2020 جىلدىڭ 15-قازانىندا مۇحتار اۋەزوۆ اتىنداعى قازاق مەملەكەتتىك اكادەميالىق  دراما تەاترى ءوزىنىڭ  95-ماۋسىمىن اشادى.

ماۋسىم شىمىلدىعى «ابايدىڭ جۇمباعى» قويىلىمىنىڭ   پرەمەراسىمەن اشىلادى. ساحنالىق نۇسقاسىن جاساعان – بولات ءابدىلمانوۆ، مادينا وماروۆا. قويۋشى رەجيسسەرى – اريداش وسپانباەۆا. قويۋشى سۋرەتشى  مۇرات  ساپاروۆ..

«ابايدىڭ جۇمباعى» تۋرالى: اباي – تۇتاس ءبىر الەم، ءالى تولىق يگەرىلىپ بولماعان عارىش. اباي جۇمباعىن شەشۋگە ۇمتىلۋ – ونىڭ ومىرلىك-ونەرلىك بايانىن زەردەلەپ بايقاۋعا دەگەن ۇمتىلىس. ۇلى اقىننىڭ ءوزىنىڭ الەۋمەتتىك ورتاسىنان ەرەكشەلەنۋىنىڭ، ادام اتتى ۇلى قۇبىلىستى زەرتتەۋ-تانۋ جولىندا «تولىق ادام» ءىلىمىن اشۋىنىڭ، وسىلايشا حاكىمدىك دەڭگەيگە جەتۋىنىڭ جۇمباعى نەدە؟ بۇل كۇردەلى ساۋالدارعا ابايدىڭ ءوز شىعارماشىلىعىنا جانە م.اۋەزوۆتىڭ اتاقتى «اباي جولى» ەپوپەياسىنىڭ وقيعالارىنا سۇيەنە وتىرىپ، ءوز تاراپىنان جاۋاپ ىزدەيتىن قويىلىم كورەرمەنىن دە وسى ءبىر كۇردەلى ساۋال توڭىرەگىندە ويسەرىكتەستىككە شاقىرادى.

21 قازاندا كورسەتىلەتىن جاڭا قويىلىمنىڭ اتى – «قارا». «قارا» - ابايدىڭ «قارا سوزدەرى» جەلىسىمەن جازىلعان دراما – ديالوگ. ساحنالىق نۇسقاسىن جاساۋشى ءارى قويۋشى رەجيسسەرى – جۇلدىزبەك  جۇمانباي. قويۋشى سۋرەتشى – قۋات تۇستىكباەۆ..

«قارا» قويىلىمى تۋرالى: ابايدىڭ «قارا سوزدەرى» نەگىزگە الىنعان سپەكتاكل پىكىرتالاس فورماسىندا قويىلعان. جالعىز كەيىپكەر – اباي جانە ابايدىڭ ويلارى. ول ويلارعا ءپىشىن دارىتىپ، جان بۇركەتىن وتىز بەس اكتەر. سپەكتاكل ابايدىڭ كەيىنگى ۇرپاققا ايتىپ كەتكەن وسيەتىن بۇگىنگى زامان تىنىسى، كوكەيكەستى ماسەلەلەرى اياسىندا قاراستىرا وتىرىپ، ۇلتتىق قۇندىلىقتاردى، بەيبىتشىلىك  پەن  كەلىسىمدى دارىپتەيدى.

Abai.kz