نۇر-سۇلتان قالاسىنىڭ اكىمدىگى اتقارعان جۇمىستارىن بلوگەرلەرگە، جارناما اگەنتتىكتەرىنە، اقپارات قۇرالدارىنا جازعىزىپ، جارنامالاۋعا قۇمار. سول ءۇشىن بيۋدجەتتەن ميلليونداپ قارجى بولەدى.

التاي كولگىنوۆ باسقاراتىن قالا اكىمدىگى كوكتەمدە كوروناۆيرۋس كۇشىنە ءمىنىپ، تۇتاس ەلدە كارانتين جاريالانعان كەزدە دە وزدەرىن جارنامالاۋدان جالىققان جوق. سول كەزدە اكىمدىكتىڭ قوعامدىق دامۋ ىستەرى باسقارماسى اناۋ-مىناۋ ەمەس 267 ميلليون تەڭگەنىڭ تەندەرىن ويناتقان. قالا اكىمى التاي كولگىنوۆتىڭ ءيميدجى ءۇشىن بۇدان كەيىن دە بىرنەشە مارتە قارجى بولىنگەن.

سويتكەن كولىگىنوۆ قىزمەتىن ناسيحاتتاۋ ءۇشىن تاعى دا تەندەر جاريالاپ جاتىر ەكەن. التاي مىرزا بۇل جولى قىزمەتىن تەك قانا ورىس تىلىندە جارنامالاعىسى كەلگەن كورىنەدى. اكىمدىكتىڭ ىشكى ساياسات باسقارماسى گازەت بەتىندە جانە ينتەرنەت جەلىسىندە كوروناۆيرۋسپەن كۇرەس كەزىندە «جۇمىسپەن قامتۋدىڭ جول كارتاسى» باعدارلاماسىن جۇزەگە اسۋ بارىسىن ناسيحاتتاۋعا تەندەر جاريالاپتى. تەندەردىڭ قۇنى – 58 035 714 تەڭگە. تەندەر تەك ءورىستىلدى گازەتتەرگە ارنالعان. بۇل تۋرالى malim.kz سايتى جازدى.

تەندەردى ۇتىپ الۋشى سونىمەن قاتار، 30 سەكۋندتان 10 مينۋتقا دەيىنگى بەينەماتەريالدار دايىنداپ، Facebook, Instagram, Youtube الەۋمەتتىك جەلىلەرىندە جاريالايتىن كورىنەدى. تالاپ، بۇل بەينەماتەريالدار دا تەك ورىس تىلىندە بولۋى ءتيىس ەكەن. وسى اقپاراتتىڭ انىق-قانىعىن ءبىلۋ ءۇشىن نۇر-سۇلتان قالاسى اكىمنىڭ ءباسپاسوز حاتشىسىنا حابارلاسىپ، بايلانىس ورناتا المادىق. الداعى ۋاقىتتا اكىمدىك اقپارات بەرسە، جاريالاي جاتامىز.

ءبىزدى تاڭعالدىرعانى، كولگىنوۆ مىرزا مەملەكەتتىك تىلگە نەگە مۇنشا «وشىكتى» ەكەن؟ ءبىزدىڭ بيلىك اقپارات تاراتۋدا كوپشىلىك قاۋىمنىڭ قۇقىن تاپتاپ، 30 جىل بۇرىنعى ەرەجە بويىنشا 50/50 قاعيداسىن ۇستانىپ كەلەدى. قازىر ەلدە قازاق ءتىلدى حالىقتىڭ سانى 70-80 پايىزعا جەتكەنىن ەسكەرسەك، 50/50 جۇيەسى الدەقايدا ەسكىردى. ەندى اقپارات تاراتۋدا مەملەكەتتىك تىلگە الدەقايدا باسىمدىلىق بەرىلۋى كەرەك-ءتى.

بىراق كولگىنوۆ باسقاراتىن باس قالانىڭ اتقا مىنەرلەرى بۇلاي ويلامايتىن سەكىلدى. ءتىپتى 50/50 جۇيەسىنىڭ ءوزىن ءبىر جاققا قايىرىپ قويىپ، 100% ورىس تىلىندە اقپارات تاراتقالى وتىر ەكەن. سوندا مەملەكەتتىك ءتىل قايدا قالدى؟ مەملەكەتتىك تىلدە سويلەيتىن 70 پايىزدان اسقان ەل تۇرعىندارىنىڭ قۇقى قايدا قالدى؟ الدە جۇمىسپەن قامتۋ سىندى ماڭىزدى مەملەكەتتىك جوبا قازاق تىلدىلەرگە ارنالماعان با؟

بۇل سۇراقتارعا كولگىنوۆتىڭ «كومانداسى» جاۋاپ بەرۋگە مىندەتتى. جالپى اكىم التايدىڭ كارانتين كەزىندە قىزمەتى ەل كوڭىلىنەن شىققان جوق. جوعارىدا جاعىمدى ءيميدجى ءۇشىن پيار جاساۋعا ميلليونداپ قارجى ءبولدى دەدىك. مۇنىسى ازداي شىلدەدە وت شاشۋ اتىپ, «وت باسقانى» تاعى بار.

پرەزيدەنت توقاەۆ بيىلعى جولداۋىندا مەملەكەتتىك شتاتتى قىسقارتۋ تۋرالى ايتقان. مەملەكەت باسشىسىنىڭ وسى تاپسىرماسىن جۇزەگە اسىرۋ ءۇشىن ەلوردالىق شەندىلەر كىتاپحانالاردى قىسقارتۋدى جوسپارلاپ وتىرعان كورىنەدى. اقىن داۋلەتكەرەي كاپۇلىنىڭ ايتۋىنش، نۇر-سۇلتان قالالىق سۋبەكتىلەردى وڭتايلاندىرۋ جونىندەگى كوميسسيانىڭ وتىرىسىندا وسىنداي ماسەلە قوزعالعان ەكەن.

پرەزيدەنت شتاتتى قىسقارت دەگەندە كىتاپحانانى جاۋىپ، كىتاپحاناشىلاردى قىزمەتىنەن قۋ دەمەگەنى ءسوزسىز. اكىمدىكتەردەگى، مينيسترلىكتەردەگى ءبىرى كىرىپ، ءبىرى شىعىپ بوس جۇرگەن قىزمەتكەرلەردى قىسقارتۋدى ايتقان بولار. ءبىزدىڭ ەلدە ءبىر اكىمگە بەس ورىنباسار، ءار ورىنباسارعا بەس كومەكشى كومەكتەسەتىنى جاسىرىن ەمەس. قىسقارتۋ كەرەك بولسا، وسىنداي ءبىر ادام ىستەيتىن جۇمىستى بەس ادام ىستەپ جۇرگەن قىزمەتكەرلەردەن باستاۋ كەرەك.

اكىم كولگىنوۆ جاعىمدى ءيميدجىن قالىپتاستىرۋ ءۇشىن ميلليونداپ قارجى بولگەنىمەن، ول ماقساتىنا جەتە الار ەمەس. كەرىسىنشە، بيۋدجەت قارجىسىن ءجونسىز جۇمساعان (پيارعا), حالىقپەن ساناسپاي وت شاشۋ اتاتىن، مەملەكەتتىك تىلگە قىرىن قارايتىن اكىم رەتىندە ەل ەسىندە قالىپ وتىر...

Abai.kz