قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا مەملەكەت باسشىسى قاسىم-جومارت توقاەۆتىڭ قازاقستان حالقىنا ارناعان بيىلعى جولداۋىنا قاتىستى پىكىر ءبىلدىردى.

ونىڭ پايىمداۋىنشا، ءبىلىم جانە عىلىم سالاسىنا جاڭا ناقتى مىندەتتەر قويدى. پرەزيدەنت اتاپ كورسەتكەن باسىم باعىتتار ەل ەكونوميكاسىنىڭ باستى وزەگى سانالاتىن اتالعان سالالاردىڭ زامانعا ساي دامۋىنا زور سەرپىن بەرەدى. 

«مەملەكەت باسشىسى 2021 جىلدىڭ قاڭتار ايىنان باستاپ مۇعالىمدەردىڭ جالاقىسىن 25 پايىزعا كوتەرۋ تۋرالى شەشىم قابىلدادى. بەلگىلى بولعانداي، ەڭبەكاقى مولشەرى كەلەشەكتە دە ارتا بەرمەك. بۇل ماقساتتا الداعى ءۇش جىلدا قوسىمشا 1,2 ترلن تەڭگە بولىنبەك. سوڭعى جىلدارى ەلىمىزدە ۇستاز بەدەلىن، پەداگوگ مارتەبەسىن كوتەرۋ جولىندا ەلەۋلى ىستەردى اتقارىلىپ، ناقتى جۇمىستار جۇزەگە اسۋدا. ماسەلەن، ءبىر عانا «پەداگوگ مارتەبەسى تۋرالى» زاڭنىڭ قابىلدانۋى – قازاقستاندىق ۇستازدار قاۋىمىنىڭ قوعامداعى بەدەلىن ارتتىرىپ، ورنىن ايشىقتاۋعا باعىتتالعان زور قادام بولدى. 21 باپتان تۇراتىن جاڭا زاڭ جارتى ميلليوننان استام ۇستازدىڭ جۇمىسىنا قاتىستى بولدى. وندا ءتورت باعىت قامتىلعان. بىرىنشىدەن، پەداگوگتاردىڭ قۇقىقتارىن كەڭەيتۋ جانە وزىنە ءتان ەمەس جۇمىستاردان بوساتۋ، ولاردىڭ جۇكتەمەسىن ازايتۋ. ەكىنشىدەن، مۇعالىمنىڭ قىزمەتىنە قويىلاتىن تالاپتاردى كۇشەيتۋ. ۇشىنشىدەن، ماتەريالدىق ەمەس ىنتىلاندىرۋ تەتىكتەرى جانە تورتىنشىدەن، ماتەريالدى ىنتالاندىرۋ قادامدارى. پرەزيدەنتتىڭ بۇگىن جاريالاعان شەشىمى وسى زاڭ اياسىندا قولعا الىنعانىن اتاپ وتكەن ءلازىم»، – دەدى گاۋحار الدامبەرگەنوۆا.

ونىڭ پايىمداۋىنشا، ۇستاز بەدەلىنىڭ ارتۋى، ەڭبەكاقىنىڭ جىل سايىن كوتەرىلۋى – بىلىكتى دە ءبىلىمدى، «ۇستاز» دەگەن اتقا لايىقتى ناعىز ماماندار مەكتەبىنىڭ قالىپتاسۋىنا نەگىز بولادى.

«بۇگىندە مۇعالىم بەدەلىن ارتتىرۋمەن قاتار، پەداگوگ كادرلارىن دايارلايتىن وقۋ ورىندارىنىڭ دا ماڭىزى ايقىندالۋدا. ەلىمىزدەگى ەڭ ىرگەلى جوعارى وقۋ ورنى قازاق ۇلتتىق قىزدار پەداگوگيكالىق ۋنيۆەرسيتەتى نەگىزىنەن اۋىلدىق ەلدىمەكەندەردەگى ءبىلىم وشاقتارى ءۇشىن مامان دايارلايدى. ءوزىنىڭ 75 جىلدىق ءتول تاريحىندا وقۋ ورنى 60 مىڭنان استام پەداگوگ دايىندادى. قازىرگى كۇندە وقۋ ورنىندا بولاشاق پەداگوگتاردىڭ كاسىبي بەيىمدەلۋى ءۇشىن پەداگوگيكالىق كادرلاردى دايارلاۋدىڭ ءبىلىم بەرۋ باعدارلامالارى تاجىريبەگە باعىتتالعان. تاجىريبەگە باعىتتالۋى – ءبىرىنشى كۋرستان ءتورتىنشى كۋرسقا دەيىن تاجىريبەدەن ءوتۋ ارقىلى جۇزەگە اسىرىلادى. بۇل ءوز كەزەگىندە بولاشاق مامانداردىڭ تەوريا مەن تاجىريبەنى ۇتىمدى ۇيلەستىرىپ، بىلىكتىلىگىن ارتتىرۋعا زور سەرپىن بەرەدى»، – دەيدى قىزدار ۋنيۆەرسيتەتىنىڭ رەكتورى.

