مەملەكەت باسشىسى «التىن ساپا» كونكۋرسىنىڭ جەڭىمپازدارىن ماراپاتتاۋ راسىمىنە قاتىستى. قاسىم-جومارت توقاەۆ ءوز سوزىندە تاۋەلسىزدىك جىلدارىندا مەملەكەتتىڭ قولداۋىمەن وتاندىق بيزنەستىڭ جاڭا لەگى قالىپتاسقانىن جانە ولار ۇلتتىق ەكونوميكانىڭ باستى قوزعاۋشى كۇشىنە اينالعانىن اتاپ ءوتتى.

– يندۋستريالاندىرۋ كەزەڭىندە ەلىمىزدە 1300-دەن استام جاڭا ءوندىرىس  ىسكە قوسىلدى. ناتيجەسىندە بۇرىن وندىرىلمەگەن كوپتەگەن تاۋارلار شىعارىلا باستادى. سونداي-اق 200 مىڭ جۇمىس ورنى اشىلدى. ازاماتتارىمىز زامان تالابىنا ساي جاڭا كاسىپتەردى يگەرۋدە. وسىنىڭ ءبارى حالقىمىزدىڭ ءال-اۋقاتىن جانە باسەكەلىك قابىلەتىن ارتتىرۋعا مۇمكىندىك بەرەدى. ءبىزدىڭ ماقساتىمىز – قازاقستاندى  قۋاتتى مەملەكەتكە اينالدىرۋ، – دەدى پرەزيدەنت.

مەملەكەت باسشىسىنىڭ ايتۋىنشا، پاندەميا مەن الەمدىك ەكونوميكالىق داعدارىسقا قاراماستان، 11 ايدىڭ قورىتىندىسى بويىنشا وڭدەۋ ونەركاسىبىندەگى ءوسىم قارقىنى 3,3% دەڭگەيىندە ساقتالىپ وتىر. بيىل يندۋستريالاندىرۋ كارتاسى اياسىندا 20 مىڭ جاڭا جۇمىس ورنىمەن قامتاماسىز ەتەتىن 200-دەن استام ءوندىرىس ىسكە قوسىلدى. سوڭعى بەس جىلدا ەكونوميكاداعى شاعىن جانە ورتا بيزنەستىڭ ۇلەسى 24-تەن 32 پايىزعا ارتتى. كاسىپكەرلىك سالاداعى جۇمىسپەن قامتۋ كولەمى 21 پايىزعا، ياعني 2,8-دەن 3,4 ميلليون ادامعا كوبەيدى. بۇل ۇكىمەت پەن «اتامەكەن» ۇلتتىق كاسىپكەرلەر پالاتاسىنىڭ قولايلى بيزنەس-احۋال قالىپتاستىرۋ، قارجىلاي جانە باسقا دا قولداۋ شارالارىن ۇسىنۋ جونىندەگى دايەكتى جۇمىستارىنىڭ ناتيجەسىندە مۇمكىن بولدى. بيىل بيزنەسكە مەملەكەتتىك قىزمەت كورسەتۋ مەرزىمىن قىسقارتۋ، راسىمدەردى قايتا رەتتەۋ جانە ودان ءارى جەڭىلدەتۋ ماسەلەلەرىن قامتيتىن زاڭنامالىق باستامالاردىڭ سەگىزىنشى توپتاماسى قابىلداندى.

– بيىلعى 1 قاڭتاردان باستاپ مەنىڭ جارلىعىممەن شاعىن جانە ميكرو كاسىپكەرلىك سۋبەكتىلەرىن تەكسەرۋگە الداعى ءۇش جىلعا موراتوري ەنگىزىلدى. مەنىڭ تاپسىرمام بويىنشا ۇكىمەت پەن ۇلتتىق پالاتا رەتتەۋ ساياساتىنىڭ جاڭا ادىستەرىن ازىرلەۋگە كىرىسىپ كەتتى. كەلەسى جىلدان باستاپ قازىرگى تالاپتاردى قايتا قاراۋ جانە «جاڭادان رەتتەۋ» قاعيداتىن ەنگىزۋ جونىندەگى زاڭنامالىق نورمالار بىرتىندەپ قابىلداناتىن بولادى. بۇل بيزنەستى «اقىلدى رەتتەۋدىڭ» تۇبەگەيلى جاڭا جۇيەسىن قالىپتاستىرا وتىرىپ، ماڭىزدى ەمەس ەرەجەلەر مەن قايتالاناتىن تالاپتاردى الىپ تاستاۋعا مۇمكىندىك بەرەدى، – دەدى قاسىم-جومارت توقاەۆ.

