سارسەنبى, 20 قاڭتار 2021
46 - ءسوز 986 0 پىكىر 28 قىركۇيەك, 2020 ساعات 16:02

قاشىقتان وقۋدىڭ قيىندىقتارى...

قر ءبىلىم جانە عىلىم ءمينيسترى

ا.ايماعامبەتوۆ مىرزاعا!

مەكتەپتەردەگى بۇگىنگى تاڭدا قاشىقتىقتان وقىتۋ مەتوديكاسى جەتىلدىرۋدى تالاپ ەتەدى. قازىرگى قولدانىستاعى Telegram, WhatsApp, Zoom, Microsoft Teams پلاتفورمالارىنىڭ ارقايسىسىنىڭ وزىندىك ارتىقشىلىقتارى دا، وزىندىك كەمىستىكتەرى دە تولىپ جاتىر. ەLearning Industry كەلتىرگەن دەرەكتەرگە قاراعاندا 2001 جىلدان بۇگىنگى 2020 جىلعا دەيىنگى ەلەكتروندىق ءبىلىم بەرۋ شەشىمدەرىنىڭ نارىعى 1000 پايىزعا دەيىن جاڭارىپتى. قاشىقتىقتان وقىتۋ مۇمكىندىكتەرى ونىڭ قۇرالدارىمەن بىرگە الداعى جىلداردا وسە تۇسەتىنى انىق. وسىنداي جاعدايدا ەلەكتروندىق قۇرىلعىلاردىڭ دا ارالۋاندىعىن ۇمىتپايىق. كومپيۋتەر، نوۋتبۋك، پلانشەت، كادىمگى قالتافون، ونىڭ سمارتفون، ايفون تۇرلەرى. وقۋشىلارعا ارنالعان بىرىڭعاي گادجەتتەر كەرەكتىگى كوزگە ۇرىپ تۇر.

ورتا مەكتەپتەردە قاشىقتىقتان وقىتۋدىڭ ۇلكەن مينۋستارىنىڭ ءبىرى - ساباق مەرزىمى مەن بوس ۋاقىتتىڭ شەكاراسى بەلگىلەنبەگەن. بالا ساباقتى ۇيدە وقۋ ارقىلى مەكتەپتە وقۋعا ءتيىستى دارىستەردى مەڭگەرىپ، ءۇي تاپسىرماسىن ورىنداپ، ءوزىن جەتىلدىرىپ وتىرۋعا ءتيىس. وسى جەردە تەك تەحنيكالىق ەمەس پسيحولوگيالىق تا كەمىستىكتەر قىلاڭ بەرەدى. ايتالىق، بارلىق ءپان مۇعالىمدەرىنە ءتان ورتاق كەمشىلىكتەردى الايىق. قاي ءپاننىڭ دە مۇعالىمى ءوز ءپانىن بارىنەن ماڭىزدى سانايدى. ولاردىڭ كوپشىلىگىندە: «بالا ۇيدە وتىر عوي، ۋاقىتى كوپ، سوندىقتان تاپسىرمانى ءۇيىپ-توگىپ بەرۋ كەرەك!» دەگەن وي قالىپتاسقان. ساباق ۇستىندە جاڭا تاقىرىپتى يگەردى مە، يگەرمەدى مە، ارى قاراي وزدەرىڭ وقىپ الىڭدار دەگەن سىڭايمەن بالاعا يتەرە سالادى.

سودان بالا مەكتەپتەگى ساباقتى ورىندايدى، ءۇي تاپسىرماسىن جاسايدى. كەيبىر مۇعالىمدەر ءتىپتى اقىلعا سىيمايتىن كولەمدە تاپسىرمالار بەرەدى. اراسىندا ۇيدە سىزاتىن، جاسايتىن جۇمىستار دا تولىپ جاتادى. قوسىمشا ساباقتار، ءتۇرلى جوبالارعا قاتىسۋ، بايقاۋلار تاعى بار. كىتاپ وقۋ كەرەك دەيمىز. سونىڭ سالدارىنان بالانىڭ ويناۋى، دەمالۋى، ءوزىن جەتىلدىرۋى، ۇيىقتاۋى تۇگىلى تاماق ىشۋگە ۋاقىتى تاپشى بولىپ جاتادى. تاۋلىگىنە 12-14 ساعات ەكى كوزى سمارتفوندا وتىرادى. بالالارعا جانىڭ اشيدى. ەكى كوزدەن نە قالادى؟

بالاعا ءبىلىم دەنساۋلىعى بولسا عانا كەرەك. قاشىقتىقتان وقىتۋ تەحنولوگياسىن جەتىلدىرۋ كەرەك دەيتىنىمىز دە سوندىقتان.

مارات ءبايدىلداۇلىنىڭ جازباسى

Abai.kz

0 پىكىر