جاڭاوزەندەگى قاقتىعىسقا قاتىسۋشىلارعا قارسى جۇمىلدىرىلعان ارنايى جاساق ساربازدارى وتە ءجىتى جانە ۇيىمداسقان تۇردە قيمىلدادى. بۇعان دەيىن تالاي سوزگە قالىپ كەلگەن، اسىرەسە لاڭكەستەرمەن كۇرەستە ۇنەمى جاۋىنگەرلەرى وققا ۇشىپ جۇرەتىن ارنايى جاساقتىڭ كەيىنگى كەزدە دايىندىقتى كۇشەيتە تۇسكەنى انىق بايقالادى. جاڭاوزەندەگى قاقتىعىس كەزىندە ءتارتىپ بۇزۋشىلارعا قارسى جۇمىلدىرىلعان ارنايى جاساقتىڭ ارەكەتىن ۆيدەودان كورە الاسىزدار.

جاڭاوزەندەگى قاقتىعىسقا قاتىسۋشىلارعا قارسى جۇمىلدىرىلعان ارنايى جاساق ساربازدارى وتە ءجىتى جانە ۇيىمداسقان تۇردە قيمىلدادى. بۇعان دەيىن تالاي سوزگە قالىپ كەلگەن، اسىرەسە لاڭكەستەرمەن كۇرەستە ۇنەمى جاۋىنگەرلەرى وققا ۇشىپ جۇرەتىن ارنايى جاساقتىڭ كەيىنگى كەزدە دايىندىقتى كۇشەيتە تۇسكەنى انىق بايقالادى. جاڭاوزەندەگى قاقتىعىس كەزىندە ءتارتىپ بۇزۋشىلارعا قارسى جۇمىلدىرىلعان ارنايى جاساقتىڭ ارەكەتىن ۆيدەودان كورە الاسىزدار.

