پارلامەنت سەناتىنىڭ دەپۋتاتى مۇرات باقتيارۇلى سەنات وتىرىسىندا ەلىمىزدىڭ پرەمەر-ءمينيسترى اسقار ءماميننىڭ اتىنا مەديتسينا سالاسىنداعى وزەكتى ماسەلەلەر جانە ونى دامىتۋ تۋرالى دەپۋتاتتىق ساۋال جولدادى.

سەناتور وڭىرلەرگە ساپارى كەزىندە جەرگىلىكتى جەردەگى دەنساۋلىق ساقتاۋ سالاسىندا شەشىمىن تاپپاي جاتقان بىرقاتار كۇردەلى ماسەلەلەردىڭ بار ەكەنىنە كوز جەتكىزگەنىن ايتتى. سونداي-اق، ول وتاندىق مەديتسينا نارىعى اۋىر سىناققا توتەپ بەرە الماعانىن تىلگە تيەك ەتتى.

«قانشاما قابىلدانعان شارالارعا قاراماستان دەنساۋلىق ساقتاۋ مينيسترلىگى حالىق دەنساۋلىعىن قورعاۋدى دامىتۋدىڭ جۇيەلى جولىن تابا الماعانى تۇسىنىكسىز», – دەدى م.باقتيارۇلى.

دەپۋتاتتىق ساۋال بارىسىندا كەلەشەكتە پاندەميا كەزەڭىندە ورىن العان جاعدايدان قورىتىندى شىعارىپ، سالا ماماندارىنىڭ پىكىرلەرى مەن ۇسىنىستارىن ەسكەرۋ كەرەك ەكەنى دە ايتىلدى.

مۇرات باقتيارۇلى وتاندىق ءدارى-دارمەكتەردىڭ تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جانە مىندەتتى الەۋمەتتىك مەديتسينالىق ساقتاندىرۋ جۇيەسىندەگى ۇلەسى بار-جوعى 26 پايىزدى قۇرايتىنىن ايتىپ، قالعان 74 پايىز شەتەلدىكتەردىڭ ۇلەسىندە ەكەنىنە باسا ءمان بەردى.

سونىمەن قاتار مەديتسينا سالاسىنداعى مامان تاپشىلىعى دا نازاردان تىس قالمادى.

«قازىر ەمدەۋ ورىندارىندا 4 مىڭ دارىگەر جەتىسپەيدى. اسىرەسە، رەانيماتولوگ، رەنتگەنولوگ، پۋلمونولوگ، تاعى باسقا دا وسى سياقتى سالالالىق مامانداردىڭ تاپشىلىعى قاتتى بىلىنەدى. ءتىپتى، كوروناۆيرۋستىڭ قاۋپى سەيىلمەي تۇرعان ءىرى ورتالىقتار مەن وڭىرلەردەگى اۋرۋحانالار مەن ەمحانالاردا 800-دەن استام ينفەكتسيونيستىڭ ورنى بوس تۇر»، – دەدى سەناتور.

دەپۋتاتتىڭ ايتۋىنشا، قازىرگى تاڭدا دارىگەر كادرلارىمەن قامتاماسىز ەتۋ قالالىق جەردە – 56,8 پايىز بولسا، اۋىلدا بۇل كورسەتكىش 16,1 پايىزدى قۇرايدى. قازاقستاندا مەديتسينا ماماندارىن دايارلايتىن التى جوعارى وقۋ ورنى بار. ونداعى سالالىق ماماندار دايارلايتىن مەديتسينالىق-پروفيلاكتيكالىق فاكۋلتەتتەر جابىلىپ قالعان. فاكۋلتەت جابىلعانىمەن، مامانداردىڭ قاجەتتىگىن ءومىر كورسەتىپ وتىر.

«ۇلت دەنساۋلىعى – مىقتى مەملەكەت كەپىلى. سوندىقتان ادام دەنساۋلىعى ءۇشىن ايانباي ەڭبەك ەتىپ، اجالعا اراشا تۇسەتىن دارىگەرلەر قاۋىمىنا ارناپ، «دارىگەرلەر مارتەبەسى تۋرالى» زاڭ قابىلداۋدى ۇسىنامىز», – دەدى م.باقتيارۇلى.

Abai.kz