جۇما, 29 ناۋرىز 2024
46 - ءسوز 2427 1 پىكىر 6 قازان, 2020 ساعات 15:43

«مينيستر ءاربىر پاتسيەنت پەن دارىگەر ءۇشىن جاۋاپتى بولۋعا ءتيىستى»

بۇل ءسوز - وسى ايدا 90 جاسقا كەلگەلى وتىرعان، 11 جىلداي قازاقستاننىڭ دەنساۋلىق ساقتاۋ ءمينيسترى بولعان ارداقتى اعامىز تورەگەلدى شارمانوۆتىڭ ايتقان ءسوزى ەكەن. ونى پارلامەنت ءماجىلىسىنىڭ توراعاسى، «Nur Otan» پارتياسى فراكتسياسىنىڭ جەتەكشىسى نۇرلان نىعماتۋلين وتكەن جۇما كۇنى بولعان اتالمىش فراكتسيانىڭ كەڭەيتىلگەن وتىرىسىندا ەسكە الىپ، بۇگىنگى دەنساۋلىق ساقتاۋ ءمينيسترى الەكسەي تسويدىڭ نازارىن اۋداردى.

مۇنىڭ وزىندىك سەبەبى بار: مەملەكەت باسشىسى قاسىم-جومارت توقاەۆ كوروناۆيرۋس ىندەتىمەن جان اياماي كۇرەسىپ جۇرگەن مەديتسينا قىزمەتكەرلەرى وسى اسا قاتەرلى دەرتتى جۇقتىرىپ العان جاعدايدا ولاردىڭ ارقايسىنا 2 ميلليون تەڭگە ماتەريالدىق كومەك بەرۋدى، ال قازا تاپسا، وتباسىسىنا 10 ميلليون تەڭگە وتەماقى تولەۋدى تاپسىرعانى ءمالىم. بۇعان قاجەتتى قارجىنى ۇكىمەت بولگەنىمەن، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ جانە جەرگىلىكتى اتقارۋشى ورگانداردىڭ پرەزيدەنت تاپسىرماسىن بىرلەسە ورىنداۋ بارىسى سىن كوتەرمەيتىندەي سىلبىر بولىپ شىقتى.

سول سەبەپتى كورونوۆيرۋسپەن ارپالىس كەزىندە اۋىر ناۋقاستارعا اراشا ءتۇسىپ ءجۇرىپ، وزدەرى دە دەرت جۇقتىرىپ العان مەديتسينا قىزمەتكەرلەرى جانە مەرت بولعان دارىگەرلەر مەن مەيىرگەرلەردىڭ وتباسىلارى پارلامەنت ماجىلىسىنە شاعىم تۇسىرۋگە ءماجبۇر بولعان. وسىعان وراي نۇرلان زايروللاۇلى مەديكتەردىڭ رەنىشىن تۋعىزعان ماسەلەنى «Nur Otan» پارتياسى فراكتسياسىنىڭ وتىرىسىندا ارنايى قاراۋ تۋرالى شەشىم قابىلداعان-دى.

بۇل شىن مانىندە پارلامەنتتىك تەكسەرىس سىندى ءىس-شارا بولدى. ءبىز، نۇروتاندىق دەپۋتاتتاردىڭ ءبىر توبى، ءبىر اپتا ىشىندە استانا مەن بارلىق وڭىردە قالىپتاسقان جاعدايدى جان-جاقتى زەرتتەپ-زەردەلەپ، تالاي كەمشىلىكتىڭ بەتىن اشتىق. قىركۇيەكتىڭ 22-نە دەيىن كوروناۆيرۋس جۇقتىرعان مەديكتەردىڭ نەبارى 14 پايىزىندايى عانا، ال قازا بولعان اق حالاتتى ابزال جانداردىڭ قايعىعا باتىپ، قان جۇتىپ وتىرعان وتباسىلارىنىڭ 13 پايىزدايى عانا وزدەرىنە تيەسىلى قاراجاتتى العاندىعى اشكەرەلەندى. بۇل جۇمىس ماسەلەگە ءماجىلىس توراعاسى تىكەلەي نازار اۋدارعان سوڭ عانا ءسال دە بولسا، جاندانا باستاعان.

شىنىن ايتقاندا، «جانى اشىماستىڭ قاسىندا باسىڭ اۋىرماسىننىڭ» كەرى. ماسەلەن، ماڭعىستاۋلىق ءبىر وتباسى قولدارىندا ىندەتپەن كۇرەستە جان قيعان دارىگەردىڭ قايتىس بولعاندىعى جايلى رەسمي انىقتاما بار بولا تۇرا، ونىڭ دۇنيەدەن وزعاندىعىن دەنساۋلىق ساقتاۋ مينيسترلىگىنىڭ اقپاراتتىق جۇيەسى ارقىلى دالەلدەي الماي، دال بولعان.

وتىرىسقا قاتىسقان نۇر-سۇلتان قالاسىنداعى ءبىرىنشى اۋرۋحانانىڭ رەانيماتولوگ-دارىگەرى مۇحيت تۋلانوۆ ءوزىنىڭ جانە ءبىر توپ ارىپتەسىنىڭ كوروناۆيرۋس جۇقتىرسا دا، كۇنى-ءتۇنى جۇمىستان كەتپەي، تالاي ناۋقاستى ءولىم اۋزىنان الىپ قالعاندىقتارىن، الايدا سول كۇندەرى ەڭبەككە جارامسىزدىق پاراقشاسىن اشقىزباعاندىقتارى ءۇشىن «كىنالى» بولىپ، ءتيىستى ماتەريالدىق كومەكتەن قاعىلعاندىقتارىن ايتتى. بارىپ تۇرعان بيۋروكراتتىقتىڭ قانىڭدى باسىڭا شاپتىراتىن سوراقى مىسالى ەمەس پە بۇل؟!

وسىنداي فاكتىلەردىڭ بىرنەشەۋى جاريا ەتىلگەن جيىندى قورىتىندالاي كەلە، نۇرلان نىعماتۋلين الەكسەي تسويعا ەكس-مينيستر تورەگەلدى شارمانوۆتان ونەگە الىپ، ەلىمىزدەگى ءاربىر پاتسيەنت پەن دارىگەر ءۇشىن جاۋاپكەرشىلىكتى ءوز موينىنا الۋى قاجەتتىگىن ەسكەرتتى.

وتىرىستا وتكىر سىنعا الىنعان ۇكىمەت مۇشەلەرىنە جول بەرىلگەن ورەسكەل كەمشىلىكتەردى تۇزەتۋ ءۇشىن ءبىر اي مەرزىم بەرىلدى. بۇل وزەكتى ماسەلە ماجىلىستەگى «Nur Otan» پارتياسى فراكتسياسىنىڭ باقىلاۋىنا الىندى.

كارىباي مۇسىرماننىڭ جازباسى

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3577