودير جالولوۆقا ەسەسى كەتىپ ءجۇر. وزبەك بوكسشىسى كاسىپقوي بوكستا بىرنەشە جەكپە-جەك وتكىزىپ ۇلگەردى. قامشىبەك كاسىپقوي بوكستا شىڭدالعان وسى قارسىلاسىنا قارسى دايىندالۋ ءۇشىن دە وسى قادامعا (كاسىپقويعا) بارعان بولۋى مۇمكىن.

ال كەشتىڭ نەگىزگى جەكپە-جەگىندە قازاقستاندىق ۆيكتور كوتوچيگوۆ (11-0, 4 كو) بەلارۋس بوكسشىسى اندرەي يساەۆتى (30-17, 9 كو) جەڭدى. بۇل جەكپە-جەك ءۇشىنشى راۋندتا توقتاتىلدى. وسىلايشا، ۆيكتور كاسىپقوي رينگتەگى 12 جەكپە-جەگىنىڭ بارىندە جەڭىسكە جەتتى.

بوكس كەشىنىڭ نەگىزگى كاردى اياسىندا كاسىپقوي بوكستا تاجىريبەلى ساعادات راحمانقۇلوۆ (6-1-0) پەن اۋەسقوي بوكستا اتوي سالعان تۇرسىنباي قۇلاحمەت كەزدەستى. جەكپە-جەك ءتورتىنشى راۋندتان كەيىن توقتاتىلدى. جاراقات العان ساعادات كەزدەسۋدى جالعاستىرا المادى. ءسويتىپ، تۇرسىنباي كاسىپقوي بوكستاعى مانسابىن ءساتتى باستادى.

ايتا كەتەيىك، اۋەسقوي بوكستا 75 كەلىگە دەيىنگى سالماق دارەجەسىندە ونەر كورسەتكەن تۇرسىنباي قۇلاحمەت كاسىپقوي بوكسقا بيىل جىل باسىندا اۋقان. ول 2019 جىلى ازيا چەمپيوناتىندا, قر پرەزيدەنتى كۋبوگىندا جەڭىسكە جەتتى. بىراق ەكاتەرينبۋرگتە وتكەن الەم چەمپيوناتىندا فيليپيندىك ەۋمير مارسيالدان جارتىلاي فينالدا جەڭىلگەن بولاتىن.

تالعات شايكەن

بۇل كەشتە ءبىرىنشى ورتا سالماقتا ونەر كورسەتەتىن 19 جاستاعى جاس بوكسشى تالعات شايكەن دە كاسىپقوي رينگتەگى العاشقى جەكپە-جەگىن وتكىزدى. ءتۋرنيردىڭ دەبيۋتانتى التى راۋندتىڭ قورىتىندىسى بويىنشا تورەشىلەردىڭ ءبىراۋىزدى شەشىمىمەن پرو-رينگتە ۇتىلىپ كورمەگەن بەرىكباي نۇرىمبەتوۆتى (5-0-0, KO1) جەڭدى.

تالعات - 2018 جىلى ارگەنتينادا وتكەن جاسوسپىرىمدەر وليمپياداسىنىڭ كۇمىس جۇلدەگەرى، جاستار اراسىنداعى ازيا چەمپيونى. سونىمەن قاتار، ۆەنگرياداعى حالىقارالىق تۋرنيردە جانە نۇر-سۇلتانداعى پرەزيدەنت كۋبوگىندا جۇلدەگەر اتانعان.

كەشتىڭ نەگىزگى كاردى اياسىنداعى كەزەكتى جەكپە-جەك ساپارباي ايداروۆ (4-0-0) پەن اباي تولەش (5-0-0) اراسىندا ءوتتى. جەكپە-جەك تولىق سەگىز راۋندقا جالعاسىپ، ايداروۆتىڭ جەڭىسىمەن اياقتالدى. ەكىنشى راۋندتا اباي تولەش اۋىر نوكداۋنعا ءتۇسىپ قالدى. وسىلايشا، تولەش كاسىپقوي بوكستاعى العاشقى جەڭىلىسىنە ۇشىرادى.

ال كەشتىڭ العاشقى كاردى اياسىندا ءۇش جەكپە-جەك ءوتتى. وندا جارتىلاي ورتا سالماقتا جۇدىرىقتاسقان نۇردوس تولەباي (3-0, 1 كو) نۇرجان ماقاشباەۆتى (0-0-2), راي سەيتجانوۆ (2-0-0) تالعات بەرتىلەۋوۆتى (0-1) تورەشىلەردىڭ شەشىمىمەن جەڭدى. ال ءبىرىنشى اۋىر سالماقتا ونەر كورسەتەتىن قازاقستاندىق بوكسشى الي بالوەۆ (9-0, 7 كو) بەلارۋس يۋري بىحوۆتسەۆتان (10-19-3, 5 كو) باسىم ءتۇستى.

سونداي-اق، بۇل كەشتە ءوتۋى ءتيىس تاعى ءۇش جەكپە-جەك كۇشىنەن قالدى. سەبەبى وزبەكستاندىق ءۇش بوكسشى - حۋسان يۋلداشەۆ، باحروم پايازوۆ جانە شاۆكات حاليلوۆ شەكارادان وتە الماعان ەكەن.

* بوكسشىلاردىڭ كورسەتكىشى (رەكوردى) كەشەگى جەكپە-جەككە دەيىنگى ناتيجەمەن كورسەتىلدى

قۋانىش قاپپاس

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1561
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2251
عيبىرات

قايسار رۋحتى عازيز جان

مۇحتار قۇل-مۇحاممەد 3504