گاۋحار الدامبەرگەنوۆا جولداۋدا اتاپ كورسەتىلگەن عىلىمي الەۋەتتى دامىتۋ مەن جاس عالىمداردى ىنتالاندىرۋ – اتالعان سالانىڭ قارقىندى دامۋىنا وڭ ىقپال ەتەتىنە سەنىمدى.

«جاڭالىعى جەلمەن جارىسقان بۇگىنگىدەي زاماندا عىلىم سالاسىنا مەملەكەت تاراپىنان زور كوڭىل ءبولىنىپ، ەلەۋلى قولداۋ كورسەتىلىپ كەلە جاتىر. قازاقستاننىڭ بۇل تاراپتاعى ماقساتى – عىلىمنىڭ دامۋىنا جاڭا قارقىن بەرۋ، ونىڭ دامۋى ءۇشىن دۇرىس باعىتتاردى قابىلداۋ جانە وتاندىق بيزنەستىڭ عىلىممەن تىعىز بايلانىستا بولۋىنا ىقپال ەتۋ. بۇل ورايدا ەلىمىزدە بىرقاتار باستامالار قولعا الىندى. بۇگىن سونىڭ بىرقاتارىن پرەزيدەنت ناقتى اتاپ كورسەتتى. اتاپ ايتقاندا، عىلىمي جوبالاردى قارجىلاندىرۋعا مەملەكەتتىك قازىنادان قوماقتى قاراجات ءبولىنىپ، جاس عالىمداردىڭ عىلىمي يدەيالارى جان-جاقتى ىنتالاندىرىلماق. قىزدار ۋنيۆەرسيتەتى بىلىكتى پەداگوگ كادرلارىن دايارلاۋمەن قاتار، قازاقستاندىق عىلىمدى دامىتۋعا دا ۇلكەن ۇلەس قوسىپ كەلەدى. وقۋ ورنى زەرتتەۋ جۇمىستارىنىڭ ساپاسىن ارتتىرۋ جانە ونى حالىقارالىق تالاپتارعا سايكەستەندىرۋ ماقساتىندا الىس-جاقىن شەت ەلدەردىڭ عالىمدارى مەن عىلىمي-زەرتتەۋ ورتالىقتارىمەن تىعىز قارىم-قاتىناس ورناتىپ، بىرلەسە جۇمىستار اتقارۋدا. بۇگىندە ۋنيۆەرسيتەت عالىمدارى 28 باعىت بويىنشا عىلىمي-زەرتتەۋ جۇمىسىن جۇرگىزۋدە»، – دەيدى وقۋ ورنىنىڭ باسشىسى. 

ۋنيۆەرسيتەت رەكتورى ءوز سوزىندە قازاقستان جاس عالىم-پەداگوگتارى قاۋىمداستىعى تۋرالى دا اتاپ ءوتتى. 

«قاۋىمداستىق ەلىمىزدىڭ پەداگوگ ماماندارىن دايىندايتىن جوعارى وقۋ ورىندارىمەن بىرلەسىپ، ءبىلىم بەرۋ مەن عىلىم سالاسىنداعى بولىپ جاتقان بىرقاتار باستامالاردى ىسكە اسىرۋعا اتسالىستى. قاۋىمداستىقتىڭ نەگىزگى ماقساتى – ەلىمىزدىڭ جاس پەداگوگ-عالىمدارىنىڭ ديالوگ الاڭىن ۇيىمداستىرۋ، ءبىلىم مەن عىلىمدى ۇشتاستىرا وتىرىپ، جاستاردىڭ عىلىمي يدەيالارىنىڭ ءبىلىم بەرۋ سالاسىنا ەنۋىنە ىقپال جاساۋ. اتالعان قاۋىمداستىق الداعى ۋاقىتتا پرەزيدەنت جولداۋىندا اتاپ كورسەتىلگەن عىلىم سالاسىن دامىتۋعا ءوز ۇلەسىن قوساتىن بولادى»، – دەدى ول.

قىزدار ۋنيۆەرسيتەتىنىڭ رەكتورى جاڭا مىڭجىلدىقتا ءبىلىمى مەن بىلىگى ۇيلەسكەن مامانداردىڭ ءباسى باسىم بولاتىندىعىن العا تارتادى. بۇنى ۋاقىتتىڭ ءوزى ايقىنداپ وتىر. 

«وتاندىق جوعارى وقۋ ورىندارىنىڭ الدىندا وي-ءورىسى دامىعان، تالانتتى، زەردەلى جانە ۇلتجاندى ۇرپاق تاربيەلەۋ مىندەتى تۇر. وسى ورايدا مەملەكەت باسشىسى بۇگىنگى جولداۋىندا ونىڭ نەگىزگى تەتىكتەرىن ايقىندادى. پرەزيدەنتتىڭ بيىلعى جولداۋى ءبىز ءۇشىن وسىنىسىمەن قۇندى، وسىنىسىمەن ماڭىزدى»، – دەپ ءسوزىن تۇيىندەدى گاۋحار تورەمۇراتقىزى.

Abai.kz