سايلاۋ قالاي ءوتتى؟
بۇگىن قازاقستاندا سايلاۋ كۇنى. قر پارلامەنتى ءماجىلىسى مەن ءماسليحاتتار دەپۋتاتتارىن سايلاۋ پروتسەسسى باستالىپ كەتتى.
قر ورتالىق سايلاۋ كوميسسياسى ۇسىنعان مالىمەتتەر بويىنشا، قازىر ۇزىن-سانى 10 060 سايلاۋ ۋچاسكەسى جۇمىس ىستەپ جاتىر. وسك-نىڭ 10:00-دەگى اقپاراتى بويىنشا، جالپى سايلاۋشىلاردىڭ 11,6 پايىزى داۋىس بەرىپ ۇلگەرگەن.
(سۋرەت قر وسك سايتىنان الىندى)
ايتا كەتەيىك، ءماجىلىس سايلاۋىنا 5 ساياسي پارتيا قاتىسىپ جاتىر. ولار الدىن-الا تارتىلعان جەرەبە بويىنشا سايلاۋ بيۋلەتەنىندە تومەندەگىدەي رەتپەن ورنالاسقان:
1 نومەردە – «قازاقستان حالىق» پارتياسى،
2 نومەردە – «Nur Otan» پارتياسى،
3 نومەردە – «اۋىل» پارتياسى،
4 نومەردە – «اق جول» پارتياسى
5 نومەردە – «ادال» پارتياسى.
جالپى وسى بەس ساياسي پارتيادان 312 ۇمىتكەر ءماجىلىس دەپۋتاتتىعىنا ۇسىنىلعان.
(Abai.kz كوللاجى)
بەس پارتيا ليدەرلەرى دە داۋىس بەردى
وسى ۋاقىتقا دەيىن قر پرەزيدەنتىنەن باستاپ بىرقاتار ۇكىمەت مۇشەلەرى مەن قالالىق جانە وبلىستىق دەڭگەيدەگى اكىمدەر داۋىس بەرگەنى تۋرالى اقپارات جاريا بولدى. ولار: قاسىم-جومارت توقاەۆ، اسقار مامين، الەكسەي تسوي، اقتوتى رايىمقۇلوۆا، كارىم ءماسىموۆ، جەڭىس قاسىمبەك، باقىتجان ساعىنتاەۆ، التاي كولگىنوۆ، قۇمار اقساقالوۆ، ماحامبەت دوسمۇحامبەتوۆ، عالي ەسقاليەۆ، ومىرزاق شوكەەۆ، گۇلشارا ابدىحالىقوۆا ت.ب.
سايلاۋعا قاتىسىپ جاتقان ساياسي پارتيا ليدەرلەرى دە وزدەرى تىركەلگەن اۋماقتا داۋىس بەرگەن. ولار: نۇرسۇلتان نازارباەۆ، ءالي بەكتاەۆ، ازات پەرۋاشەۆ، ايقىن قوڭىروۆ، سەرىك سۇلتانعاليەۆ.
رەسمي دەرەك
وسك-نىڭ 12:00-دەگى اقپاراتى بويىنشا، جالپى سايلاۋشىلاردىڭ 28,8 پايىزى داۋىس بەرىپ ۇلگەرگەن.
(سۋرەت قر وسك سايتىنان الىندى)
جانبولات ماماي باستاعان توپ ميتينگكە شىقتى
الماتىدا جانبولات ماماي باستاعان دەمپارتيا قۇرعىسى كەلەتىن بەلسەندى توپ ورتالىق الاڭعا شىقتى. ولار بۇگىن ءوتىپ جاتقان ءماجىلىس جانە ءماسليحات دەپۋتاتتارىنىڭ سايلاۋىنا بايكوت جاريالاۋعا ۇندەدى.
(سۋرەت «ازاتتىق» سايتىنان الىندى)
«ازاتتىق» سايتىنىڭ جازۋىنشا، تاۋەلسىزدىك مونۋمەنتىنە قاراي كەلە جاتقان توپتى نازارباەۆ پەن ساتباەۆ كوشەلەرى قيىلىسىندا الماتى اكىمدىگىنىڭ وكىلدەرى كۇتىپ الىپ، وتكىزىپ جاتقان شەرۋدىڭ «زاڭسىز» ەكەنىن ايتقان. سالدەن سوڭ شەرۋلەتكەن توپتى ارنايى جاساق قورشاۋعا العان.
ولارمەن سويلەسۋگە الماتى قالالىق قوعامدىق كەڭەسىنىڭ توراعاسى راحمان الشانوۆ كەلگەن. نارازى توپ: «بايكوت»، دەپ ۇرانداعان. ال الشانوۆ باستاعان توپ ولاردى: «ەل تىنىشتىعىن بۇزعىسى كەلىپ ءجۇر»، دەپ كىنالاعان. وسىلايشا ەكى تاراپ اراسىندا ديالوگ بولماعان.
«ازاتتىقتىڭ» ايتۋىنشا، ميتينگ ءوتىپ جاتقان اۋماقتا ينتەرنەت وشكەن. سوندىقتان، «ازاتتىق» تىلشىلەرى تىكەلەي ەفيردە حابار تاراتا الماعان.
