پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر ەنگىزۋ تۋرالى» قر كونستيتۋتسيالىق زاڭى قابىلداندى.

وسى زاڭ جوباسى مەملەكەت باسشىسىنىڭ 2020 جىلعى 1 قىركۇيەكتەگى جاۋاپتى حاتشىلار ينستيتۋتىن تاراتۋ تۋرالى تاپسىرماسىن ىسكە اسىرۋ ماقساتىندا ازىرلەندى.

«قازىرگى ۋاقىتتا جاۋاپتى حاتشىلاردى پرەزيدەنت تاعايىندايدى جانە ولار تيىسىنشە جوعارى ستاتۋسقا يە. وسى تۇزەتۋلەر قابىلدانعاننان كەيىن ولاردىڭ مىندەتتەرى اپپارات باسشىلارىنا جۇكتەلەدى. اپپارات باسشىلارىن مينيسترلەر تاعايىندايدى جانە ولارعا ەسەپتى بولادى.

وسىعان بايلانىستى، «قازاقستان رەسپۋبليكاسىنىڭ ۇكىمەتى تۋرالى» كونستيتۋتسيالىق زاڭنان جاۋاپتى حاتشىلاردىڭ مارتەبەسى مەن وكىلەتتىكتەرىن رەتتەيتىن نورمالاردى الىپ تاستاۋ جانە ولاردى «مەملەكەتتىك قىزمەت تۋرالى» زاڭدا اپپارات باسشىلارىنا بەكىتۋ ۇسىنىلادى»، - دەدى قر مەملەكەتتىك قىزمەت ىستەرى اگەنتتىگىنىڭ توراعاسى انار جايلعانوۆا.

زاڭ جوباسىنان كۇتىلەتىن ناتيجەلەر:

- مەملەكەتتىك اپپاراتتىڭ تۇراقتىلىعى;

- مەملەكەتتىك ورگانداردىڭ ءبىرىنشى باسشىلارىنىڭ جاۋاپكەرشىلىگىن ارتتىرۋ;

- مەملەكەتتىك ورگانداردىڭ جۇمىسىنداعى كادرلىق ساباقتاستىقتى ساقتاۋ.

Abai.kz