پرەزيدەنت ەكونوميكانى مەملەكەت مەنشىگىنەن ودان ءارى الۋ ءىسى ناقتى باسەكەلەستىكتى دامىتۋدا جانە ءار كاسىپكەرگە شىن مانىندە تەڭ مۇمكىندىك بەرۋدە ماڭىزدى ءرول اتقاراتىنىن ايتتى.

– ءبىز مەملەكەتتىڭ ەكونوميكاعا ارالاسۋ ۇلەسىن ايتارلىقتاي ازايتۋ ءۇشىن بىرتىندەپ جاعداي جاسايمىز. بيىل كۆازيمەملەكەتتىك سەكتور سۋبەكتىلەرىن قۇرۋعا جاريالانعان موراتوري اياقتالادى. بۇل باعىتتاعى ماقساتقا ءالى تولىق قول جەتكىزىلگەن جوق دەپ سانايمىن. سوندىقتان مەنىڭ جارلىعىممەن اتالعان موراتوري كەلەسى جىلدىڭ اياعىنا دەيىن سوزىلادى. مەملەكەت وڭتايلى بيزنەس ورتا قالىپتاستىرۋدان بولەك، ەلىمىزدەگى كاسىپكەرلىكتى جان-جاقتى دامىتۋ ءۇشىن جۇيەلى شارالار قابىلداماق، – دەدى مەملەكەت باسشىسى.

پاندەميا كەزىندە بيزنەس نەسيەلەردى قايتارۋ مەرزىمىن شەگەرۋگە مۇمكىندىك الدى، سالىقتان بوساتىلدى جانە باسقا دا جەڭىلدىكتەر مەن ارتىقشىلىقتارعا يە بولدى. كورسەتىلگەن قولداۋدىڭ جالپى كولەمى 1,5 تريلليون تەڭگەدەن استى.

قاسىم-جومارت توقاەۆ قازاقستاننىڭ دسۇ مەن ەۋرازيالىق ەكونوميكالىق وداققا مۇشە بولۋى، ينتەرنەت ساۋداسىنىڭ دامۋى جاڭا مۇمكىندىكتەر مەن تاۋار وتكىزۋ نارىقتارىنا جول اشادى دەپ سانايدى. سونىمەن بىرگە شەتەلدىك ءونىم وندىرۋشىلەر تاراپىنان بولاتىن باسەكەلەستىكتى كۇشەيتەدى. مۇنداي جاعدايدا قازاقستان بيزنەسى ءونىم ساپاسى مەن ەڭبەك ونىمدىلىگىن ۇنەمى جاقسارتىپ، جاڭا ءارى وزىق تەحنولوگيالار مەن بيزنەس-پراكتيكانى مەڭگەرۋى قاجەت.

– ۋاقىت ءبىر ورنىندا تۇرمايدى. الەم، ەكونوميكا، تەحنولوگيالىق قۇرىلىمدار جىلدام وزگەرۋدە. كونكۋرستىڭ تالاپتارى جاڭارتىلىپ، كاسىپكەرلەرىمىزدى ءوز جۇمىستارىن ۇنەمى جەتىلدىرىپ وتىرۋعا ىنتالاندىرۋى كەرەك. بۇل جاھاندىق «تسيفرلىق الەم» جانە ءتورتىنشى ونەركاسىپتىك رەۆوليۋتسيانىڭ تەحنولوگيالارىن قارقىندى ەنگىزۋ جاعدايىندا اسا ماڭىزدى. ۇكىمەت پەن ۇلتتىق پالاتا جەڭىمپاز كاسىپورىندارعا قوسىمشا قولداۋ كورسەتۋ تەتىكتەرى تۋرالى ويلانۋى كەرەك. بۇل بيزنەستى كونكۋرسقا كوپ قاتىسۋ ءۇشىن ىنتالاندىرادى جانە  ەلىمىزدەگى ساپا مەنەدجمەنتىنىڭ تۇجىرىمداماسىن ىلگەرىلەتۋگە ىقپال ەتەدى، – دەدى پرەزيدەنت.

