بەيسەنبى, 15 ءساۋىر 2021
اۋىس-ءتۇيىس 12388 11 پىكىر 8 قاڭتار, 2021 ساعات 15:15

جەتپىستەگى ەسىموۆ ەندى قايدا بارادى؟

احمەتجان ەسىموۆ «سامۇرىق-قازىنا» ۇاق اق كەتۋى مۇمكىن. بۇل تۋرالى ەربول ەدىلوۆ telegram كانالىندا جازدى.

ۇلتتىق ءال-اۋقات قورىن 4 جىلدان بەرى باسقارىپ كەلە جاتقان ونىڭ نە سەبەپتى جانە قايدا كەتەتىنى تۋرالى ناقتى اقپارات ازىرگە جوق. دەگەنمەن، ەسىموۆ 2020 جىلى 4 رەت توقاەۆتىڭ قابىلداۋىندا بولىپ، قور جۇمىسى تۋرالى ەسەپ بەرگەن.

7 اقپان. 2020 جىل.

ەسىموۆ بۇل قابىلداۋدى پرەزيدەنتكە 2019 جىلعى جۇمىستارىنىڭ ناتيجەلەرى تۋرالى بايانداپتى. ايتۋىنشا، قوردىڭ كىرىس كولەمى 2018 جىلعى 10,1 تريلليون تەڭگەدەن 2019 جىلى 10,7 تريلليون تەڭگەگە ارتىپ، تازا پايدا 2018 جىلى 1,1 تريلليون تەڭگە، ال 2019 جىلى 1,2 تريلليون تەڭگە بولعان. قوردىڭ اكتيۆتەرى 10 پايىزعا ارتىپ، 26,5 تريلليون تەڭگەگە جەتتى.

ال، 27 مامىر كۇنى ول قازاقستان رەسپۋبليكاسى پرەزيدەنتىنىڭ جانىنداعى ەكونوميكالىق ءوسۋدى قالپىنا كەلتىرۋ جونىندەگى مەملەكەتتىك كوميسسيانىڭ قۇرامىنا ەنگەن. ءسويتىپ، ەكونوميكالىق ءوسىمدى قالپىنا كەلتىرۋ تۋرالى ۇسىنىستار ازىرلەۋگە مىندەتتەلگەن.

28 مامىر. 2020 جىل

كەزدەسۋدە احمەتجان ەسىموۆ قاسىم-جومارت توقاەۆقا جەكەشەلەندىرۋ باعدارلاماسىنىڭ جۇزەگە اسىرىلۋ بارىسى تۋرالى ەسەپ بەردى. ودان بولەك، قور جۇمىسى ارقىلى سىرتقى قارىزدى 8 ميلليارد دوللارعا ازايتقانىن ايتقان. سونداي-اق، كولەمى 1 ميلليارد دوللار بولاتىن كۇردەلى ءارى وپەراتسيالىق شىعىندار وڭتايلاندىرىلىپتى.

7 تامىز. 2020 جىل

كەزدەسۋ بارىسىندا ەسىموۆ مەملەكەت باسشىسىنا «سامۇرىق-قازىنا» ۇلتتىق ءال-اۋقات قورىنىڭ» پاندەميامەن كۇرەس كەزىندەگى قىزمەتى جايىندا بايانداعان. سونداي-اق، «سامۇرىق-قازىنا» قورىنا قاراستى كومپانيالار بيىل ۇكىمەتكە 120 ميلليارد تەڭگە كولەمىندە ديۆيدەند تولەيتىنىن ايتتى. بۇعان دەيىن «سامۇرىق-قازىنا» ۇلتتىق قورعا 50 ميلليارد تەڭگە قارجىنى مەرزىمىنەن بۇرىن اۋدارىپتى.

28 قازان. 2020 جىل 

قاسىم-جومارت توقاەۆقا «سامۇرىق-قازىنا» ۇاق» كومپانيالار توبىنىڭ 9 ايداعى جۇمىسىنىڭ قورىتىندىلارى تۋرالى ەسەپ بەرىلدى.

ەسىموۆتىڭ مالىمەتىنشە، ەسەپتىك كەزەڭدەگى تازا تابىس جوسپارلانعان 167 ملرد تەڭگەدەن 2,6 ەسەگە اسىپ، 436 ملرد تەڭگەگە جەتكەن. ۇكىمەتكە 120 ملرد تەڭگە كولەمىندە ديۆيدەندتەر تولەندى.

2020 جىلداعى 9 ايدىڭ قورىتىندىسى بويىنشا قوردىڭ ساتىپ الۋلار جۇيەسىندەگى جەرگىلىكتى ءونىم ۇلەسى 66%-دى قۇرادى. باسەكەلەستىك ورتاعا 819 ملرد تەڭگەگە ساتىپ الۋلار شىعارىلعان. بيزنەستىڭ 17 مىڭ سۋبەكتىسى قوردىڭ ساتىپ الۋلارىنا قاتىسۋعا مۇمكىندىك العان. 2020 جىلدىڭ باسىنان بەرى كومپانيالار توبى 2,4 ترلن تەڭگەگە وتاندىق بيزنەسپەن شارتتار جاساسىپ، جەرگىلىكتى كاسىپورىندارعا 12 مىڭ تاپسىرىس بەرىلگەن. اتالعان كاسىپورىنداردا 280 مىڭ ادام جۇمىس ىستەيدى. ەسەپ بويىنشا مەملەكەتتىك بيۋدجەتكە 170 ملرد تەڭگە كولەمىندە سالىق تولەمدەرى ءتۇسۋى ءتيىس ەكەنىن بايانداپتى.

تالقى: 2020 جىلدىڭ 15-جەلتوقسانىندا 70-كە تولعان ەسىموۆ بۇعان دەيىن بىرقاتار لاۋازىمدى قىزمەتتەر اتقارعان. كەيبىر باق ونى ەكس-پرەزيدەنت نازارباەۆتىڭ جيەنى دەپ تە جازادى. ال، 2008-2015 جىلدارى ول الماتى قالاسىنىڭ اكىمى بولدى. الايدا، كوپشىلىك ونىڭ اكىم بولىپ تۇرعان سول جەتى جىل ىشىندە تاۋەلسىزدىك كۇنىنە ءبىر رەت تە ءتاۋ ەتپەگەنىن سىنعا الادى...

ال، 2017 جىلى ول «استانا ەكسپو-2017» اق-ىن باسقاردى. ودان سوڭ، ەلىمىزدەگى ەڭ ءىرى حولدينگ «سامۇرىق-قازىنا» ۇاق اق تىزگىنىن ۇستادى.

سونىمەن، جاسى 70-كە جەتكەن ەسىموۆ ەندى زەينەتكە شىعا ما، الدە باسقا قىزمەتكە وتىرا ما؟ ءسىز قالاي ويلايسىز؟

نۇربيكە بەكسۇلتانقىزى

Abai.kz

11 پىكىر