قايىرىمدى جانداردىڭ ارقاسىندا تاعى ءبىر وتباسى باسپانالى بولدى
استانا ماڭىنداعى قوياندى اۋىلىندا ءتورت جىلدان بەرى كونتەينەردى پانالاپ كەلگەن مەكتەپ مۇعالىمى مايا تسوپونقىزى باسپانالى بولدى.
اتالعان يگى شاراعا قمدب «زەكەت» قورىنىڭ «ەل ۇلەسى – پاتەرگە» جوباسى مەن ەرلىك حايدارۇلى باستاعان ەل ازاماتتارى ۇيىتقى بولىپتى. بۇل تۋرالى قمدب وكىلى اعابەك قوناربايۇلى حابارلادى.
اعابەك قوناربايۇلى، قمدب ءباسپاسوز حاتشىسى:
- ول مەكتەپتە گەوگرافيا ءپانىنىڭ مۇعالىمى. ءتورت جىل بويى تەمىر كونتەينەردى پانالاۋعا ءماجبۇر بولدى. «وقۋشىلارىم كورىپ قويماسىن دەپ كونتەينەردەن ۇرلانىپ شىعامىن» دەيدى. تەمىر ۆاگون جازدا ىستىق، قىستا سۋىق بولادى. كۇيەۋى قۇرىلىس نىسانىندا ءجۇرىپ اۋىر جاراقات العان. جۇمىسقا جارامسىز بولعاندىقتان ول ءالى كۇنگە دەيىن كۇيەۋىنىڭ كۇتىمىن جاسايدى.
مەكتەپ پەن «تەمىر ءۇيدىڭ» اراسى 4 شاقىرىم. ساباققا جاياۋ بارىپ كەلەدى. اراسىندا كۇيەۋى مەن ەكى بالاسىنىڭ اس-اۋقاتىن دايىنداپ كەتەدى. ال، مەكتەپتەگى جۇمىسىنان بوساعان ساتتە تاڭ ازاننان قاراقات تەرىپ، ونى بازارعا اپارىپ ساتادى.
الايدا ول ءوزىنىڭ باسىنداعى وسى جاعدايدى ايتىپ حالىقتان كومەك سۇراپ، اكىمدىككە بارماعان. ەشكىمگە الاقان جايماعان. ءتىپتى، كۇنى كەشەگە دەيىن ارىپتەستەرى دە ونىڭ جايىنان حابارسىز ەدى.
سەبەبى ونىڭ ومىردەگى ۇستانىمى – قاناعات پەن ەڭبەك بولعان. ەندەشە، سول باتىر انامەن تانىس بولىڭىزدار. اتى – ءجونى – مايا تسوپونقىزى.
بۇگىن قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى ۇستازدار كۇنى قارساڭىندا مايا تسوپونقىزىنا ەلوردا ىرگەسىندەگى قوياندى اۋىلىنىان 3 بولمەلى پاتەردىڭ كىلتىن بەردى.
ۇستازدى ەرەكشە قۋانىشقا بولەگەن ناۋرىزاي قاجى تاعانۇلىنا، نەگىزگى قاراجاتتى بەرىپ، قولداۋ بىلدىرگەن كەڭ جۇرەكتى كاسىپكەر ەرلىك حايدارۇلىنا جانە «زەكەت قورىنىڭ ۇجىمىنا، ەلوردا يمامدارىنا سونىمەن قاتار ءۇيدى تۇرمىستىق زاتتار مەن جيھازعا تولتىرعان بارشا ازاماتتارعا اللا رازى بولسىن!
بۇل كۇن – 4 جىلدىق سىناقتىڭ كىشكەنتاي عانا سىيى بەرىلگەن كۇن. قيىندىققا مويىماي، قاناعات پەن ەڭبەكتى ءومىرىنىڭ نەگىزىنە اينالدىرعان مايانىڭ قايسارلىعى مەن وجەتتىگى قازاقتىڭ باسقا دا قىز-كەلىنشەكتەرىنە، قيت ەتسە اجىراسۋعا بەيىم تۇراتىن جاندارعا ۇلگى بولسا ەكەن...
