ونىڭ سوزىنشە، بۇل جاتتىعۋدىڭ بەلارۋستاعى ىشكى جاعدايعا ەش قاتىسى جوق.
"بۇل جاتتىعۋدىڭ بەلارۋستەگى ىشكى جاعدايعا قاتىسى جوق. "نەرۋشيموە براتستۆو" جاتتىعۋى جىل سايىن 2012 جىلدان بەرى ۇجىمدىق قاۋىپسىزدىك شارتى ۇيىمى بىتىمگەرلەرىمەن بىرگە وتكىزىلىپ كەلەدى" دەدى قورعانىس مينيسترلىگىنىڭ اقپارات جانە كوممۋنيكاتسيالار دەپارتامەنتىنىڭ وكىلى عاني ءنۇسىپوۆ.
قازاقستاننان بولەك رەسەي، بەلارۋس، ارمەنيا، قىرعىزستان، تاجىكستان اسكەريلەرى قاتىساتىن جاتتىعۋ رەسەي قورعانىس مينيسترلىگىنىڭ حابارلاۋىنشا، بەلارۋستەگى "لوسۆيدو" پوليگونىندا وتەدى.
رەسەي قورعانىس مينيسترلىگى ءبىر ايدا وسىمەن ەكىنشى رەت بەلارۋس اۋماعىندا اسكەري جاتتىعۋ وتكىزەتىنىن حابارلاپ وتىر. قازىر بەلارۋستە "سلاۆيانسكوە براتستۆو-2020" جاتتىعۋى ءوتىپ جاتىر. ربك سايتىنىڭ جازۋىنشا، برەست پوليگونىندا ءوتىپ جاتقان اسكەري سىناققا رەسەيلىك اۋە-دەسانت اسكەرىنىڭ دەسانتتىق-شتۋرم ديۆيزياسى قاتىسىپ جاتىر. باستاپقىدا وعان سەربيا ساربازدارى كەلەدى دەپ ايتىلعان. كەيىنىرەك بەلگراد ەۋرووداق باسشىلارى تاراپىنان قىسىم بولعانىن العا تارتىپ، جارتى جىلعا اسكەري جوبالاردان باس تارتاتىنىن ايتقان.
بەلارۋستە ءبىر ايدان استام ۋاقىتتان بەرى پرەزيدەنت الەكساندر لۋكاشەنكونىڭ وتستاۆكاسىن تالاپ ەتكەن نارازىلىق اكتسيالارى ءوتىپ جاتىر. سايلاۋ قورىتىندىسى بۇرمالاندى دەپ سانايتىن نارازىلار جاڭادان ءادىل سايلاۋ وتكىزۋدى دە تالاپ ەتىپ وتىر. ەۋرووداق جانە بىرقاتار باتىس ەلدەرى بەلارۋستەگى سايلاۋدىڭ قورىتىندىسىن مويىنداماعان.
دۇيسەنبى كۇنى سوچيدە الەكساندر لۋكاشەنكو مەن رەسەي پرەزيدەنتى ۆلاديمير پۋتين كەزدەسكەن. ولاردىڭ كەزدەسۋىنەن كەيىن ماسكەۋدىڭ لۋكاشەنكو ءۇشىن قۇرعان كۇشتىك قۇرىلىمدار رەزەرۆىن شەكارالىق ايماقتان "تۇراقتى ورىنعا اۋىستىراتىنى" حابارلاندى. بۇعان دەيىن پۋتين نارازىلىق جالعاسىپ جاتقان بەلارۋستە "جاعداي باقىلاۋدان شىعىپ، بۇلىك باستالسا عانا رەزەرۆ كومەگىنە جۇگىنەمىز" دەگەن.
Abai.kz