ينتەرنەتتە اقتاۋ اۋەجايىنا بەلورۋسسيانىڭ ارنايى جاساعى مىنگەن ۇشاق كەلىپ قوندى دەگەن اقپارات تاراۋدا. بىراق، ول تۋرالى ءالى ەشقانداي رەسمي اقپارات جوق. ۆيدەوداعى ارنايى جاساق ساربازدارىنىڭ قيمىلىن باعا وتىرىپ بىزگە شەتەلدەن كومەك سۇراۋدىڭ قاجەتى نە دەگەن سۇراق تۋىندايدى. قۇقىق قورعاۋشىلارعا قارسىلىق كورسەتىپ، عيماراتتاردى ورتەپ جۇرگەندەر مۇنايشىلار دەۋ قيىن. ماسەلەن، جاڭاوزەن قالاسىندا ەلۋگە جۋىق عيمارات ورتەنگەن. ول قالا تۇرعىندارى وزدەرىنىڭ قولىمەن تۇرعىزعان، بارلىعىنا كەرەك عيماراتتار ەدى عوي. ءوز ەڭبەكتەرىن، ءوز وتكەندەرىن مۇنايشىلار ءوز قولدارىمەن ورتەدى دەگەنگە سەنۋ قيىن. ارينە، اشۋعا ەرىك بەرۋگە بولادى. اشىنۋعا ءماجبۇر ەتسە. بىراق، ادامگەرشىلىكتەن اتتاپ ۆانداليزمگە بوي ۇرۋ ەڭبەكتىڭ پارقىن بىلەتىن، سول ءۇشىن تالاپ قويىپ تاپجىلماي جارتى جىل الاڭدا وتىرعان مۇنايشىلارعا ءتان ەمەس. ءبارىمىز دە جاڭاوزەندەگى تۋىس-تۋعاندارىمىز ءۇشىن الاڭداۋلىمىز. ولار بىزگە الاڭعا شىعىپ ءتارتىپ بۇزىپ جۇرگەندەرگە قوسىلمايتىندارىن، ولاردى قولدامايتىندارىن، ول ادامداردىڭ ناقتى ارانداتۋشى ەكەنىن، مۇنىڭ ءبارىن الدەبىر سىرتقى كۇشتەردىڭ ىستەپ وتىرۋى مۇمكىن ەكەنىن ايتادى. بىراق مۇنايشىلار بيلىككە اۋەلگى قويعان تالاپتارىنان قايتپاق ەمەس. جالاقىلارىن كوتەرىلۋىن، شەتەلدىك ماماندارمەن بىردەي ەڭبەكاقى الۋدى قالايدى. ونى الەۋمەتتىك تەڭدىك دەپ سانايدى. بىراق ول ءۇشىن عيماراتتاردى ورتەپ، قان توگۋگە بارمايتىندارىن حابارلاۋدا. جاڭاوزەندە عانا ەمەس، ارانداتۋشىلار اقتاۋدا دا بوي كورسەتتى. ولاردىڭ ايتاعىنا سەنىپ قالعان ءبىراز اعايىندار ورتالىق الاڭعا جينالعانىمەن ءتۇسىندىرۋ جۇمىستارىنان كەيىن ءوز بەتتەرىمەن تاراپ كەتكەن. دەگەنمەن، قالا ءالى دە تىنشىماي تۇر. سوعان بايلانىستى قازىر قالا تۇرعىندارى جاڭاوزەندەگىدەي جاعداي قايتالانباس ءۇشىن اقتاۋدا دا كوممەندانتتىق ساعات ەنگىزىپ، بەيسۋات جۇرىستەر مەن رۇقساتسىز جيىندار وتكىزۋگە تيىم سالۋ تۋرالى ەلباسىنىڭ اتىنا حات جولداپ، ونى الەۋمەتتىك جەلىلەردە تاراتىپ جاتىر. حاتتى جازعان ناقتى كىم ەكەنى بەلگىسىز. قالاي بولعاندا دا قازىر اقپاراتتىق مايدانىڭ قىزۋى تىم كۇشتى. قازاق ەلىنىڭ بەرەكەسىنە نۇقسان كەلتىرىپ، ءوزارا قىرقىستىرىپ قويعىسى كەلەتىندەر از ەمەس. انتالاعان اشكوز جاۋ كوپ. اقتاۋداعى شيەلەنىسكەن جاعداي ديالوگپەن شەشىلۋى كەرەك. بىراق تەك قاقتىعىستار تولىق اۋىزدىقتالىپ، بەي-بەرەكەتسىزدىك توقتاتىلعان سوڭ. ەل بيلىگىندەگىلەر ايماقققا بارىپ، حالىقپەن جۇزدەسىپ، سابىرعا شاقىرىپ، تالاپتارىنا قۇلاق ءتۇرىپ، ورتاق شەشىمگە كەلۋى ءتيىس. جاعداي ۋشىعىپ تۇرعان ايماققا ىشكى ىستەر ءمينسيترى ەمەس، ۇكىمەت باسشىسى ك.ءماسىموۆ بارۋى كەرەك ەدى. بالەن ايدان بەرى ۋشىعىپ كەلە جاتقان ءىستى ارانداتۋشىلاردىڭ ءوز ماقساتتارىنا پايدالاناتىنىن بىلە تۇرا جايباراقاتتىققا سالىنعان ۇكىمەت باسشىسىنىڭ كىناسى كوپ. قالاي بولعاندا دا بۇل جاعدايدىڭ سوڭى بەيبىت شەشىلۋى ءتيىس. حالىق ارانداتۋشىلارعا ەرمەۋى كەرەك، ال بيلىك كوپ كۇتتىرمەي مۇنايشىلارمەن ديالوگقا كەلۋى قاجەت. ونسىز الداعى سايلاۋ تىنىش وتەدى دەۋ قيىن. كوپتەگەن ساراپشىلاردىڭ پىكىرى وسىعان سايادى.

«ماسا-اقپارات»