وسىعان دەيىن بەلارۋستەگى وپپوزيتسيا جەتەكشىلەرىنىڭ بىرىنە اينالىپ ۇلگەرگەن ماريا كولەسنيكوۆانى 7 قىركۇيەكتە بەلگىسىز بىرەۋلەر مينسك ورتالىعىندا ۇرلاپ اكەتكەنى حابارلانعان ەدى.

بەلارۋس وپپوزيتسياسى مەن ۋكراينانىڭ رەسمي ورگاندارى تاراتقان اقپاراتقا سۇيەنسەك، وپپوزيتسيا ليدەرى ماريا كولەسنيكوۆانى بەلارۋستەن كۇشتەپ شىعارماق بولعان. كىم؟ بيلىك ورگاندارى؟.. كۇشتەپ شىعارۋعا كونبەگەن كولەسنيكوۆانى كەيىن تۇتقىنداعان. وسىلايشا، «جوعالدى» دەگەن وپپوزيتسياسى ليدەرى «تۇتقىندالعان» بوپ شىقتى.

ماريا كولەسنيكوۆانىڭ تۇتقىندالعانى تۋرالى العاشقى اقپاردى مەملەكەتتىك «بەلتا» اقپاراتتىق اگەنتتىگى تاراتقان. كەيىن بۇل اقپاراتتى بەلارۋستىڭ مەملەكەتتىك شەكارا كوميتەتى دە راستاپ سويلەگەن.

بەلارۋس بيلىگى: كولەسنيكوۆا ەلدەن قاشپاق بولعان

شەكارا كوميتەتىنىڭ رەسمي وكىلى انتون بىچكوۆسكي ءوز مالىمدەمەسىندە كولەسنيكوۆا مەن ونىڭ ەكى جاقتاسىنىڭ 8 قىركۇيەك كۇنى بەلارۋس-ۋكراينا شەكاراسىندا تۇتقىندالعانىن ايتقان. ونىڭ ايتۋىنشا، كولەسنيكوۆا جانە ونىڭ ەكى ارىپتەسى – انتون رودنەنكوۆ پەن يۆان كراۆتسوۆ بەلارۋس-ۋكراينا شەكاراسىنداعى «الەكساندروۆكا» وتكىزۋ بەكەتى ارقىلى ەلدەن قاشپاق بولعان جەرىنەن تۇتقىندالعان. ولار كەدەندىك راسىمدەۋدەن ءوتىپ، ۋكراينا تەرريتورياسىنا قاراي بەت العان كەزدە ۇستالعان.

وپپوزيتسيا: كولەسنيكوۆانى ەلدەن كۇشتەپ شىعارماق بولعان

ال ۋكراينانىڭ مەملەكەتتىك شەكارا قىزمەتىنىڭ تاراتقان اقپاراتىنشا، كولەسنيكوۆانىڭ ەكى ارىپتەسى ۋكراينا تەريتورياسىنا وتە بەرگەندە ۇستالعان. ال ماريانىڭ ءوزى ول كەزدە شەكارادان وتپەگەن.

ۋكراينا ىشكى ىستەر ءمينيسترى انتون گەراششەنكو اتالعان جايتقا قاتىستى پىكىر ءبىلدىرىپ، بەلارۋس وپپوزيتسيونەرلەرى شەكارادان ءوز ەرىكتەرىمەن وتپەگەنىن ايتقان.

ماريا كولەسنيكوۆا باسشىلارىنىڭ ءبىرى بولىپ سانالاتىن بەلارۋستەگى وپپوزيتسيالىق كوورديناتسيالىق كەڭەس مالىمدەمەسىندە كولەسنيكوۆانىڭ شەكارادان ءوز ەركىمەن ەمەس، كۇشپەن شىعارىلماق بولعانى، ونى ەلدەن قۋماق بولعاندا ول ءوزىنىڭ قۇجاتىن (پاسپورتىن) جىرتىپ تاستاعانى حابارلاعان.

كولەسنيكوۆا - قاماۋداعى ساياساتكەر ۆيكتور باباريكونىڭ سايلاۋ شتابىنىڭ وكىلى. ول سايلاۋ ناۋقانى كەزىندە «ءۇش ايەل» ميتينگىندە ءسوز سويلەگەن ۆالەريا تسەپكالو جانە پرەزيدەنت سايلاۋىنداعى كانديدات سۆەتلانا تيحانوۆسكايالارمەن بىرگە بولعان.

سايلاۋدان كەيىن تسەپكالو مەن تيحانوۆسكايا ەلدەن كەتۋگە ءماجبۇر بولعان. كولەسنيكوۆا وپپوزيتسيانىڭ جاقىندا عانا قۇرىلعان كوورديناتسيالىق كەڭەسىنىڭ پرەزيديۋمىنا كىردى. ول مينسك قالاسىندا حالىق نارازىلىعىنا قاتىستى.

مۇنداي نارازىلىق شەرۋلەرى سايلاۋ وتكەن 9 تامىزدان بەرى جالعاسىپ كەلەدى. سايلاۋ قورىتىندىلارىمەن كەلىسپەگەن نارازىلىق اكتسيالارىنىڭ ەڭ ىرىسىنە 300 مىڭعا جۋىق ادام قاتىسقان. مۇنداي بەيبىت اكتسيالار كەشە دە وتكەن. شەرۋگە جينالعاندار: «لۋكاشەنكو وپپونەنتتەرىن ەلدەن دەپورتاتسيالاماق» دەپ مالىمدەگەن.

9 تامىزداعى سايلاۋدا بەلارۋستى 26 جىلدان بەرى ۇزدىكسىز باسقارىپ كەلە جاتقان الەكساندر لۋكاشەنكو 80,10 پايىز، ونىڭ باستى وپپونەنتى بولعان سۆەتلانا تيحانوۆسكايا 10,12 پايىز داۋىس جيناعان. بۇل بەلارۋس ورتالىق سايلاۋ كوميسسياسىنىڭ ەسەبى.

بۇل سايلاۋعا حالىقارالىق باقىلاۋشىلار قاتىستىرىلعان جوق. سايلاۋدان كەيىن الەكساندر لۋكاشەنكونىڭ «جەڭىسىن» اقش پەن باتىس، ەۋروقاۋىمداستىق ەلدەرى مويىنداعان جوق. لۋكاشەنكونىڭ «جەڭىسىن» بۇرىنعى ءھام قازىرگى ەلدەر عانا مويىنداعان. ال قازاقستان لۋكاشەنكونى قۇتتىقتاعان العاشقى ءۇش مەملەكەتتىڭ ءبىرى بولعان (قىتاي مەن رەسەيدەن كەيىن).

Abai.kz