11 تامىز كۇنى ۆ.پۋتين كوروناۆيرۋسقا قارسى رەسەي ۆاكتسيناسىنىڭ تىركەۋدەن وتكەنىن مالىمدەدى. گامالەيا ورتالىعى جاساعان "سپۋتنيك V" ۆاكتسيناسى بارلىق سىناقتان ءساتتى وتكەن. ال، كۇنى كەشە قر دەنساۋلىق ساقتاۋ ءمينيسترى الەكسەي تسوي رەسەي ۆاكتسيناسىن ساتىپ الۋ تۋرالى كەلىسىم جۇرگىزۋ ءۇشىن ماسكەۋگە بارىپتى.

بۇل تۋرالى مينيسترلىكتىڭ رەسمي وكىلى باعدات قوجاحمەتوۆ حابارلاعان.

«مينيستر بىرلەسكەن دەلەگاتسيا قۇرامىمەن ماسكەۋگە ۇشىپ كەتتى. بۇل جىل سايىنعى مەملەكەتتەر اراسىنداعى ۇكىمەتارالىق كەزدەسۋلەر، ەكونوميكالىق جانە قارجىلىق جوبالاردى تالقىلايتىن الاڭ.

وسى ساپار اياسىندا دەنساۋلىق ساقتاۋ سالاسىن بىرلەسە دامىتۋ جانە كوروناۆيرۋستىق ينفەكتسياعا قارسى ۆاكتسينانى ساتىپ الۋ ماسەلەسى دە قاراستىرىلىپ وتىر. ەگەر رەسەيلىك، امەريكالىق نەمەسە باسقا شەتەلدىك ۆاكتسينالار حالىقارالىق سەرفيكاتتار بويىنشا بارلىق قاجەتتىلىكتى قاناعاتتاندىراتىن بولسا، ونى ەلىمىز ساتىپ الۋعا نيەتتى. ەشقانداي ايىرماشىلىق جوق، مەيلى امەريكالىق بولسىن، رەسەيلىك بولسىن، باستىسى ول حالىقارالىق ستاندارتتارعا ساي كەلۋى ءتيىس»,- دەدى قوجاحمەتوۆ.

قوجاحمەتوۆتىڭ ايتۋىنشا، قازىر كوروناۆيرۋستىڭ تارالۋىن تەجەيتىن ۆاكتسينا ازىرلەپ جاتقان 10 ءوندىرۋشى بار.

«بۇلار ىندەتتىڭ بەتىن قايتاراتىن ەم-دوم تاسىلدەرىن ىزدەستىرۋدە. كلينيكالىق سىناقتىڭ ءۇشىنشى، ءتورتىنشى ساتىدان وتكەسىن بارىپ سەرتيفيكات الادى.

كوروناۆيرۋسقا قارسى ۆاكتسينا ويلاپ تاباتىن ەلدەرمەن تەز ارادا مەموراندۋمعا وتىرىپ ۇلگەرۋ كەرەك. حالىقتىڭ 10 پايىزىن ەرتە باستان ەگۋ قاجەت دەگەن ددسۇ-نىڭ اقىل-كەڭەسىن ەسكەرۋگە ءتيىسپىز. تۇپتەپ كەلگەندە ۆاكتسينانىڭ قاي ەلدە جاسالعانى ماڭىزدى ەمەس»,- دەدى مينيسترلىك وكىلى.

تسوي: ۆاكتسينا ەرىكتى تۇردە جاسالادى

بۇعان دەيىن دەنساۋلىق ساقتاۋ ءمينيسترى ۆاكتسينانىڭ ەرىكتى تۇردە جۇرگىزىلەتىنىن ايتقان.

«قوعامدىق دەنساۋلىق ساقتاۋ كودەكسىنە سايكەس بىزدە مىندەتتى جانە ەرىكتى ۆاكتسينالار بار. ءبىز كوروناۆيرۋسقا قارسى ۆاكتسينانى ەرىكتى تۇردە ەنگىزۋدى قاراستىرىپ جاتىرمىز. سەبەبى ۇزاق مەرزىمدى ناتيجەلەر مەن اسەرلەر ءالى مۇقيات زەرتتەلگەن جوق. بىراق بىزدە رۇقسات بولۋى كەرەك، قازاقستاندا ۆاكتسينالاردى قولدانۋ مۇمكىندىگى بار» ، - دەگەن ەدى تسوي.

