ونىڭ سوزىنە قاراعاندا، دۇيسەنبى كۇنى لۆوۆ سوتى ونىڭ اپەللياتسيالىق شاعىمىن قاراعان. "پراۆو نا زاششيتۋ" ۇيىمى ادۆوكاتىنىڭ (اتى-ءجونىن ايتپادى) ايتۋىنشا، 6 قاراشادا سوت ونى ۇستاۋ جانە ەلدەن شىعارۋ تۋرالى سوت شەشىمىن شىعارعان. ەركىنۇلى ءبىرىنشى ينستانتسياداعى وسى شەشىمگە شاعىم ءتۇسىرىپ، سوت ءوتىنىشىن قاناعاتتاندىرعان.

8 جەلتوقساندا الماتى ۋاقىتىمەن كەشكە ازاتتىق تىلشىسىمەن تەلەفون ارقىلى سويلەسكەن ۇيىم ادۆوكاتى ەركىنۇلىن كيەۆكە شىعارىپ سالىپ جاتقانىن ايتتى. ول جاقتا ونى قازاق قاۋىمداستىقتارى قارسى الادى.

وسىعان دەيىن ۋكراينانىڭ كوشى-قون قىزمەتىنە بوسقىن مارتەبەسىن بەرۋ تۋرالى ءوتىنىش ءتۇسىرىپ، پانا ىزدەۋشى تۇلعا كۋالىگىن العان ەركىنۇلى ەندى ء"تىل كۋرسىنا بارۋدى جوسپارلاپ وتىر".

"بوسقىن مارتەبەسىن سۇراعاندىقتان مەنى وسىندا بوسقىندار لاگەرىنە جىبەرۋى دە مۇمكىن ەدى، بىراق مەن ءوزىم شاعىمدانىپ جاتىپ، قاماۋدان شىقتىم. مەن ۋكراين، ورىس ءتىلىن بىلمەيمىن. سوندىقتان دا وسىندا ءتىل مەڭگەرۋدى قولعا الاتىن شىعارمىن" دەيدى ەركىنۇلى ازاتتىققا.

اقپارات بويىنشا، بوسقىن مارتەبەسىن سۇراۋ تۋرالى ءوتىنىشتى ۋكراينا بيلىگى ءبىر جىل ارالىعىندا قارايدى.

قازان ايىنىڭ سوڭىندا ۋكراينانىڭ لۆوۆ وبلىسىندا ۇستالعان 23 جاستاعى ەرسىن ەركىنۇلى وسىعان دەيىن ءوزىن قىتايعا دەپورتاتسيالاۋى مۇمكىن ەكەنىن ايتىپ، اقپارات قۇرالدارىنان كومەك سۇراعان ەدى. "قىتايعا قايتسام، مەنى تۇرمە مەن ازاپ، قورلىق، ءولىم كۇتىپ تۇر. سوندىقتان مەنى قازاقستانعا الىپ كەتىڭىزدەرشى" دەگەن ەدى ۆيدەومالىمدەمەدە ەركىنۇلى.

ىزىنشە وعان ۋكراينانىڭ "پراۆو نا زاششيتۋ" قۇقىق قورعاۋ ۇيىمىنىڭ زاڭگەر تاعايىنداپ، كومەكتەسە باستاعانى حابارلاندى. كەيىنىرەك ەركىنۇلى پانا ىزدەۋشى تۇلعا كۋالىگىن الدى. ۋكراينا زاڭگەرلەرىنىڭ ايتۋىنشا، كوشى-قون قىزمەتىنە بوسقىن مارتەبەسىن بەرۋ تۋرالى ءوتىنىش تۇسسە، ەلدەن شىعارۋ پروتسەدۋراسى تۇتاس توقتاپ، ساياسي باسپانا بەرۋ تۋرالى شەشىم شىققانعا دەيىن دەپورتاتسيا ماسەلەسى شەگەرىلەدى. قۇقىق قورعاۋ ۇيىمى بۇعان دەيىن ونى قىتايعا دەپورتاتسيالاماۋعا "بار كۇشىن سالاتىنىن" ايتقان.

وسىعان دەيىن كەلىپ تۇسكەن اقپارات بويىنشا، قازاقستاننان ازاماتتىق الا الماي، تۇركياعا ونان ءارى ەۋروپاعا ءوتىپ، كيەۆتىڭ بوريسپول اۋەجايىنا كەلگەندە قۇجاتتارىن جوعالتىپ العان ەركىنۇلىن ۋكراين شەكاراشىلارى بيىل قازاننىڭ سوڭىندا لۆوۆ وبلىسىندا "شەكارانى زاڭسىز كەسىپ وتپەك بولعانى ءۇشىن" ۇستاعان. بۇعان دەيىن سوت ءوتىپ، ايىپپۇل سالعان.

سوڭعى بىرنەشە جىلدا قىتايدىڭ شىڭجاڭ ايماعىنان بىرنەشە ەتنيكالىق قازاق قاشىپ كەلگەن. ولار سول جاقتاعى قىسىمعا شىداماي، قاشۋعا ءماجبۇر بولعاندارىن ايتقان. قازاقستان بيلىگى جاقىندا تورتەۋىنە بوسقىن مارتەبەسىن بەرگەن. ءبىر-ەكى جىل بۇرىن بوسقىن مارتەبەسىنە قول جەتكىزە الماعان سايراگۇل ساۋىتباي وتباسىمەن بىرگە شۆەتسياعا قونىس اۋدارعان ەدى.

بىرىككەن ۇلتتار ۇيىمىنىڭ ەسەبىنشە، 2017 جىلدان باستاپ شىڭجاڭدا تۇراتىن ءبىر ميلليونعا جۋىق ۇيعىر، قازاق، قىرعىز جانە باسقا دا مۇسىلمان "قايتا ساياسي تاربيەلەۋ" لاگەرلەرىنە قامالعان. پەكين بۇل ورىنداردى "تەرروريزممەن كۇرەس ورتالىعى" دەپ اتاعان. قۇقىق قورعاۋشىلار مەن كۋاگەرلەر لاگەرلەردە ازاپتاۋ، قىسىم جاساۋ، زورلىق-زومبىلىق، ءماجبۇرلى تۇردە جۇمىس ىستەتۋ سياقتى ادام قۇقىعىن ورەسكەل بۇزۋ فاكتىلەرى بارىن ايتادى.

بۇعان دەيىن لاگەرلەردە وتىرىپ شىققان قازاقتار قازاقستانعا ورالعان سوڭ شىڭجاڭداعى قۋدالاۋ جايلى دەرەكتەرىمەن بولىسكەن. ولاردىڭ ايتقاندارى الەمدىك باق بەتتەرىندە دە جاريالاندى. حالىقارالىق قاۋىمداستىق قىتايدىڭ شىڭجاڭداعى ساياساتىن ءجيى سىنايدى.

Abai.kz