مۇنداي اقپارات «tengrinews.kz» سايتىندا دا جاريالاندى. وندا: «الماتىلىقتار بىرنەشە ساعاتتان بەرى جۇمىس ورىندارىندا بايلانىستىڭ ناشارلاعانىن ايتىپ شاعىمدانۋدا. ولاردىڭ ايتۋىنشا، قالادا ينتەرنەت جوق. ال رەسپۋبليكا الاڭى ماڭىندا ينتەرنەت تولىعىمەن وشكەن. «قازاقتەلەكوم» بايلانىستىڭ ناشارلاعانى تۋرالى اقپاراتتى تەرىسكە شىعاردى. ال اكىمدىك ازىرگە ءۇنسىز»، دەپ جازىلعان.
ەلەكتوراتتىڭ سايلاۋعا قاتىسۋ بەلسەندىلىگى تۋرالى ەكى ءتۇرلى اقپارات تاراپ جاتىر. رەسمي اقپارات: 28,8 پايىز دەسە، بەيرەسمي اقپارات: 5-8 پايىزدىڭ اينالاسى دەيدى.
رەسمي دەرەك
وسك-نىڭ 14:00-دەگى اقپاراتى بويىنشا، جالپى سايلاۋشىلاردىڭ 43,9 پايىزى داۋىس بەرىپ ۇلگەرگەن.
(سۋرەت قر وسك سايتىنان الىندى)
باق: پوليتسيا 31 ادامدى ۇستادى
الماتىداعى ورتالىق الاڭعا جينالعان توپتان كەمىندە 31 ادامدى پوليتسيا ۇستاپ اكەتكەن. بۇل تۋرالى «ازاتتىق» سايتى حابارلادى. ولاردىڭ اراسىندا «سايلاۋعا بايكوت» دەپ ايقايلاعاندار مەن پلاكات ۇستاعاندار بولعان.
(سۋرەت «ازاتتىق» سايتىنان الىندى)
رەسمي دەرەك
وسك-نىڭ 16:00-دەگى اقپاراتى بويىنشا، جالپى سايلاۋشىلاردىڭ 52,5 پايىزى داۋىس بەرىپ ۇلگەرگەن.
(سۋرەت قر وسك سايتىنان الىندى)
رەسمي دەرەك
وسك-نىڭ 18:00-دەگى اقپاراتى بويىنشا، جالپى سايلاۋشىلاردىڭ 58,2 پايىزى داۋىس بەرىپ ۇلگەرگەن.
(سۋرەت قر وسك سايتىنان الىندى)
مارافونشى مارات جىلانباەۆ ميتينگتە ۇستالدى
قازاقستاندىق باق: بۇگىن الماتى، نۇر-سۇلتان، شىمكەنت، اقتوبە، ورال قالالارىندا «سايلاۋعا بايكوت» دەپ شىققان بەلسەندىلەردى پوليتسيا ۇستاپ اكەتكەن. بۇل ميتينگتەردى ءۇش بىردەي قوزعالىستىڭ وكىلدەرى ۇيىمداستىرعان. ولار: دەموكراتيالىق پارتيا قۇرامىز دەپ جۇرگەن جانبولات ماماي باستاعان توپ، «ويان قازاقستان» وكىلدەرى جانە شەتەلدەگى ەكس-بانكير مۇحتار ءابليازوۆتىڭ جاقتاستارى.
(سۋرەت الەۋمەتتىك جەلىدەن الىندى)
ۇستالعان ازاماتتاردىڭ قاتارىندا ەسىمى الەمگە ايگىلى سپورتشى، مارافونشى، ءتورت قۇرلىقتاعى بارلىق شولدەن جالعىز جۇگىرىپ وتكەن، 7 مارتە گيننەس رەكوردتار كىتابىنا ەنگەن جەلاياق مارات جىلانباەۆ تا بار. ول نۇر-سۇلتان قالاسىندا ۇستالعان.
رەسمي دەرەك
وسك-نىڭ 20:00-دەگى اقپاراتى بويىنشا، جالپى سايلاۋشىلاردىڭ 63,1 پايىزى داۋىس بەرىپ ۇلگەرگەن.
سايلاۋشىلاردىڭ كەلۋى بويىنشا ەڭ تومەنگى كورسەتكىش الماتى قالاسىندا (30,3%) بولسا، ەڭ جوعارعى كورسەتكىش - سولتۇستىك قازاقستان وبلىسىندا (75,5%) تىركەلگەن.
سوڭعى ەسەپ
وسك-نىڭ 2021 جىلعى 10 قاڭتاردا سايلاۋشىلاردىڭ داۋىس بەرۋگە كەلۋىنىڭ الدىن الا قورىتىندىلارى تۋرالى اقپاراتى بويىنشا، جالپى سايلاۋشىلاردىڭ 63,3 پايىزى داۋىس بەرىپ ۇلگەرگەن.
سايلاۋشىلاردىڭ كەلۋى بويىنشا ەڭ تومەنگى كورسەتكىش الماتى قالاسىندا (30,3%) بولسا، ەڭ جوعارعى كورسەتكىش - سولتۇستىك قازاقستان وبلىسىندا (75,5%) تىركەلگەن.
رەسپۋبليكا بويىنشا ۋچاسكەلەردە داۋىس بەرۋ ساعات 20.00-دە اياقتالدى!
رەسپۋبليكا اۋماعىنداعى ساعات بەلدەۋلەرىنىڭ شەكارالارىنا سايكەس بەس وڭىردە (اقتوبە، اتىراۋ، باتىس قازاقستان، قىزىلوردا جانە ماڭعىستاۋ وبلىستارى) داۋىس بەرۋ استانا ۋاقىتى بويىنشا ساعات 21.00-دە اياقتالدى.
Abai.kz
