التىنشى شاقىرىلىمداعى پارلامەنت ءماجىلىسىنىڭ جۇمىسى اشىق تا ناتيجەلى بولدى. وسى بەس جىلعا جۋىق ۋاقىت ىشىندە ءماجىلىستىڭ 186 جالپى وتىرىسىندا 1207 زاڭ جوبالارىنا تىكەلەي قاتىستى ماسەلە قارالدى.

وندا تۇڭعىش پرەزيدەنت – ەلباسى ن.ءا.نازارباەۆتىڭ، مەملەكەت باسشىسى ق.ج.توقاەۆتىڭ قازاقستان حالقىنا جولداۋلارى جاريالانعان، ەل ومىرىندەگى ەڭ ماڭىزدى ماسەلەلەر باستى نازاردا بولدى.

اتالعان مەرزىمدە ماجىلىستە جيىنى 487 زاڭ جوباسى قارالىپ، ونىڭ 431-ءى قابىلدانعان.  ولاردىڭ 390-نا بۇگىندە مەملەكەت باسشىسى قول قويدى.

سونىڭ ىشىندە، وسى شاقىرىلىمدا ءماجىلىس التى كودەكس قابىلدادى.  اسىرەسە، دەنساۋلىق، ەكولوگيا، اكىمشىلىكتىك كودەكستەردىڭ قابىلدانۋىنا بۇكىل قوعام قاتىستى دەۋگە تولىق نەگىز بار.

ەرەكشە اتاپ ءوتۋ كەرەك، وسى VI شاقىرىلىمدا دەپۋتاتتار 60 زاڭعا وزدەرى باستاماشى بولدى. بۇل بۇرىنعى شاقىرىلىمدارمەن سالىستىرعاندا جوعارى كورسەتكىش.

ءاربىر زاڭ وزەكتىلىگىنە وراي، ءتۇرلى تالقىلاۋ دەڭگەيىنەن وتەدى. مىسالى، ءبىر زاڭ جوباسىمەن 40-تان استام جۇمىس توبىنىڭ وتىرىستارى وتكىزىلىپ، دەپۋتاتتار تاراپىنان كوپتەگەن تۇزەتۋلەر ەنگىزىلەدى. اتاپ ايتساق، دەنساۋلىق ساقتاۋ كودەكسىنىڭ ۇكىمەتتەن كەلگەن جوباسىنا ءماجىلىس دەپۋتاتتارى  900-گە جۋىق، ال،  ەكولوگيالىق كودەكس جوباسىنا 700-دەن اسا تۇزەتۋ ەنگىزگەن.

دەپۋتاتتىڭ ايتۋىنشا، زاڭ جوباسىنا وسىنشا كوپ تۇزەتۋدىڭ ەنگىزىلۋى بىرىنشىدەن، ۇكىمەت تاراپىنان كەلىپ تۇسكەن جوبانىڭ شيكىلىگىن، ەكىنشىدەن دەپۋتاتتاردىڭ اسا جاۋاپتىلىعىن كورسەتەدى.

وسى رەتتە، الەۋمەتتىك سالا دا باستى نازاردا. وسىعان وراي، كوپ بالالى وتباسىلارعا جاڭا جاردەماقىلار بەلگىلەۋگە، اتاۋلى الەۋمەتتىك كومەكتى ارتتىرۋعا مۇمكىندىك بەرەتىن، سونداي-اق، پەداگوگتار مارتەبەسىن كۇشەيتۋگە، بەيبىت جينالىستار جانە ۆولونتەرلىك قىزمەتتەردى رەتتەۋگە جولا اشاتىن ماڭىزدى زاڭدار قابىلداندى.

- قازىر جۇمىس توپتارىنىڭ وتىرىستارىنا دەپۋتاتتار عانا قاتىسپايدى. وسى شاقىرىلىمدا زاڭ جوبالارىن تالقىلايتىن جۇمىس توپتارىنىڭ قۇرامىنا ساياسي پارتيالاردىڭ وكىلدەرى، ازاماتتىق قوعام بەلسەندىلەرى، سالالىق ماماندار، ساراپشىلار تارتىلىپ، ولاردىڭ پىكىرلەرى ەسكەرىلىپ ءجۇر. كەيىنگى كەزدە ءماجىلىستىڭ كەڭەيتىلگەن وتىرىستارى عانا ەمەس، سالالىق كوميتەتتەردىڭ وتىرىستارى دا جەكەلەگەن سايتتاردا، پورتالداردا   ونلاين تۇردە كورسەتىلەدى.  - دەيدى ءماجىلىس دەپۋتاتى قۋانىش سۇلتانوۆ.

