قىرعىزستان پرەزيدەنتى سوورونباي جەەنبەكوۆ بىشكەكتەگى حالىقتىق دۇمپۋدەن كەيىن جەدەل ۇندەۋ جاسادى.

«قۇرمەتتى وتانداستار! وتكەن ءتۇنى كەيبىر ساياسي كۇشتەر مەملەكەتتىك بيلىكتى زاڭسىز قولعا الماق بولدى. ولار سايلاۋ قورىتىندىسىن سەبەپ رەتىندە پايدالانىپ، قوعامدىق ءتارتىپتى بۇزدى. ولار قالا تۇرعىندارىنىڭ تىنىشتىعىن بۇزدى. ولار قۇقىق قورعاۋشىلارعا باعىنباي، مەديتسينا قىزمەتكەرلەرىن سوققىعا جىعىپ، عيماراتتارعا نۇقسان كەلتىردى. مەن بىردە ءبىر ازاماتتىڭ ومىرىنە قاۋىپ توندىرمەۋ ءۇشىن كۇش قۇرىلىمدارىنا وق جاۋدىرىپ، قان توككىزبەۋدى بۇيىردىم.

ازىرگە ءبىز جاعدايدى ۋشىقتىرماۋ ءۇشىن بارلىق شارالاردى قابىلدادىق. مەملەكەت تىنىشتىعى، قوعام تىنىشتىعى كەز كەلگەن دەپۋتاتتىق مانداتتان باعالى.

مەن ورتالىق سايلاۋ كوميسسياسىنا زاڭبۇزۋشىلىقتاردى ابدەن تەرگەپ، قاجەتتىلىك تۋىنداسا، سايلاۋ قورىتىندىسىن جويۋدى ۇسىندىم.

ساياسي پارتيالاردىڭ كوشباسشىلارىن ءوز جاقتاستارىن تىنىشتاندىرىپ، ولاردى جينالعان جەرلەرىنەن تاراتۋعا شاقىرامىن. مەن ءوز وتانداستارىمدى بەيبىتشىلىكتى ساقتاپ، ارانداتۋشى كۇشتەردىڭ ۇندەۋىنە قۇلاق اسپاۋعا شاقىرامىن!. ءبىزدىڭ ەلىمىزدىڭ بەيبىتشىلىگى مەن قوعامىمىزدىڭ قاۋىپسىزدىگى – ەڭ ماڭىزدى دۇنيە. مەن بارلىق كۇشتەردى ەلىمىزدىڭ تاعدىرىن ساياسي مەنمەندىكتەن جوعارى قويىپ، قۇقىقتىق الاڭعا ورالۋعا شاقىرامىن!»، -دەلىنگەن مالىمدەمە.

ەستەرىڭىزگە سالا كەتەيىك، وتكەن تۇندە ميتينگىگە شىققاندار مەن قارۋلى كۇشتەردىڭ تەكەتىرەسى ساعات 20.00-دەن باستالىپ، اياعى «اق ءۇيدى» باسىپ الۋمەن اياقتالعان ەدى.

نارازى حالىقتىڭ اۋەلى پارلامەنتتى، كەيىن پرەزيدەنت رەزيدەنتسياسىن باسىپ العانى اقپاراتتا ايتىلدى. بۇدان بولەك، قىرعىز پرەزيدەنتى سوورونباي جەەنبەكوۆ بىشكەكتى تاستاپ، ەلدىڭ وڭتۇستىگىنە «قاشىپ» كەتكەنى حابارلاندى.

قىرعىزستاننىڭ ەكس-پرەزيدەنتى المازبەك اتامباەۆ پەن ەكس-پرەمەر ساپار يسكاكوۆتى حالىق قاماۋدان بوساتىپ الدى.

قىرعىزستاندا پارلامەنت سايلاۋىنىڭ قورىتىندىلارى جويىلدى. بۇل تۋرالى باس پروكۋروردىڭ مىندەتىن اتقارۋشى المامبەت شىقماماتوۆ حابارلادى. اق ۇيدەن ءورت شىقتى.

4 قازاندا قىرعىزستاندا جوگوركۋ كەڭەشتىڭ VII شاقىرىلىمىنا سايلاۋ ءوتتى. وعان 16 پارتيا قاتىستى. ولاردىڭ تەك تورتەۋى عانا 7 پروتسەنتتىك مەجەدەن ءوتتى.

جەڭىلگەن پارتيالار سايلاۋى كەزىندە اكىمشىلىك رەسۋرستاردىڭ كومەگىمەن ورەسكەل زاڭ بۇزۋشىلىقتاردىڭ ورىن العانىن مالىمدەدى.

ال جەڭىسكە جەتكەن «بيريمديك» پارتياسى قايتا سايلاۋعا دايىن ەكەنىن جەتكىزدى.

Abai.kz