اقش پرەزيدەنتى دونالد ترامپ يزرايل مەن بىرىككەن اراب امىرلىكتەرى اراسىنداعى «تاريحي بەيبىتشىلىك كەلىسىمى» ءۇشىن نوبەل سىيلىعىنا ۇسىنىلدى.

امەريكا باسشىسىن نوبەل سىيلىعىنا ۇسىنۋ يدەياسىن نورۆەگيا پارلامەنتىنىڭ وڭشىل مۇشەسى كريستيان تايبرينگ-دجەددە كوتەردى.

ەگەر دونالد ترامپ ناگراداعا يە بولسا، ول وزىنەن بۇرىنعى پرەزيدەنت جانە ساياسي قارسىلاسى باراك وبامانىڭ تاجىريبەسىن قايتالايدى. ول 2009 جىلى «حالىقارالىق ديپلوماتيانى جانە ادامدار اراسىنداعى ىنتىماقتاستىقتى نىعايتۋعا ارنالعان ەرەكشە كۇش-جىگەرى» ءۇشىن نوبەل سىيلىعىمەن ماراپاتتالدى.

نورۆەگيا پارلامەنتىنىڭ مۇشەسى، سونداي-اق ناتو پارلامەنتتىك اسسامبلەياسىنىڭ دەلەگاتسياسىنا جەتەكشىلىك ەتەتىن نورۆەگيا پارلامەنتىنىڭ مۇشەسى تايبرينگ-دجەددە ءوزىنىڭ ترامپتىڭ جانكۇيەرى ەمەس ەكەنىن، بىراق امەريكا پرەزيدەنتىنىڭ الەمدىك قوعامداستىق ءۇشىن جاساعان جاقسىلىقتارىنا نازار اۋدارماي تۇرا الماعانىن ايتادى.

«كوميتەت فاكتىلەردى قاراپ، ونى (دونالد ترامپ) كەيدە ءوزىن-ءوزى ۇستاۋىمەن ەمەس، فاكتىلەرمەن باعالاۋى كەرەك. سوڭعى جىلدارى بەيبىتشىلىك سىيلىعىن العان ادامدار دونالد ترامپقا قاراعاندا الدەقايدا از جۇمىس جاسادى. مىسالى، باراك وباما ەشنارسە جاساعان جوق»، - دەپ كەلتىرەدى The Sun نورۆەگيالىقتىڭ ءسوزىن.

وكىلدەر پالاتاسىنداعى ترامپتىڭ 18 جاقتاستارىنان تۇراتىن توپ نورۆەگيانىڭ نوبەل كوميتەتىنە «الەمگە بەيبىتشىلىك ورناتۋ جولىنداعى قاجىماس قايراتىن» ەسكەرە وتىرىپ، ترامپتى ماراپاتتاۋ تۋرالى ويلانۋعا شاقىرعان حات جولدادى.

بۇعان دەيىن يزرايل مەن بىرىككەن اراب امىرلىكتەرى اقش-تىڭ دەلدالدىعىمەن قاتىناستاردى تولىق قالىپقا كەلتىرۋ تۋرالى كەلىسىمگە كەلگەن بولاتىن. اقش-پەن بىرلەسكەن ۇشجاقتى مالىمدەمەدە يزرايل مەن ءباا ينۆەستيتسيالار، تۋريزم، تىكەلەي رەيستەر، قاۋىپسىزدىك، تەلەكوممۋنيكاتسيا جانە باسقا سالالاردا بىرقاتار كەلىسىمدەرگە قول قوياتىنى ايتىلعان.

ەسكە سالايىق، 2019 جىلعى نوبەل سىيلىعى ەفيوپيا مەن ەريترەيا اراسىنداعى 20 جىلدىق سوعىستى اياقتاۋعا قاتىسقانى ءۇشىن ەفيوپيا پرەمەر-ءمينيسترى ابي احمەد اليگە بەرىلدى. دونالد ترامپ 2020 جىلى ماراپاتتالا ما، جوق پا، ونى ۋاقىت كورسەتەدى.

كەرىمسال جۇباتقانوۆ

Abai.kz