تانىمال بلوگەر ميراس ىبرايىموۆ اعىلشىن تىلىندە «بورات ەلى: داڭقتى قازاق مەملەكەتى» دەپ اتالاتىن دەرەكتى فيلم ءتۇسىردى. بۇل تۋرالى «حابار 24» مالىمدەدى. 

ءفيلمنىڭ باسىم بولىگى – ماڭعىستاۋ وڭىرىنە ارنالعان. وندا كيەلى ولكەنىڭ تاڭعاجايىپ تابيعاتى مەن كوركەم جەرلەرى تاسپالانعان. كاسىپكەر ساياحاتتاپ ءجۇرىپ، الەمگە ناعىز قازاقستاندى كورسەتۋدى ماقسات ەتەدى.

بلوگەر 23 قازاندا «بورات 2» ءفيلمىنىڭ شىعاتىنىن ەستىگەن بويدا بۇرىننان ويدا جۇرگەن بەينەروليكتى تۇسىرۋگە كىرىسىپ كەتكەنىن ايتادى.

«بۇل فيلم ساشا بارون كوەنعا جاۋاپ ەمەس. تەك ەلىمنىڭ كەرەمەتتەرىن پاش ەتەتىن دەرەكتى فيلم تۇسىرۋگە سەبەپ بولدى» دەپ جازادى ميراس ءوز پاراقشاسىندا.

بەينەروليكتە ول كاسپي جاعالاۋىنداعى ارۋ قالا اقتاۋدان باستاپ، بوزجىرا شاتقالى، ىبىقتى سايى مەن قاراقۇم جونىندە اعىلشىنشا اڭگىمەلەپ بەرەدى. تۇيە شارۋشالىعىندا بولىپ، جەرگىلىكتى تۇرعىنداردىڭ ءومىرىن كورسەتەدى.

قازىر بۇل فيلم الەۋمەتتىك جەلىدە قىزۋ تالقىلانىپ، وزگە ەلدەرگە كەڭىنەن تارالا باستاعان.

Abai.kz