پرايمەريز دوداسىنان جۇرتىم، ۇلتىم دەيتىن ۇلدى دا، قىزدى دا، ۇلتتىق قۇندىلىعىمىزدى دارىپتەگەن «NurOtan» پارتياسى وكىلىن دە كورمەدىم.

ن.ءا. نازارباەۆتىڭ: «قازاق ءتىلى ماڭگىلىك ەلدىڭ ماڭگىلىك تىلىنە اينالادى» دەگەن ءسوزىن، نۇر-وتاندىقتار جوققا شىعاردى.

جاقىندا استانامىزداعى «NurOtan» پارتياسىنىڭ عيماراتىندا وتكەن پرايمەريزگە قاتىسۋشىلاردىڭ جيىنىندا بولدىم. ۇلكەن دوداعا ءتۇسىپ جاتقاندار وڭشەڭ قاراكوز قازاقتار ەكەن. جاراتقانعا شۇكىرشىلىك ايتىپ، ىشتەي قۋاندىم. ايمان مۇساحودجاەۆا، تۇرسىنبەك قاباتوۆ، ەرلان داكەنوۆ،  باقتيار ارتاەۆتاردى كورىپ، ۇلتىمىزدىڭ كوسەگەسىن كوگەرتەتىن سايىپقىران ۇل-قىزدارىمىز باسىن بايگەگە تىگىپتى-اۋ دەگەن ءۇمىتىم مولايا ءتۇستى. ماجىلىسكە شاقىرىلعان 30 ادامنىڭ 29-ى قازاق، بىرەۋى وزگە دياسپورا وكىلى ەكەن.

نە كەرەك، بەلگىلەنگەن ۋاقىت بويىنشا جينالىس باستالىپ ونى نۇر-سۇلتان قالاسى «NurOtan» پارتياسى فيليالى توراعاسىنىڭ ءبىرىنشى ورىنباسارى كاناليموۆ ەرلان ەرمەكۇلى اشتى. ادەتتەگىدەي ءبىر اۋىز قازاقشا اڭگىمەلەستى دە، ورىسشا كوسىلتتى-اي كەلىپ. لەد ەكرانداعى جازبالار دا كورشى رەسەي مەملەكەتىنىڭ مەملەكەتتىك تىلىندە. قازاقستان مەملەكەتىنىڭ مەملەكەتتىك تىلىندە ءلام-ميم دەگەن، جازۋ يا بولماسا ءسوز ەستىسەم كەرەڭ بولايىن. ۇياتتان دا، نامىستان دا كىرەرگە تەسىك تاپپاي كەتتىم. ەرلان ەرمەكۇلى جارتى ساعات ورىسشا جۇيتكىپ بارىپ تىنىستاعاننان كەيىن قولىمدى كوتەرىپ ادەپپەن، مەن ەشتەڭە تۇسىنبەگەنىمدى، ەندى قازاقشا ايتىپ بەرۋىن ءوتىندىم.

ەرەكەڭ سالعان جەردەن: «مەن قازىر جينالىسقا اسىعىپ وتىرمىن، مەنىڭ كابينەتىمە كەلىڭىز، جەكە وزىڭىزگە ءتۇسىندىرىپ بەرەيىن» - دەپ قاراپ تۇر. ماسساعان، بەزگەلدەك. ول، ول ما، كورەتىن سوراقىلىق ءالى الدا ەكەن. ەرەكەڭ زالدا وتىرعاندارعا تريبۋنادان كەڭىردەگىن سوزىپ «تاعى كىم تۇسىنبەي قالدى؟» دەپ سۇراۋ سالدى. زالدا وتىرعان 29 قازاعىم باستارىن ىشىنە تىعىپ، الىپ، وقتاۋ جۇتقانداي مەلشيدى دە قالدى. ىشىندە، بۇلىك سالعىش، ورىسشا تۇسىنبەيتىن جالعىز مەن بولىپ شىقتىم. جاڭاعى تۇرسىنبەگىڭ دە، ايمان مۇساحودجاەۆاڭ دا، كەرەمەت دەپ توبەگە كوتەرىپ جۇرگەن ۇل-قىزدارىڭ دا مىناۋىڭىز دۇرىس ەمەس دەۋگە، مەملەكەتتىك ءتىلدى تالاپ ەتۋگە جارامادى.

ال، ەندى وسىلار الدا-جالدا ەلىمىزدىڭ جوعارى زاڭ شىعارۋشى ورگانى پارلامەنتكە دەپتۋتات بولاتىن بولسا، قازاقتىڭ جوعىن جوقتاپ، مۇڭىن مۇڭدايدى دەگەنگە سەنەر مە ەدىڭىز؟ قارا باسىنىڭ قامىن كۇيتتەگەندەر ەكەنى الدەن-اق كورىنىپ تۇر. سونىمەن قاتار حالقىمىز ءۇمىت ارتقان «NurOtan» پارتياسى فيليالى توراعاسىنىڭ ورىنباسارى ەرلان ەرمەكۇلى مەملەكەتتىك ءتىلدى ىسىرىپ تاستاپ، رەسەي مەملەكەتىنىڭ ءتىلىن اسپەتتەۋىن قاي شەڭبەرگە سىيعىزامىز. بۇل پارتيانىڭ بەدەلىن ۇلت الدىندا، مەملەكەت الدىندا ماسقارا ەتۋ ەمەس پە؟ «NurOtan» حدپ كوسەمى ن.ءا. نازارباەۆتىڭ «قازاقستاننىڭ بولاشاعى قازاق تىلىندە» دەگەن ءسوزىن، پارتيانىڭ مۇشەلەرى اياقاستى ەتىپ وتىرعانىنا كوزىمىز جەتتى.

ودان قالدى ن.نازارباەۆ «ءجۇز قازاق وتىرىپ، ءبىر ورىس وتىرسا جابىلىپ ورىسشا سويلەيمىز، ءبىز سونداي سورلى حالىقپىز» دەپ ايتسا ايتقانداي-اق ەكەن. ونى «NurOtan» پارتياسىنىڭ وكىلى ەرلان كاناليموۆ ءوزى-اق دالەلدەپ بەردى. قاراشال ابايدىڭ «قاينايدى قانىڭ، اشيدىجانىڭ مىنەزدەرىن كورگەندە» - دەگەن وسى شىعار. وزەكتى ورتەيتىن ءجايت.

بەيبىت وسپان

Abai.kz