سونىمەن قاتار، مينيستر ۆاكتسينانىڭ قاۋىپ-قاتەرگە دۋشار بولعان ادامدارعا، دارىگەرلەرگە، قارتتار مەن سوزىلمالى اۋرۋلارى بار ناۋقاستارعا تەگىن بولاتىنىن ايتقان.

جاۋاپكەرشىلىك كىمنىڭ موينىندا بولادى؟

سونداي-اق، تسوي اتالعان ۆاكتسيناعا قاتىستى جاۋاپكەرشىلىك كىمدە بولاتىنىن ايتتى. اتالعان ۆاكتسينانىڭ ساپاسى مەن قاۋىپسىزدىگىن قاداعالايتىن ارنايى كوميسسيا قۇرىلادى ەكەن.

«بىزدە ءدارى-دارمەكتەر مەن مەديتسينالىق ماقساتتاعى بۇيىمداردى ساراپتاۋدىڭ ۇلتتىق ورتالىعى بار، ول كەز-كەلگەن ءونىمنىڭ، ونىڭ ىشىندە ۆاكتسينالاردىڭ تيىمدىلىگى مەن قاۋىپسىزدىگىن باعالايدى. ءبىزدىڭ باعالاۋىمىز حالىقارالىق زاڭنامانى تولىعىمەن قايتالايدى، بىردەي تالاپتار قويىلادى. اقش پەن ەو-داعى قاعيداتتار بىردەي جانە مەرزىمدەرى بىردەي»، - دەدى مينيستر.

الايدا، كەز-كەلگەن ءدارى-دارمەككە جاعىمسىز رەاكتسيالار پايدا بولۋى مۇمكىن.

«كوميسسيا قۇرىلىپ جاتىر، ول ۆاكتسينانىڭ قالاي جەتكىزىلگەنىن، ونىڭ بارلىق ساتىلاردا قانشالىقتى جاقسى ساقتالعاندىعىن، دۇرىس ەنگىزىلگەندىگىن، قارسى كورسەتىلىمدەردىڭ بار-جوعىن جانە ءدارى-دارمەكتىڭ ساپاسىن تەكسەرەدى.

ەگەر، مىسالى، ۆاكتسينا قارسى اۋرۋلارى بار كەيبىر ناۋقاستارعا سالىنسا،  بۇل ۆاكتسيناتسياعا رۇقسات بەرگەن دارىگەردىڭ جاۋاپكەرشىلىگى. ەگەر ماسەلە ساپاعا قاتىستى بولسا، وندا جاۋاپكەرشىلىكتى ۆاكتسينانى باعالاعان الادى. ەگەر لوگيستيكالىق تالاپتار بۇزىلسا، دۇرىس ەمەس جاعدايدا تاسىمالدانعان بولسا، وندا لوگيست مامان جاۋاپتى بولادى», - دەپ تۇسىندىرگەن تسوي.

ايتا كەتەيىك، بۇعان دەيىن وكق-دا وتكەن ءباسپاسوز ءماسليحاتىندا دەنساۋلىق ساقتاۋ مينيسترلىگىندەگى شەنەۋنىكتەر قازاقستاندىق ۆاكتسينانىڭ كلينيكالىق سىناقتارىنا قاتىساتىنى تۋرالى سۇراق قويىلعان. قوجاحمەتوۆ ول تۋرالى الەكسەي تسويمەن سويلەسكەنىن ايتقان. سونىمەن بىرگە ول دايىن ۆاكتسينانى كەم دەگەندە التى اي كۇتۋگە تۋرا كەلەتىنىن ءتۇسىندىردى.

ال، مينيستر الەكسەي تسويدىڭ ايتۋىنشا، قازاقستان دا ءوزىنىڭ ۆاكتسيناسىن جاساپ شىعارعان. ول جانۋارلارعا سىناقتان ءوتىپ، جاقسى ناتيجە كورسەتكەن. ۆاكتسينا ءارى قاراي ەرىكتىلەردە سىناقتان وتەتىن كورىنەدى.

Abai.kz