وسى جىلداردا ماجىلىستە 61 رەت «ۇكىمەت ساعاتى»، 6 رەت پارلامەنتتىك تىڭداۋ، 70 «دوڭگەلەك ۇستەل»، 18 كونفەرەنتسيا وتكىزىلگەن.

ەلدە قالىپتاسقان پاندەميا كەزىندە دە ءماجىلىس بەلسەنە جۇمىس اتقارىپ، ەكونوميكالىق ءوسۋدى قالپىنا كەلتىرۋ  جانە الەۋمەتتىك جاعدايدى تۇراقتاندىرۋعا ىقپال ەتەتىن زاڭنامالىق قۇجاتتار قابىلدادى.

قۋانىش سۇلتانوۆتىڭ ايتۋىنشا، ءماجىلىس ءوز قىزمەتى بارىسىندا مەملەكەتتىك ءتىل مارتەبەسىن كۇشەيتۋگە باسا كوڭىل بولگەن. ناتيجەسىندە، وسى بەس جىلدا ماجىلىستەگى  550 باياندامانىڭ 495-ءى مەملەكەتتىك تىلدە جاسالىپتى. بۇل 90 پايىزدىق كورسەتكىش. ال، قوسىمشا  باياندامانىڭ 70 پايىزدان استامى مەملەكەتتىك تىلدە جاسالدى. قازاق تىلىندە قويىلعان سۇراقتاردىڭ سانى 54 پايىز بولدى. وسى رەتتە، سۇراعىن مەملەكەتتىك تىلدە قوياتىن وزگە ءتىلدى ارىپتەستەرىمىزدىڭ قاتارى دا قالىڭداي تۇسكەن.

قۋانىش سۇلتانوۆ دەپۋتاتتىق ساۋالدار تۋرالى دا باسا ايتىپ، ۇكىمەتكە جولدانعان 1149 ساۋالدىڭ ارقايسىسىندا سونى دايىنداعان حالىق قالاۋلىلارىنىڭ ماسەلەنى بايىپپەن زەرتتەپ، پروبلەمانى دەر كەزىندە كوتەرىپ جۇرگەندەرىن جەتكىزدى.

دەپۋتاتتار مەملەكەتتىك ورگانداردان كەلگەن جاۋاپتارعا قاناعاتتانباعان جاعدايدا ماسەلەنى ناقتىراق قاراۋدى تالاپ ەتىپ، قايتادان جاۋاپ الدىرىپ جاتادى. تاعى ءبىر ايتا كەتەتىن جاعداي، دەپۋتاتتار اتىنا  23 مىڭنان اسا حات ءتۇسىپ، ولاردىڭ ءبارى دە ءتيىستى ورىندارعا جولدانعان، ءتيىستى جاۋاپتار الىنعان، حات يەلەرى حاباردار ەتىلگەن.

وسى بەس جىلدا دەپۋتاتتار وڭىرلەرگە 14 رەت شىعىپ، ۇزىن سانى 17 مىڭنان استام كەزدەسۋ وتكىزىپ، ولارعا 1 ميلليون 140 مىڭ ادام قاتىستى.

سونىمەن قاتار، قۋانىش سۇلتانوۆ ءوزى مۇشەسى سانالاتىن ءماجىلىستىڭ حالىقارالىق قىزمەتىنە دە  كوڭىل بولە كەلىپ، ەلوردامىزدا وتكەن ەۋروپا مەن ازيا ەلدەرى پارلامەنتتەرى سپيكەرلەرىنىڭ IV كەڭەسىنە توقتالدى. بۇل – حالىقارالىق دەڭگەيدەگى ەڭ بەدەلدى فورۋمعا اينالعانىن اتاپ ءوتتى.

قۋانىش سۇلتانوۆ ءماجىلىس قىزمەتى شىن مانىندە، بارلىق ارىپتەستەرى ءۇشىن ءومىر مەكتەبى بولعانىن العا تارتا كەلىپ، الداعى كەزدە دە ساياساتتاعى ساباقتاستىق ساقتالىپ، وتاندىق پارلامەنتاريزمنىڭ ەلباسى قالىپتاستىرىپ، مەملەكەت باسشىسى جالعاستىرعان ستراتەگيالىق باعىتتارى ودان ءارى دامي تۇسەتىنىنە سەنىم ءبىلدىردى.

Abai.kz