ءبىز اتالعان ءسۇيىنشى جاڭالىقتى ەستىپ، مايا تسوپونقىزىنا حابارلاسقان ەدىك. مۇنداي قۋانىشتى كۇتپەدىك دەپ اعىنان جارىلعان مۇعالىم بارشا قولداۋ بىلدىرگەن ازاماتتارعا العىسىن ايتتى.
«مەنىڭ جاعدايىم تۋرالى ارىپتەستەرىم دە بىلمەيتىن»
مايا تسوپونقىزى، ۇستاز:
- مەن استانا قالاسى تسەلينوگراد اۋدانىنداعى قوياندى ورتا مەكتەبىندە مۇعالىم بولىپ جۇمىس ىستەگەنىمە ءۇش جىل بولدى. مەكتەپكە ورنالاسقانعا دەيىن ماگنۋمدە،1-اۆتوپاركتە كوندۋكتور بولىپ ىستەدىم. جولداسىم، ەكى ۇلىم بار. كۇيەۋىم ەكىنشى توپتاعى مۇگەدەك.
ءبىز ءتورت جىل بويى كونتەينەردە تۇردىق. بىراق، مەن ەشكىمگە جاعدايىمدى ايتقان جوقپىن. ءتىپتى مەنىڭ جاعدايىم تۋرالى ارىپتەستەرىم دە بىلمەيتىن ەدى. «ماعان كومەك بەرىڭىز، باسپانا بەرىڭىز» دەپ قوياندى اۋىلىنىڭ اكىمىنە دە بارماپپىن. سەبەبى، تاپقانىمىز تاماعىمىزعا، وزىمىزگە جەتكىلىكتى بولدى. ودان كەيىن مەكتەپكە ورنالاسقان سوڭ، سول جۇمىسىمدى جاقسىلاپ ىستەسەم، باسپاناعا دا جەتەرمىز دەگەن وي بولدى. ءالى جاسپىز. قۇدا-قۇداعي بولعانشا، ءوزىمىزدىڭ باسپانامىز بولار دەيتىن ەدىك.
ونىڭ ۇستىنە ماعان مەملەكەت باسپانا بەرۋگە، بالالارىمدى كيىندىرۋگە، كۇيەۋىمدى قاراسۋعا مىندەتتى ەمەس قوي. جانە مەن ۇستاز بولعان سوڭ، بەدەلىم بار. ونى تومەندەتپەۋىم كەرەك.
ال، كەشە قوناققا شاقىرىپ، ويلاماعان جەردەن توسىن سىي جاسادى. كەڭ ءۇي. بارلىق جاعداي جاسالعان. ءالى «شوك» بولىپ ءجۇرمىز.
كەيبىر كىسىلەر «ۇستازداردىڭ جالاقىسى جاقسى عوي، جاعدايى وداندا ناشار ادامدارعا بەرمەي مە» دەپ جازىپ جاتىر ەكەن. الايدا، مەنىڭ ايلىعىما جۋىردا عانا (قوسىمشا سىنىپتار اشىلعان سوڭ) قوسىلدى (ايلىعى - 100 مىڭ تەڭگە). دەگەنمەن، ەشكىمگە شاعىم ايتپايمىن. ءبارى دە اللانىڭ قالاۋىمەن عوي...
اتالعان يگىلىكتى شاراعا سەناتور دانا نۇرجىگىت بارىپ، مايانىڭ قۋانىشىمەن قۇتتىقتادى. سونىمەن قاتار ىزگى جۇرەكتى جانداردىڭ قولداۋىمەن جاڭا باسپاناعا سىيلىقتار تابىستالىپ، ىزگى تىلەكتەر ايتىلدى. ىزگى ىسكە ۇيىتقى بولعان ازاماتتار مەن ەل اعالارى دا باسپانالى بولعان وتباسىنا جاقسى تىلەكتەرىن ايتىپ، قۋانىشتارىمەن ءبولىستى.
وسىلايشا قمدب «زەكەت» قورىنىڭ «ەل ۇلەسى – پاتەرگە» جوباسى تاعى ءبىر وتباسىنىڭ باسپانالى بولىپ، قۋانىشقا بولەنۋىنە ۇيىقتى بولدى.
Abai.kz
