5-ءشى قاراشادا «قازمۇنايگاز» ۇك اق (بۇدان ءارى – قمگ) باسقارما توراعاسىنىڭ مۇناي وڭدەۋ جانە مۇناي حيمياسى جونىندەگى ورىنباسارى دانيار تيەسوۆتىڭ اتىراۋ مۇناي وڭدەۋ زاۋىتىنا (بۇدان ءارى – ءاموز) ارنايى ساپارى بارىسىندا جينالىس ءوتتى. جينالىستا بيولوگيالىق تازارتۋ قۇرىلىستارىندا ورىن العان وقيعا قاراستىرىلدى.

اتاپ ايتقاندا، قازىرگى كەزدە مۇناي ونىمدەرىنىڭ بەكىتىلگەن نورمادان شەكتى رۇقسات ەتىلگەن شىعارىندىلارىنىڭ جوعارى مولشەرى انىقتالماعانى جونىندە ەسەپ بەرىلدى. بۇدان بولەك، وقيعا سەبەپتەرى مەن جۇرگىزىلگەن تەكسەرۋدىڭ ناتيجەلەرى ەسكەرىلىپ، تابيعاتتى قورعاۋ بويىنشا ءىس-شارالار جوسپارى قايتا پىسىقتالدى. وقيعانى تەرگەۋ جونىندەگى كوميسسيانىڭ تەكسەرۋ ناتيجەلەرى بويىنشا ءاموز-ءدىڭ جاۋاپتى تۇلعالارىن جازاعا تارتۋ تۋرالى شەشىم قابىلداناتىن بولادى.

«قالا ءۇشىن كۇردەلى وقيعا ورىن الدى. وعان زاۋىت جاۋاپتى. قالا تۇرعىندارىنان كەشىرىم سۇرايمىز. قمگ باسشىلىعى جاعدايدى ءجىتى باقىلاۋىندا ۇستاپ وتىر. ءبىز زاۋىتتا اۋقىمدى جاڭعىرتۋ جۇمىستارىن جۇرگىزدىك، بىراق، وكىنىشكە قاراي، قىزمەتكەرلەرىمىزدىڭ سانا-سەزىمى، سونىڭ ىشىندە وندىرىستىك تسيكلدەر ءۇشىن جەكە جاۋاپكەرشىلىگى جاعى ءالى دە جاڭعىرۋ ۇستىندە. بۇل قىزمەتكەرلەر دە وسى قالانىڭ تۇرعىندارى، ولاردىڭ جۇمىسىنىڭ ناتيجەسى بۇكىل اتىراۋ حالقىنىڭ امان-ساۋلىعىنا تىكەلەي اسەر ەتەدى. زاۋىت اسا قىسقا مەرزىم ىشىندە جاعدايدى تۇزەتىپ، الداعى ۋاقىتتا وسىنداي اپاتتاردى بولدىرماۋ بويىنشا ءتيىستى شارالار قابىلداۋعا ءتيىس»، – دەپ اتاپ ايتتى د.تيەسوۆ.

ەسكە سالا كەتەيىك، 2020 جىلدىڭ 1 قاراشاسىندا ساعات 16.00-دە ەلەكتر قۋاتىن بەرۋ جۇمىستارىنىڭ اقاۋى سالدارىنان اعىندى سۋدى بيولوگيالىق تازارتۋ بلوگى تۇندىرعىشىنىڭ شلامدى رەتسيركۋلياتسيالاۋ سورعىسى توقتاپ قالعان بولاتىن. سوعان بايلانىستى تۇندىرعىشتىڭ قۇم سۇزگىسىنە شىعۋى ورنىندا قالقىما جانە ورگانيكالىق زاتتار (بيوشلام) شىعارىندىلارى شامادان استى. بۇل كەزدە قۇم سۇزگىسى بلوگىندا جوندەۋ جۇمىستارى ءجۇرىپ، اتالعان بلوك تەحنولوگيالىق سحەمادان ۋاقىتشا اجىراتىلعان ەدى. سونىڭ سالدارىنان بيولوگيالىق تازارتۋ قۇرىلىستارىنان قۇرامىندا قالقىما جانە ورگانيكالىق زاتتارى بار سارقىندى سۋ ءنورماتيۆتى-تازارتىلعان سارقىندى سۋ ارناسى اعىپ كەتتى.

قاراشانىڭ 1-ءى كۇنى ساعات 23:00-دە بيولوگيالىق تازارتۋ قۇرىلىستارىنىڭ جۇمىس ءتارتىبى قالپىنا كەلتىرىلدى. سونىمەن قاتار، ءنورماتيۆتى-تازارتىلعان سارقىندى سۋ ارناسىندا بيوشلامنىڭ بۋلانۋ ورىستەرىنە ودان ءارى وتۋىنە جول بەرمەيتىن بوگەتتەر ورناتىلدى. قازىرگى ۋاقىتتا ارناداعى بيوشلام ۆاكۋمدىق ماشينالارمەن سورىلىپ، زاۋىتقا كەرى اكەلىنۋدە.

Abai.kz