سونىمەن قاتار مەملەكەت باسشىسى كونكۋرس جەڭىمپازدارىنىڭ وسىنداي شەتەلدىك كونكۋرستارعا قاتىسۋىن قامتاماسىز ەتۋگە جانە ولارعا قولداۋ كورسەتۋگە شاقىردى. وسى رەتتە، 2019 جىلى «التىن ساپا» سىيلىعىنىڭ بەس جەڭىمپازى ءونىم جانە قىزمەت كورسەتۋ ساپاسى سالاسىنداعى جەتىستىكتەرى ءۇشىن تمد سىيلىعىنىڭ يەگەرلەرى جانە ديپلومانتتارى اتاندى. مۇنداي كەشەندى قولداۋ وتاندىق كاسىپورىندار ءۇشىن وزدەرىنىڭ باسەكەگە قابىلەتتىلىكتەرىن ارتتىرۋعا، ءونىم ەكسپورتىن ۇلعايتۋعا جانە ەكونوميكادا جاڭا جۇمىس ورىندارىن اشۋعا مۇمكىندىك بەرەدى.

قاسىم-جومارت توقاەۆ ءسوزىنىڭ سوڭىندا «التىن ساپا» كونكۋرسىنا قاتىسقان بارلىق بيزنەس وكىلدەرىنە العىس ءبىلدىردى.

بيىل «ۇزدىك يندۋستريالىق جوبا» نوميناتسياسى بويىنشا الماتى قالاسىنداعى «كەلەت» اكتسيونەرلىك قوعامى جەڭىمپاز اتاندى.  ال، «ۇزدىك يننوۆاتسيالىق جوبا» جۇلدەسىنە «KSP steel» جاۋاپكەرشىلىگى شەكتەۋلى سەرىكتەستىگىنىڭ پاۆلودار فيليالى يە بولدى. جەڭىمپازداردىڭ سىيلىقتارىن پرەزيدەنتتىڭ اتىنان پرەمەر-مينيستر اسقار مامين تاپسىردى.

سونىمەن قاتار «وندىرىستىك باعىتتاعى ۇزدىك كاسىپورىن» نوميناتسياسى بويىنشا «الماتى كوپىر قۇرىلىسى زاۋىتى» جشس (الماتى ق.), «ماكس جولقۇرىلىسسەرۆيس – 21» جشس (الماتى وبلىسى), «ستادبولت مانۋفاكتۋرينگ» جشس (اتىراۋ وبلىسى); «حالىق ءۇشىن تاۋار وندىرەتىن ۇزدىك كاسىپورىن» نوميناتسياسى بويىنشا «GrandMiks» جك (تۇركىستان وبلىسى), «گلوبال-ارنايى كيىم» وندىرىستىك بىرلەستىگى» جشس (اقتوبە وبلىسى), «دانا-دەل» جك (جامبىل وبلىسى); «قىزمەت كورسەتەتىن ۇزدىك كاسىپورىن» نوميناتسياسى بويىنشا «تۇران» ۋنيۆەرسيتەتى (الماتى قالاسى), «سكف «وتدەلستروي» جشس (باتىس قازاقستان وبلىسى), «ەليت-نس ورتالىعى» جشس (نۇر-سۇلتان قالاسى); «ازىق-تۇلىك تاۋارلارىن جانە/نەمەسە اۋىل شارۋاشىلىعى ونىمدەرىن شىعاراتىن ۇزدىك كاسىپورىن» نوميناتسياسى بويىنشا «اقساي» نان-ءبالىش كومبيناتى» جشس (الماتى قالاسى), «ناتيجە «ءسۇت فابريكاسى» جشس (قاراعاندى وبلىسى), «پاسەكا» شارۋا قوجالىعى (شىعىس قازاقستان وبلىسى) «التىن ساپا» كونكۋرسىنىڭ 2020 جىلعى يەگەرلەرى اتاندى.

Abai.kz